ނޭޕާލްގެ ކުރީގެ ރެޕް ލަވަކިޔުންތެރިޔާ އަދި ކަތަމަންޑޫގެ ކުރީގެ މޭޔަރު ބާލެންދުރަ ޝާހް (ބާލެން)، އެ ގައުމުގެ އާ ބޮޑުވަޒީރުކަމުގެ މަގާމަށް ވަޑައިގަތުމާ ގާތަށް ޖެހިވަޑައިގެންފިއެވެ.
އުމުރުން 35 އަހަރުގެ ބާލެން މި ކާމިޔާބީއާ ގާތަށް ވަޑައިގެންފައިވަނީ، ދާދިފަހުން ނޭޕާލްގައި ބޭއްވި އާންމު އިންތިޚާބުގައި އޭނާ ނިސްބަތްވެވަޑައިގަންނަވާ, ރާސްޓްރިޔާ ސްވަތަންތްރާ ޕާޓީ (އާރްއެސްޕީ) އިން ހޯދަމުން އަންނަ ބޮޑު ކުރިއެރުމާ ގުޅިގެންނެވެ.
މިދިޔަ ބުރާސްފަތި ދުވަހު ބޭއްވި އާންމު އިންތިޚާބުގެ ނަތީޖާތައް ދައްކާ ގޮތުން، ބާލެން ވަނީ ނޭޕާލްގެ ކުރީގެ ބޮޑުވަޒީރު ކޭޕީ ޝަރްމާ އޮލީއާ ވާދަކުރައްވައި ބޮޑު ތަފާތަކުން ކުރިހޯއްދަވާފައެވެ. އޮލީގެ އުފަން ދާއިރާ ކަމަށްވާ ޖާޕާ-5 ގައި ވާދަކުރައްވައި، ބާލެން ވަނީ 47،000 އަށްވުރެ ގިނަ ވޯޓު ހޯއްދަވާފައެވެ. މިއާ ޚިލާފަށް އޮލީއަށް ލިބިވަޑައިގަތީ ގާތްގަނޑަކަށް 12،600 ވޯޓެވެ. މިއާއެކު، އާރްއެސްޕީން އަންނަނީ ގާނޫނުހަދާ މަޖިލީހުގެ 275 ގޮނޑީގެ ތެރެއިން ގިނަ ގޮނޑިތަކެއް ކާމިޔާބުކުރަމުންނެވެ.
ބާލެން އަކީ ސްޓްރަކްޗަރަލް އިންޖިނިއަރެކެވެ. ސިޔާސީ މައިދާނަށް ވެންނެވުމުގެ ކުރިން އޭނާ އާންމުންގެ މެދުގައި މަގުބޫލުވެފައިވަނީ މުޖުތަމައުގެ މައްސަލަތަކާއި ކޮރަޕްޝަނާ ދެކޮޅަށް އަޑުއުފުލައި ލަވަކިޔަމުންދިޔަ ފަންނާނެއްގެ ގޮތުގައެވެ. ދެހާސް ބާވީސް ވަނަ އަހަރު އޭނާ ވަނީ އަމިއްލަ ގޮތުން ވާދަކުރައްވައި، ނޭޕާލްގެ ބޮޑެތި ސިޔާސީ ޕާޓީތަކުގެ ކެންޑިޑޭޓުން ބަލިކުރައްވައި ކަތަމަންޑޫގެ މޭޔަރުކަން ކާމިޔާބުކުރައްވާފައެވެ. މޭޔަރުކަމުގެ ދައުރުގައި އޭނާ ވަނީ ކަތަމަންޑޫގެ އުމްރާނީ ތަރައްގީއަށާއި ކުނި މެނޭޖުކުރުމުގެ ނިޒާމަށް ހެޔޮ ބަދަލުތަކެއް ގެންނަވާފައެވެ.
މި ފަހަރުގެ އާންމު އިންތިޚާބުގައި ވާދަކުރެއްވުމަށްޓަކައި ބާލެން ވަނީ މޭޔަރުކަމުގެ މަގާމުން އިސްތިއުފާދެއްވައި، އާރްއެސްޕީއާ ގުޅިވަޑައިގެންފައެވެ. އެ ޕާޓީގެ ބޮޑުވަޒީރުކަމުގެ ކެންޑިޑޭޓުގެ ގޮތުގައި އޭނާ ނުކުމެވަޑައިގަތީ، ޒުވާނުން ބާރުވެރިކުރުވުމާއި، ކޮރަޕްޝަން ނައްތާލުމާއި، އަދި އިގުތިސާދީ އިސްލާހުތައް ގެނައުމުގެ ވައުދުތަކާއެކުގައެވެ. ވަޒީފާ ނެތުމުގެ މައްސަލައާއި މުސާރަ ކުޑަވުމުގެ ސަބަބުން ގައުމު ދޫކޮށްދާ ޒުވާނުންގެ އަދަދު މަދުކުރުމަށްޓަކައި 1.2 މިލިއަން ވަޒީފާ އުފެއްދުމަކީ އޭނާގެ މުހިންމު ވައުދެކެވެ.
ނޭޕާލްގައި އަވަސް އިންތިޚާބެއް މި ބޭއްވީ، މިދިޔަ އަހަރުގެ ސެޕްޓެމްބަރު މަހު އެ ގައުމުގެ ޒުވާނުން ނުކުމެ ކުރި ބޮޑެތި މުޒާހަރާތަކާ ގުޅިގެން އޭރުގެ ބޮޑުވަޒީރު އޮލީގެ ސަރުކާރު ވެއްޓުމާ ގުޅިގެންނެވެ. އެ މުޒާހަރާތަކުގައި ބާލެން ވަނީ ޒުވާނުންނަށް ވަރަށް ބޮޑަށް ހިތްވަރުދެއްވައި، ގައުމުގެ ހިންގުމާ ހަވާލުވުމަށް ތައްޔާރުވުމަށް ގޮވާލައްވާފައެވެ. އިންތިޚާބުގެ ފަހުގެ ނަތީޖާތަކުން ދައްކާ ގޮތުގައި، ނޭޕާލްގެ ރައްޔިތުން ވަނީ ޒަމާންވީ ސިޔާސީ ލީޑަރުންގެ ބަދަލުގައި އާ ޖީލުގެ ލީޑަރަކަށް ގައުމުގެ ހިންގުން ހަވާލުކުރަން ނިންމާފައެވެ.