ޑިމާންޑާ އެއްވަރަށް އައްޑޫ ސިޓީއަށް ދަތުރުކުރާ ފްލައިޓުތައް އިތުރުނުކުރާތީ އައްޑޫ މީދޫ ދާއިރާގެ އަމިއްލަ މެންބަރު އަބްދުއްރަހްމާން ކަންބޮޑުވުން ފާޅުކުރައްވައިފިއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި އަބްދުއްރަހްމާން ވިދާޅުވީ މޯލްޑިވިއަން ފްލައިޓްތަކުން އައްޑުއާއި މާލެއާއި ދޭތެރޭ ދަތުރުކުރަން މިފަހަކަށް އައިސް އެއްގޮތަކަށް ވެސް ޖާގައެއް ނުލިބޭ ކަމަށެވެ. ފްލައިޓްތަށް އިތުރު ނުކުރެވޭއިރު، އެހެން ބަޔަކަށް އުދުހުމުގެ ފުރުސަތެއް ވެސް ނުދޭ ކަމަށް އޭނާ ތުހުމަތުކުރެއްވިއެވެ.
އޭނާ ވިދާޅުވި ގޮތުގައި ޑިމާންޑާ އެއްވަރަށް ދަތުރު ބޭއްވުމުގެ ގާބިލުކަން ސަރުކާރު އަދި މޯލްޑިވިއަންގައި ނެތްނަމަ އެހެން ބަޔަކަށް އުދުހުމުގެ ފުރުސަތު ދޭން ޖެހޭނެއެވެ.
"ފަހު ދިހައިގައި އަދި އީދަށް އާއިލާ ކައިރިއަށް އަންނަން ތިބި އައްޑޫ މީހުންނަށް އެ ފުރުސަތެއް ވެސް ނެތް. އަދި އީދަށް މަޑުކުރަން ބޭނުން އެތައް ބަޔަކު ޖާގަ ނުލިބުމުގެ ސަބަބުން އީދުގެ ކުރިން ފުރަން އެބަޖެހޭ. މިއީ ވަކި ޗުއްޓީއެއް ވެގެން މިހާރު ވާ ކަމެއް ނޫން،" އަބްދުއްރަހްމާން ވިދާޅުވިއެވެ.
"...މޮނޮޕޮލީއެއް ކުޅެ މޯލްޑިވިއަންއިން އައްޑޫ ރައްޔިތުން ފެލާ، ރައްޔިތުންނާ ދޭތެރޭ ހިތުހުރި އެއްޗެއް މިހަދަނީ ސަރުކާރުން،" އަބްދުއްރަހްމާން އިތުރަށް ވިދާޅުވިއެވެ.
އޭނާ ވިދާޅުވި ގޮތުގައި ފްލައިޓްތަކުގެ ދަތިކަން މިހާ ބޮޑަށް އޮންނައިރު "އަމިއްލަ ދޯންޏަކަށް ހަދާ ގޮތަށް" ކެމްޕޭން ދަތުރުތަކަށް ބޯޓުތަކުގެ ޝެޑިއުލް އެބަ ބަދަލުކުރެއެވެ. އެހެން ހެދުމުން އެންމެ ބޮޑު ގެއްލުމެއް ލިބެނީ ކަނެކްޓިން ފްލައިޓްތަކަށް އަރަން ތިބި މީހުންނަށް ކަމަށާއި، ފްލައިޓްތައް ވަޒީރުންނާއި މެންބަރުން ބޭނުން ވަގުތަކަށް ލަސްކުރާ ކަމަށް ވެސް އޭނާ ތުހުމަތުކުރެއްވިއެވެ.
ކޮންމެ އިންތިޚާބަކާ ދިމާކޮށް އައްޑޫ ރައްޔިތުންނަށް އުޑުން ތަރި ބާލަދޭ. 2023 ވަނަ އަހަރުވެސް މިވަގުތު ވަޒީރުންނަށް ތިއްބެވި ބޭފުޅުން ވިދާޅުވީ ވެރިކަން ލިބިއްޖެނަމަ ތަރި ބާލަދޭން. ދެން 2024ގައި މަޖިލިސް ލިބިއްޖެނަމަ އެންމެ ދުރުގައި ތިބި ތަރިބާލަދޭން. ވެރިކަން ވެސް ދެވިއްޖެ. މަޖިލިސް ވެސް ދެވިއްޖެ. މިހާރު ވިދާޅު ވަނީ ތަރި ބޭލޭނީ ކައުންސިލް ވެސް ލިބިގެން ކަމަށް، އައްޑޫ މީދޫ ދާއިރާގެ މެންބަރު އަބްދުއްރަހްމާން
ނުރުހުން ފާޅުކުރައްވައި އަބްދުއްރަހްމާން ވިދާޅުވީ ދައުލަތުން އެތައް މިލިއަން ޑޮލަރެއް ޚަރަދުކޮށްގެން އައްޑޫގައި ހެދުނީ ޑްރޯން ބޭސްއެއް އެކަނި ކަމަށާއި ކޮއްދިންހާ ވެސް ކަމަކީ އެއީ ކަމަށެވެ. ދެން ޖަލްސާ ބާއްވައި ވިދާޅުވަނީ އެންމެ އިސްކަމެއް ދެނީ އައްޑޫއަށް ކަމަށާއި، މިފަހަރު ތަފާތު ފެންނާނެ ކަމަށް ކަމަށް ވިދާޅުވެ އޭނާ ފާޑުވިދާޅުވިއެވެ.
އައްޑޫ ސިޓީ --- ފޮޓޯ/ ޓައިމްސް އޮފް އައްޑޫ
އޭނާ ވިދާޅުވި ގޮތުގައި އައްޑޫ އިސްކުރަނީ ވާހަކައިންނެވެ. ނަމަވެސް ވެރިކަމަށް ދެއަހަރަށް ވުރެ ގިނަ ދުވަސް ވިއިރު ދިން އިސްކަމެއް ނެތް ކަމަށް އޭނާ ވިދާޅުވިއެވެ.
ހަމައެއާއެކު ސަރުކާރަށް ހީވަނީ އައްޑުއަށް ބޭނުމީ ހަމައެކަނި މަގާއި ކަރަންޓުހެން ކަމަށް އޭނާ ވިދާޅުވިއެވެ.
ކަރަންޓު ވެސް ބޭނުން މަގު ވެސް ބޭނުން. މަސްފެކްޓަރީވެސް ބޭނުން. ބްރިޖްވެސް ބޭނުން. ބޭސް އަދި ބޭސްފަރުވާ ބޭނުން. ވިދާޅުވި އައްސޭރި ޓުއަރިޒަމުން 10،000 ވަޒީފާ ވެސް ވަރަށް ބޭނުން. ދެން ވައުދުވި ކަމެއް ވެސް ބޭނުން. ނުވީމާ ނުވާ ވާހަކަ މި ދައްކަނީ. ނުކުރީމަ ނުކުރާ ވާހަކަ މި ދައްކަނީ، އައްޑޫ މީދޫ ދާއިރާގެ މެންބަރު އަބްދުއްރަހްމާން
އަބްދުއްރަހްމާން އެފަދައިން ވިދާޅުވިއިރު، އައްޑޫއަށް ދުވާލަކު ތިނެއް ނުވަތަ ހަތަރު ފްލައިޓް މާލެއިން ދަތުރު ކުރެއެވެ. އަދި އައްޑޫއިން މާލެއަށް ވެސް އެ އަދަދަށް ދުވާލަކު ފްލައިޓްތައް އޮވެއެވެ. އަދި ޓިކެޓެއްގެ އަގު އުޅެނީ 1،222 ރުފިޔާއަށެވެ.