އިންޑޮނޭޝިއާއިން 16 އަހަރުން ދަށުގެ ކުދިން ސޯޝަލް މީޑިއާ ޕްލެޓްފޯމްތަކަށް ވަނުން ހަނިކުރާނެ ކަމަށް އެ ގައުމުގެ ކޮމިއުނިކޭޝަން އެންޑް ޑިޖިޓަލް މިނިސްޓްރީން ބުނެފިއެވެ.
އިންޑޮނޭޝިއާގެ ކޮމިއުނިކޭޝަންސް އެންޑް ޑިޖިޓަލް މިނިސްޓަރު މެއުތުޔާ ހާފިދު ދެއްވި ވީޑިއޯ ބަޔާނެއްގައި ވިދާޅުވީ މިއަދު ނެރުނު ގަވާއިދެއްގެ ދަށުން 16 އަހަރުން ދަށުގެ ކުދިންނަށް ސޯޝަލް މީޑިއާ އެކައުންޓްތަކަށް ވަނުން ހަނި ވާނެ ކަމަށެވެ.
އަދި މި މަހުގެ 28 އިން ފެށިގެން "ހައި ރިސްކް ޕްލެޓްފޯމްތަކުގައި" 16 އަހަރުން ދަށުގެ ކުދިންގެ އެކައުންޓްތައް މަޑުމަޑުން ޑިއެކްޓިވޭޓް ކުރާނެ ކަމަށް މެއުޓިއާ ވިދާޅުވިއެވެ. އެ ޕްލެޓްފޯމްތަކުގެ ތެރޭގައި ޓިކްޓޮކް، ފޭސްބުކް، އިންސްޓަގްރާމް، އަދި ރޮބްލޮކްސް ހިމެނެއެވެ.
"ހުރިހާ ޕްލެޓްފޯމްތަކުން ވެސް ވާޖިބުތައް އަދާކުރެވެންދެން މި ޕްރޮސެސް މަޑުމަޑުން ކުރިއަށް ގެންދާނެ." މެއުތިޔާ ވިދާޅުވިއެވެ.
"އަޅުގަނޑުމެންނަށް ވިސްނޭ މިކަމުގެ ސަބަބުން ފެށުމުގައި އުނދަގޫތަކެއް ކުރިމަތިވެދާނެކަން. ކުދިން ޝަކުވާ ކޮށްފާނެ އަދި ބެލެނިވެރިންނަށް އެ މީހުންގެ ޝަކުވާތަކާ މުއާމަލާތް ކުރަން އޮޅުން ބޮޅުން ވެދާނެ."
އިންޑޮނޭޝިއާ ވެގެންދާނީ ހުޅަނގުގެ ގައުމުތައް ފިޔަވައި މިފަދަ ހުރަސްތައް އަޅާ ފުރަތަމަ ގައުމަށް ކަމަށް ވެސް އޭނާ ވިދާޅުވިއެވެ.
ގާތްގަނޑަކަށް 280 މިލިއަން މީހުން ދިރިއުޅޭ ގައުމެއް ކަމަށްވާ އިންޑޮނޭޝިއާގައި އިންޓަނެޓް ބޭނުންކުރާ މިންވަރު 79.5 ޕަސެންޓަށް އަރާފައިވާ ކަމަށް އިންޑޮނޭޝިއާގެ އިންޓަނެޓް ޚިދުމަތްދޭ ޖަމިއްޔާއިން 8،700 މީހުން ބައިވެރިކޮށްގެން ކުރި ދިރާސާއަކުން ދައްކައެވެ.
ކުޑަ ކުދިންގެ ސަލާމަތާއި ނަފްސާނީ ދުޅަހެޔޮކަމާއި ސޯޝަލް މީޑިއާ އިން ކުރަމުންދާ އަސަރުތަކާ ގުޅިގެން ގިނަ ގައުމުތަކަކުން މިހާރު ވެސް ވަނީ ކުޑަ ކުދިންނަށް ސޯޝަލް މީޑިއާ ބޭނުންކުރުން ހުއްޓުވާފައެވެ.
އެގޮތުން އޮސްޓްރޭލިއާ އިން ޑިސެމްބަރު މަހު 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރިއިރު، ސްޕެއިން އިން ވެސް މިދިޔަ މަހު ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރާނެ ކަމަށް ބުނެފައެވެ.
އިންޑޮނޭޝިއާގެ އަވަށްޓެރި މެލޭޝިއާ އިންވެސް ވަނީ މި އަހަރުން ފެށިގެން 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރާނެ ކަމަށް ނޮވެމްބަރު މަހު އިއުލާންކޮށްފައެވެ.