މި ރޯދައިގެ ފަހު ދިހައެއްގައި މުޅި ރާއްޖެއަށް ކެރީގެ އަސަރު ދޭތެރެއަކުން ކުރިނަމަވެސް، އާންމުކޮށް މޫސުން ރަނގަޅުވާނެ ކަމަށް މޫސުމާ ބެހޭ ގައުމީ އިދާރާ އިން މިއަދު ލަފާކޮށްފިއެވެ.
އަންނަ ހޯމަ ދުވަހު ފަހު ދިހައެއްގެ ދުވަސްތައް ފެށޭއިރު، އެ ދުވަސްތައް ސަރުކާރުން ވަނީ ބަންދުކޮށްފައެވެ. އެ ބަންދަށް ފަހު، ސަރުކާރު ހުޅުވޭނީ، މި މަހު 22ގައެވެ. އަދި މިއީ ރާއްޖޭގެ ސްކޫލުތައް ވެސް ބަންދު ދުވަސްވަރެކެވެ.
އެހެންވެ، އެ ދުވަސްވަރަށް އަތޮޅުތަކާއި ރާއްޖޭން ބޭރަށް ދަތުރުކުރާ މީހުން އިތުރުވާނެއެވެ.
ބަޔަކު ފުރަން ލޯންޗަށް އަރަނީ — ސަން ފޮޓޯ/ ފަޔާޒް މޫސާ
'ސަން'އިން ސުވާލުކުރުމުން، މެޓުން މިއަދު ބުނީ، އަންނަ އަންގާރަ ދުވަހުން ފެށިގެން ރާއްޖޭގެ އެކި ހިސާބުތަކަށް ދޭތެރެއަކުން ކެރީގެ އަސަރު ކުރާނެ ކަމަށެވެ.
ނަމަވެސް، ޖުމުލަކޮށް މޫސުން އޮންނާނީ ރީތިކޮށް ކަމަށާއި ވައި ޖެހޭ މިންވަރު އާންމު މިންވަރަށް ވުރެ ކުޑަކޮށް މަތިވެދާނެ ކަމަށް އެ އިދާރާއިން ބުންޏެވެ. އަދި، އެ ދުވަސްވަރަށް ކަނޑުތައް ވެސް އާދައިގެ ވަރަކަށް މަޑުވާނެ ކަމަށް މެޓުން ވަނީ ލަފާކޮށްފައެވެ.
މިއަދުގެ މޫސުމަށް ބަލާއިރު، މުޅި ރާއްޖެއަށް އާންމު ގޮތެއްގައި މޫސުން ރަނގަޅުވާނެ ކަމަށް މެޓުން ބުނެފައިވެއެވެ. މިގޮތުން، ހުރިހާ އަތޮޅުތަކަށް ވައި ޖެހޭނީ ތިން މޭލާ ދިހަ މޭލު ބާރުމިނުގައި ކަމަށް މެޓުން ބުނެފައިވެއެވެ. އަދި، ކަނޑުތައް ވެސް މަޑުވާނެ ކަމަށް މޫސުމާ ބެހޭ ގައުމީ އިދާރާއިން ވަނީ ބުނެފައެވެ.