ސީރިއާ ހަނގުރާމައަށް ގޮސް، ތުރުކީގައި ތާށިވެފައި ތިބި ދިވެހި އަންހެނަކާއި އޭނާގެ 14 އަހަރުގެ ދަރިފުޅު ރާއްޖެ ގެނެސް ރިހެބިލިޓޭޓް ކުރުމުގެ މަސައްކަތް ފަށާފައިވާ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އިހުސާން ވިދާޅުވީ ސީރިއާ ހަނގުރާމައަށް ރާއްޖެއިން ގޮސް ތިބި ބައެއް މީހުންނާއި އެމީހުންގެ އާއިލާ ބައެއް މީހުން ރާއްޖެ ނާދެވި، ހާލުގައި ޖެހިފައި އެބަތިބި ކަމަށެވެ. އެގޮތުން ސީރިއާއަށް ގޮސް ތިބި 60 ވަރަކަށް މީހުން ގެނައުމުގެ މަސައްކަތާއި ބައެއް އެހެން ގައުމުތަކުގައި ވެސް ހަނގުރާމައަށް ގޮސް ތާށިވެފައި ތިބި މީހުން ގެނައުމުގެ މަސައްކަތް މިހާރު ކުރަމުންދާ ކަމަށް އިހުސާން ވިދާޅުވިއެވެ.
އިހުސާން ވިދާޅުވި ގޮތުގައި އެގޮތަށް ހަނގުރާމައަށް ގޮސް ތިބި ތިން މީހަކު ތުރުކީއަށް ގޮސް އެތަނުގައި ތާށިވެފައި ތިބި ކަމުގެ މައުލޫމާތު ލިބުމާއެކު އެ މީހުން ރާއްޖެ ގެނައުމުގެ މަސައްކަތް ވަނީ ކޮށްފައެވެ.
އެގޮތުން 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ ރާއްޖެ ގެނެސް ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރު (އެންއާރުސީ)ގައި މިހާރު ފަރުވާދެމުން އަންނަ ކަމަށް މިނިސްޓަރު ވިދާޅުވިއެވެ.
ސަރުކާރުން މިއަހަރު ވަނީ، ދިވެހީން ސީރިއާއަށް ދަތުރުކުރުން ހުއްދަކޮށް، ސީރިއާގައި މިހާރު ވެރިކަން ކުރަމުން އަންނަ ޙަޔާތު ތަޙްރީރުއްޝާމް (އެޗްޓީއެސް) ރާއްޖޭން ކަނޑައަޅާފައިވާ ޓެރަރިސްޓު ޖަމާއަތްތަކުގެ ލިސްޓުން އުނިކޮށްފައެވެ.
ކޮންމެ އަހަރަކު އެއްފަހަރު އާންމުކުރާ އެ ލިސްޓުގައި، ދިވެހީން ދަތުރުކުރުން މަނާ ސަރަހައްދެއްގެ ގޮތުގައި ސީރިއާ ކަނޑައެޅީ އޮކްޓޯބަރު 31، 2019ގައެވެ. އެއީ ޖިހާދު ކުރުމުގެ ނަމުގައި އެ ގައުމުގައި ހިނގަމުން ދިޔަ ހަނގުރާމައިގައި ބައިވެރިވުމަށް އެތައް ދިވެހީންނެއް އެ ގައުމަށް އޭރު ގޮސް އުޅޭތީއެވެ.
ނަމަވެސް މިހާރު އެ ލިސްޓުން ސީރިއާ އުނިކޮށްފައިވާތީ ދިވެހީން އެ ގައުމަށް މިހާރު ގޮސް އައިސް އުޅުމަކީ ކުށެއް ނޫނެވެ.
ނަމަވެސް ދިވެހީން ސީރިއާއަށް ދަތުރުކުރުން ހުއްދަކުރި ނަމަވެސް، ދިވެހި ސަރުކާރުން މިހާރުގެ ސީރިއާ ސަރުކާރު ބަލައިގަތުމުގެ ކުރިން އެ ގައުމަށް ދިޔަ މީހުންނަށް ފިޔަވަޅު އަޅާނެ ކަމަށް މީގެކުރިން ހޯމް މިނިސްޓްރީން ބުންޏެވެ.
މި ސަރުކާރުން 2024 ވަނަ އަހަރުގެ ޖެނުއަރީ މަހު ވަނީ, ސީރިއާއަށް ހަނގުރާމައަށް ދިޔަ މީހުންގެ ތެރެއިން ދިވެހި ފަސް އާއިލާއެއް އެނބުރި އަންނަން ބޭނުންވުމުން، އެ 21 މީހުން ރާއްޖެ ގެނެސްފައެވެ. އެ މީހުން ރާއްޖެ ގެނެސް ގެންދިޔައީ, ނެޝަނަލް ރީއިންޓެގްރޭޝަން ސެންޓަރަށެވެ.
ފާހަގަކުރެވޭ ގޮތުގައި، ރާއްޖޭން ކަނޑައަޅާފައިވާ ޓެރަރިސްޓު ޖަމާއަތްތަކުގެ ލިސްޓަށް ބަދަލު ގެނެސް އެ ލިސްޓުން ސީރިއާގައި މިހާރު ވެރިކަންކުރާ އެޗްޓީއެސް އުނިކުރީ، އެމެރިކާ ހިމެނޭހެން ދުނިޔޭގެ ގިނަ ގައުމުތަކުން ސީރިއާގެ މިހާރުގެ ވެރިކަން ބަލައިގަންނަ ފަދަ މޭރުމަކުން ނިންމުންތައް ނިންމަމުންދާ ދަނޑިވަޅެއްގައެވެ.
އެޗްޓީއެސްއަކީ ސީރިޔާގައި ހަރަކާތްތެރިވި ހަނގުރާމަވެރި ޖަމާއަތެކެވެ. މި ޖަމާއަތަކީ ކުރިން އަލްޤައިދާއާ ގުޅުން އޮތް ޖަބްހަތުއްނުސްރާގެ ނަމުގައި މަޝްހޫރުވި ޖަމާއަތް ހިމެނޭހެން، ސީރިޔާގެ އެކި އިދިކޮޅު ފެކްޝަންތައް އެއްވެގެން 2017 ވަނަ އަހަރު އުފެދުނު އިއްތިހާދެކެވެ.
މި ޖަމާއަތުގެ މައިގަނޑު މަގްސަދަކީ ބައްޝާރުލް އަސަދުގެ ސަރުކާރު ވައްޓާލައި، އިސްލާމީ އުސޫލުތަކުގެ މައްޗަށް ބިނާވެފައިވާ ދައުލަތެއް ގާއިމުކުރުމެވެ. އެގޮތުން 2024ވަނަ އަހަރުގެ ފަހުކޮޅު، މި ޖަމާއަތް އިސްވެ އޮވެ ދިން ވަރުގަދަ ހަމަލާތަކަކަށްފަހު، ސޫރިޔާގެ ވެރިރަށް ދިިމިޝްގު ހިމެނޭހެން ބޮޑެތި ސިޓީތައް ވަނީ އެ މީހުންގެ ބާރުގެ ދަށަށް ގެނެސްފައެވެ. އެއާއެކު ބައްޝާރުލް އަސަދުގެ ދިގު ވެރިކަން ވެސް ވަނީ ނިމުމަކަށް އައިސްފައެވެ.
އެމެރިކާ އާއި އދ. ފަދަ ބައެއް ފަރާތްތަކުން ކުރިން މި ޖަމާއަތަކީ ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައި އޮތް ނަމަވެސް، މިހާރަކަށްއައިސް އެ ޖަމާއަތުން ދަނީ އެ މީހުންނަކީ ހަމައެކަނި ސީރިޔާގެ މައްސަލަތަކަށް އިސްކަންދޭ، މެދުމިންގަނޑެއްގެ ސިޔާސަތުތަކެއް ގެންގުޅޭ ބައެއްގެ ގޮތުގައި ދެއްކުމަށް މަސައްކަތް ކުރަމުންނެވެ.
މިހާރު ސީރިޔާގައި އުފެދިފައިވާ އިންތިގާލީ ސަރުކާރުގައި މި ޖަމާއަތުން މުހިންމު ދައުރެއް އަދާކުރެއެވެ.
ސީރިއާއަށް ދަތުރުކުރަން ހުއްދަދިންއިރު، އެއީ ޖިހާދުގެ ނަމުގައި ބައެއް ދިވެހީން ދަތުރުކޮށް ދާޚިލީ ހަނގުރާމައިގައި ބައިވެރިވާން ދިޔަ ގައުމެކެވެ. ބައެއް ދިވެހީން އެ މީހުންގެ އަނބިދަރިން ވެސް ގެންދިޔައިރު، އެ ތަނުގައި ދަރީން ލިބި، ފަހުން ފިރިން މަރުވެ ނިކަމެތި ހާލުގައި ވެސް އުޅެން ޖެހުނެވެ. އަދި އޭގެ ސަބަބުން އެ މީހުން ނިސްބަތްވާ ގިނަ އާއިލާތަކަކަށް ރާއްޖޭގައި ވެސް އެ ކަމުގެ ދެރައާއި ނިކަމެތިކަން ލިބުނެވެ.