ގައުމީ އެއާލައިން، މޯލްޑިވިއަންއިން ދަތުރުކުރާ ފަސިންޖަރުންނަށް، އިންޑިއާގެ ތުރިވަނަންތަޕޫރަމްގައި ހުންނަ އަނަންތަޕޫރީ ހޮސްޕިޓަލް އެންޑް ރިސާޗް އިންސްޓިޓިއުޓުން ޑިސްކައުންޓް ލިބޭނެ ގޮތަށް އެއްބަސްވުމެއް ހަދައިފިއެވެ.
އިންޑިއާއަކީ ދިވެހީން ސިއްހީ ފަރުވާ ހޯދުމަށް އާންމުކޮށް ދަތުރުކުރާ ގައުމެކެވެ. އެގޮތުން ރާއްޖެއާ ކައިރިވުމާއި، ޒަމާނީ ސިއްހީ ޚިދުމަތްތައް ލިބެން ހުރުމުން، ގިނަ އަދަދެއްގެ ދިވެހީން ޓްރިވެންޑްރަމްއަށް ދަތުރުކުރެއެވެ.
މޯލްޑިވިއަންއިން ބުނި ގޮތުގައި، އަނަންތަޕޫރީ ހޮސްޕިޓަލާއެކު ހަދައިފައިވާ އެއްބަސްވުމުގެ މައިގަނޑު މަގުސަދަކީ އެ އެއާލައިނުން ދަތުރުކުރާ ދިވެހީންނަށް ސިއްހީ ޚިދުމަތްތައް ހޯދުމުގައި ލުއިފަސޭހަގޮތްތަކެއް ފަހިކޮށްދިނުމެވެ.
އެ އެއްބަސްވުމުގެ ދަށުން، މޯލްޑިވިއަންއިން ދަތުރުކުރާ މީހުންނަށް އަނަންތަޕޫރީ ހޮސްޕިޓަލުން ލިބޭ ޑިސްކައުންޓްތަކުގެ ތެރޭގައި:
- އެޑްމިޓްކޮށްގެންދޭ ފަރުވާއާއި އެޑްމިޓްނުކޮށްދޭ ފަރުވާތަކުން ޚާއްސަ ޑިސްކައުންޓްތަކެއް ލިބުން
- ހެލްތު ޗެކަޕް ޕެކޭޖްތަކުން 15 ޕަސެންޓްގެ ޑިސްކައުންޓް
- ލެބޯޓަރީ ޓެސްޓްތަކާއި ރޭޑިއޮލޮޖީގެ ޚިދުމަތްތަކުން 10 ޕަސެންޓްގެ ޑިސްކައުންޓް
- ތުރިވަނަންތަޕޫރަމް އިންޓަނޭޝަނަލް އެއާޕޯޓުން ހޮސްޕިޓަލަށް ދިއުމަށް ހިލޭ އެމްބިއުލާންސްގެ ޚިދުމަތް
މޯލްޑިވިއަންއިން ބުނި ގޮތުގައި، ދިވެހީންނަށް ފޯރުކޮށްދޭ އެހީތެރިކަން އިތުރުކުރުމުގެ ގޮތުން، އެޕޮއިންޓްމަންޓްތައް ހަމަޖެއްސުމަށާއި ބަލިމީހުންނަށް ބޭނުންވާ އިތުރު ކަންކަމުގައި އެހީތެރިވުމަށް އަނަންތަޕޫރީ ހޮސްޕިޓަލުގައި ޚާއްސަ ކަސްޓަމާ ކެއާ ޑެސްކެއް ބަހައްޓާނެއެވެ. އަދި އުމުރުން ދުވަސްވީ މީހުންނާއި ބޮޑެތި ބަލިތަކަށް ފަރުވާ ހޯދާ މީހުންނަށް، ހޮސްޕިޓަލުގެ މުވައްޒަފުންނާ ވާހަކަ ދެއްކުމަށް ފަސޭހަކޮށްދިނުމުގެ ގޮތުން ތަރުޖަމާނެއްގެ އެހީތެރިކަން ފޯރުކޮށްދޭނެ ކަމަށްވެސް އެ އެއާލައިނުން ބުންޏެވެ.
މޯލްޑިވިއަންއިން ތުރިވަނަންތަޕޫރަމަށް ދަތުރުކުރާ ހުރިހާ ފަސިންޖަރުންނަށްވެސް އެ ޚިދުމަތްތައް ލިބޭނެ ކަމަށް އެ އެއާލައިނުން ބުންޏެވެ.
މޯލްޑިވިއަންއިން ޓްރިވެންޑްރަމްއަށް ކުރާ ދެކޮޅު ދަތުރުތަކަށް މިހާރު ޓިކެޓަށް 5،286 ރުފިޔާ އަރާއިރު، އެ އެއާލައިނުން ވަނީ، ހޮސްޕިޓަލަށް ގޮސް ބޯޑިން ޕާސް ދެއްކުމުން މިހާރު ޑިސްކައުންޓް ލިބޭނެ ކަމަށް ބުނެފައެވެ.
އެކަމާ ގުޅޭ އިތުރު މައުލޫމާތު މޯލްޑިވިއަން ނުވަތަ އަނަންތަޕޫރީ ހޮސްޕިޓަލުން ސާފުކުރެވޭނެކަން އެ އެއާލައިނުން ފާހަގަކުރެއެވެ.