ރަމަޟާންމަހުގެ ފަހު ދިހައިގެ ދުވަސްތަކާ ބައްދަލުކުރާއިރު، މިއީ މާތް ﷲ ޚާއްޞަކުރައްވައިފައިވާ މާތް ދުވަސްތަކެއްކަން ފާހަގަކޮށް، ކުރެވުނު ހެޔޮ ޢަމަލުތަކާ މެދު ވިސްނައި އިތުރަށް ހެޔޮ ޢަމަލުކުރުމުގައި ދެމިތިބުމަށް މިއަދުގެ ހުކުރު ޚުޠުބާގައި ގޮވާލައިފިއެވެ.
ރަޙުމަތުގެ މައްސަރު ވަކިވުމުގެ ވަގުތު ކުޑަތަންވަމުން އަންނައިރު، މި ބަރަކާތްތެރި ދުވަސްތަކުގެ ބޭނުން އެންމެ ފުރިހަމަ ގޮތުގައި ހިފުމަށް ޚުޠުބާގައި ވަނީ ނަސޭހަތްތެރިވެފައެވެ.
ކީރިތި ރަސޫލާ ﷺ ރަމަޟާންމަހުގެ ފަހު ދިހައިގެ ރޭތަކުގައި މާތް ﷲ އަށް ކުއްތަންވެވަޑައިގެން އަޅުކަންކުރެއްވުމުގައި އިތުރަށް ހީވާގިވެވަޑައިގެންނެވިކަން ޚުޠުބާގައި ފާހަގަކުރިއެވެ. އީމާންކަމާ އެކު، ސަވާބަށް އެދޭ ޙާލުގައި ރަމަޟާންމަހު ރޭ އަޅުކަންކޮށްފި މީހާގެ އިސްވެދިޔަ ފާފަތައް ފުއްސެވޭނެކަން ރަސޫލާ ﷺ ޙަދީޘްކުރައްވައިފައިވާކަން ވެސް ޚުޠުބާގައި ހަނދާންކޮށްދިނެވެ.
މީގެ އިތުރުން، އެއް ހާސް މައްސަރަށް ވުރެ ހެޔޮކަން ބޮޑުވެގެންވާ ލައިލަތުލްޤަދުރި ހޯދުމަށް ފަހު ދިހައިގެ އޮނަހިރި ރޭތަކުގައި ގަދައަޅައި މަސައްކަތްކުރުމުގެ މުހިންމުކަމުގެ މައްޗަށް ޚުޠުބާގައި އަލިއަޅުވައިލިއެވެ. އެ ރެޔަކީ އަށްޑިހަ ތިން އަހަރާއި ގާތްގަނޑަކަށް ހަތަރު މަސްދުވަހު މާތް ﷲ އަށް އަޅުކަންކުރުމުގައި ދެމިހުރި މީހަކަށް ލިބޭ ސަވާބާއި ދަރުމަ އެންމެ ރެއަކުން ލިބޭ ރެއެއްކަން ހަނދާންކޮށްދެމުން، އެ ދަރުމަ ޙާޞިލުކުރުމަށް މަސައްކަތްކުރުމަށް މުސްލިމުންނަށް ގޮވާލިއެވެ.
ރަމަޟާންމަހަކީ ދީލަތިކަމާއި ހޭދަކުރުމުގެ މައްސަރުކަން ފާހަގަކޮށް، ފަހު ދިހައިގެ ދުވަސްތަކުގައި ޞަދަޤާތްކުރުން ގިނަކުރުމަށް ވެސް ޚުޠުބާގައި ބާރުއެޅިއެވެ. އަދި މުސްލިމުންގެ މައްޗަށް ފަރުޟުކުރައްވައިފައިވާ ފިޠުރު ޒަކާތް ނެރުމަށް ސަމާލުކަންދީ އެ ކަމަށް އަވަސްވުމަށް ގޮވާލިއެވެ.
މީހަކު މިސްކިތުގައި ދުއާއަށް އަތް ނަގައިގެން ---- ފޮޓޯ/އިސްލާމިކް މިނިސްޓްރީ
ފިޠުރު ޒަކާތް ނެރުމަކީ ކޮންމެ މުސްލިމަކުމެ ކުރާންޖެހޭނޭ ކަމެއްކަމަށާއި، ޢީދު ވިލޭރެއާއި ޢީދު ދުވަހު ޚަރަދުކުރާނެ މިންވަރު ހުރެ އިތުރަށް ހުރި އެއްޗަކުން ތިމާ ޚަރަދުދީ ބަލަހައްޓާ މީހުންނާއި ތިމާގެ އަމިއްލަ ނަފުސުގެ މަތީން ފިޠުރު ޒަކާތް ނެރުން ވާޖިބުވެގެންވާކަން ޚުޠުބާގައި ބަޔާންކުރިއެވެ. އެއީ ބޮލަކަށް ޞާޢެއްގެ މިންވަރުކަމަށާއި، މި ޒަމާނުގެ ގޮތުން ނަމަ އެއީ ދެ ކިލޯ ހަތަރު ސަތޭކަ ގުރާމްކަން ވެސް އޮޅުންފިލުވައިދިނެވެ.
މިއަދު އިސްލާމީ އުންމަތް ހޭދަކުރަމުންދަނީ ތާރީޚުގައި ފާހަގަކޮށްލެވޭ ފަދަ ނުރައްކާތެރި ދުވަސްތަކެއްކަން ފާހަގަކޮށް، އުންމަތުގެ ދުޝްމަނުން މި އުންމަތް ބަލިކަށިކޮށް ބައިބައިކޮށްލުމަށް ގިނަގުނަ މަސައްކަތްތަކެއް ކުރަމުންދާކަމަށް ޚުޠުބާގައި އިންޒާރުދިނެވެ. އުންމަތުގެ ކަންކޮޅުތަކުގައި ލޭއޮހޮރުވައިލައި، އިސްލާމީ ޤައުމުތަކުގެ މެދުގައި ބައިބައިވުން އުފެއްދުމަށް ކުރަމުންދާ މަސައްކަތް ފެންނަމުންދާކަމަށާއި، މުޞީބާތާއި ނުރައްކާތެރިކަންކަމުގެ ކުރިމަތީގައި ކެތްތެރިކަން އިސްކޮށް ޙިކުމަތްތެރިވުމަށް ޚުޠުބާގައި ބާރުއެޅިއެވެ. މި ޙާލަތުގައި އިސްލާމީ އުންމަތް އެއްބައިވަންތަވެ، ސަފުތައް ބަދަހިކޮށް، އިސްލާމީ މަތިވެރި ޢަޤީދާގައި ސާބިތުވުމަށް ގޮވާލިއެވެ.
މިއަދުގެ ޚުޠުބާގެ ފަހު ބައި ޚާއްޞަކޮށްފައިވަނީ ޒުވާނުންނަށެވެ. އުންމަތުގެ މުސްތަޤުބަލަށްޓަކައި، އިސްލާމީ ޙަޟާރަތު އަލުން އިޢާދަކުރުމަށް އަދުގެ ޒުވާން ޖީލު އިޚުލާޞްތެރިކަމާއެކު ޢަޒުމް ކަނޑައެޅުމަށް ގޮވާލިއެވެ. އަދި މަސްތުވާތަކެއްޗާއި ދުންފަތުގެ އިސްތިޢުމާލުކުރުމާއި ނޭއްގާނީ ޢަމަލުތަކުން އެއްކިބާވެ، ޖަމާޢަތުގައި ނަމާދުކުރުމަށް ފަރުވާތެރިވުމަށް ނަސޭހަތްތެރިވިއެވެ. މީގެ އިތުރުން، މިއީ ޢިލްމުގެ ޤަރުނުކަން ފާހަގަކޮށް، އިސްލާމީ ސަޤާފަތާއި ޙަޟާރަތު އިޢާދަވެ މުސްލިމުންނަށް ޢިއްޒަތާއި ޝަރަފު ލިބޭނީ ދެ ޖިންސުގެ މުސްލިމު ޒުވާނުން ޢިލްމާއި ފަންނިއްޔާތުގައި ކުރިއަރައިގެންކަމަށް ޚުޠުބާގައި ވަނީ ބުނެފައެވެ.