ރެއިން ފެށިގެން މާލޭން ގެއްލިފައިވާ އަންހެނަކު ހޯދަން ފުލުހުން އިއުލާނުކޮށްފިއެވެ.
ފުލުހުން ބުނީ، ގެއްލިގެން ހޯދަމުންދަނީ ޅ. ނައިފަރު / ކަށިމާގެ، އުމުރުން 32 އަހަރުގެ ފާޠިމަތު ނޫރާ ކަމަށެވެ.
ނޫރާގެ އާއިލާއާ ހަވާލާދީ ފުލުހުން މިއަދު ބުނީ، ރޭ އަށެއް ޖަހާކަންހާއިރު ނޫރާ ގެއިން ބޭރަށް ދިޔަފަހުން ޚަބަރެއްނުވެ ގެއްލިފައިވާ ކަމަށް، ދަންވަރު 12:19 ހާއިރު އާއިލާއިން ފުލުހަށް މައުލޫމާތުދީފައިވާ ކަމަށެވެ.
އެހެންވެ، ފުލުހުންގެ ކަމާގުޅުންހުރި ބަހާތަކާ އެ މައުލޫމާތު ހިއްސާކޮށް، ނޫރާ ހޯދުމުގެ މަސައްކަތް ކުރަމުން އަންނަ ކަމަށް ފުލުހުން ބުންޏެވެ. ނަމަވެސް މިހާތަނަށް ކުރި މަސައްކަތުން އޭނާ އަދި ފެނިފައިނުވާ ކަމަށް، ފުލުހުން މައުލޫމާތު ދެއެވެ.
ފުލުހުން ވަނީ، ނޫރާއާ ބެހޭ އެއްވެސް މައުލޫމާތެއް ލިބިފައިވާނަމަ، ފުލުހުންގެ ގަލޮޅު ސްޓޭޝަނުގެ ނަންބަރު 9631696 އަށް، ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅައި މައުލޫމާތު ހިއްސާކުރަން އެދިފައެވެ.
ފާހަގަކޮށްލެވޭ ގޮތުގައި މީގެކުރިން އާއްމުކޮށް ގެއްލިގެން ހޯދަން އިއުލާނުކުރާ މީހުން ވަރަށް އަވަހަށް ފެނިފައި އެބަހުއްޓެވެ.