ޖަރުމަނުވިލާތުގެ ވެރިރަށް ބާލިންގައި މިހާރު ކުރިއަށްދާ ފަތުރުވެރިކަމުގެ ދާއިރާގެ އެންމެ ބޮޑު ޓްރޭޑް މައުރަޒުކަމަށްވާ އައިޓީބީ ބާލިންގައި، ރާއްޖެ އަންނަ ފަތުރުވެރިންނަށް ފައިސާގެ މުއާމަލާތްތައް ފަސޭހަކުރުމަށްޓަކައި ގައުމީ ބޭންކު ބީއެމްއެލްގެ ޑިޖިޓަލް ވޮލެޓު "ސްވައިޕް" ތައާރަފްކުރާނެކަން، ވިޒިޓް މޯލްޑިވްސް ކޯޕަރޭޝަން (ވީއެމްސީ)އިން މިއަދު ހާމަކޮށްފިއެވެ.
ވިޒިޓް މޯލްޑިވްސް ކޯޕަރޭޝަނުން ބުނީ، މިއަދުން ފެށިގެން އަންނަ ބުރާސްފަތި ދުވަހުގެ ނިޔަލަށް ކުރިއަށްދާ އައިޓީބީ ބާލިން ފެއާގައި ވިލާތުގެ ގައުމުތަކުގެ ބޮޑެތި ޓުއާ އޮޕަރޭޓަރުންނާއި އެއާލައިންތަކާއި ފަތުރުވެރިކަމުގެ ދާއިރާގެ އިސް ފަރާތްތަކާ ގުޅުން ބަދަހިކުރުމަށް "މޯލްޑިވިއަން ނައިޓް"ގެ ނަމުގައި ހަފުލާއެއް އޮންނާނެ ކަމަށެވެ.
ބީއެމްއެލާ ގުޅިގެން ބާއްވާ އެ ހަފުލާގައި، ރާއްޖެއަށް ޒިޔާރަތްކުރާ ފަތުރުވެރިންނަށް ފައިސާގެ މުއާމަލާތްތައް ފަސޭހަކޮށްދިނުމަށް "ސްވައިޕް" ވޮލެޓު ތައާރަފްކުރާނެ ކަމަށް އެ ކޯޕަރޭޝަނުން ބުންޏެވެ.
މީގެ އިތުރުން އައިޓީބީ ފެއާގައި ދިވެހި ފަތުރުވެރި ސިނާއަތުގެ މުސްތަގުބަލާ ގުޅުންހުރި މުހިންމު ބައެއް ކަންކަން އިއުލާނުކުރާނެ ކަމަށް، ވީއެމްސީން ބުންޏެވެ.
ވީއެމްސީން ބުނީ، ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 67 ކުންފުންޏަކުން މިއަހަރުގެ މައުރަޒުގައި ބައިވެރިވާ ކަމަށެވެ.
އައިޓީބީ ފެއާގައި ރާއްޖެ އިޝްތިހާރުކުރަން ފަށައިފި--- ފޮޓޯ: ވިޒިޓް މޯލްޑިވްސް ކޯޕަރޭޝަން
މި މައުރަޒުގައި ގާއިމްކޮށްފައިވާ ރާއްޖޭގެ ސްޓޭންޑުގައި ދިވެހި ސަގާފަތުގެ އެންމެ މުހިންމު އެއް ބަހާ ކަމަށްވާ ކާބޯތަކެތީގެ މުއްސަނދިކަން ދައްކާލެވޭނެ ކަމަށާއި، ބައިނަލްއަގުވާމީ މީޑިއާތަކަށް ޚާއްސަކޮށް ބާއްވާ ނޫސްވެރިންގެ ބައްދަލުވުމުގައި އަންނަ އަހަރު ރާއްޖޭގެ ފަތުރުވެރިކަން ކުރިއެރުވުމަށް ކުރާނެ މުހިންމު ކަންކަން އިއުލާނުކުރާނެ ކަމަށް އެ ކޯޕަރޭޝަނުން ބުންޏެވެ.
ފާހަގަކުރެވޭ ގޮތުގައި، ވިޒިޓް މޯލްޑިވްސްގެ ރަސްމީ ވޮލެޓުގެ ގޮތުގައި "ސްވައިޕް" ހަމަޖެއްސީ ބީއެމްއެލްގެ މައި އިދާރާގައި ބޭއްވި ރަސްމިއްޔާތެއްގައެވެ.
ބީއެމްއެލްގެ ފަރާތުން މި އެއްބަސްވުމުގައި ސޮއިކުރެއްވީ އެ ބޭންކުގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފެވެ. އަދި ވިޒިޓް މޯލްޑިވްސްގެ ފަރާތުން އެއްބަސްވުމުގައި ސޮއިކުރެއްވީ ސީއީއޯ އަދި މެނޭޖިން ޑިރެކްޓަރު އިބްރާހީމް ޝިއުރީއެވެ.
ސްވައިޕްއަކީ ދިވެހީން އުފައްދައި ތަރައްގީކޮށްފައިވާ 100 ޕަސެންޓު ދިވެހި އުފެއްދުމެކެވެ. މި ޑިޖިޓަލް ވޮލެޓް ފަރުމާކޮށްފައިވަނީ ރާއްޖޭގެ އިތުރުން، ފައިސާގެ މުއާމާލާތް ހިންގުމުގައި ކަނޑައަޅާފައިވާ ބައިނަލްއަގުވާމީ ޝަރުތުތަކާއި މިންގަނޑުތަކަށް ފުރިހަމައަށް ފެތޭ ގޮތަށް ކަމަށް ބީއެމްއެލްއިން ބުނެއެވެ.
ސްވައިޕް ވޮލެޓް މެދުވެރިކޮށް ރާއްޖެއާއި ރާއްޖެއިން ބޭރުގެ މުއާމަލާތްތައް ކުރެވޭނެއެވެ. އަދި ބީއެމްއެލް އެކައުންޓްތަކުގެ އިތުރުން ކޮންމެ ކްރެޑިޓް، ޑެބިޓް އަދި ޕްރިޕެއިޑް ކާޑަކުންވެސް ސްވައިޕް ވޮލެޓަށް ފައިސާ ޖަމާކުރެވޭނެ ކަމަށް ބީއެމްއެލްއިން ވަނީ ބުނެފައެވެ.
ނިމިދިޔަ ޖަނަވަރީ މަހު ލިމިޓެޑް ރިލީޒަށް ހުޅުވާލުމަށް ފަހު ސްވައިޕް ބޭނުންކުރާ ފަރާތްތަކަށް މި ވޮލެޓުގެ މައިގަނޑު ފީޗާތައް ތަޖުރިބާ ކުރުމުގެ ފުރުސަތު ވަނީ ދީފައެވެ. އެގޮތުން ޕާސަން ޓު ޕާސަން ޓްރާންސްފާތަކާއި ކިއުއާރް ޕޭމަންޓް އަދި އެކައުންޓުން ކުރާ ޚަރަދުތަކުގެ ތަފާސްހިސާބުތައް އަމިއްލައަށް ބަލައިލެވޭނެ ގޮތާއި، ޕޭމަންޓް ލިންކް ޝެއާކޮށް، ފަސޭހައިން ޓޮޕްއަޕްކޮށް ފައިސާ ނެގުން ފަދަ ޚިދުމަތްތައް ބޭނުން ކުރުމުގެ ފުރުސަތުވަނީ ކަސްޓަމަރުންނަށް ހުޅުވައިލާފައެވެ.
ވިޒިޓް މޯލްޑިވްސްއިން ބުނީ މި އެއްބަސްވުމަކީ މިދިޔަ އަހަރު ބޭންކް އޮފް މޯލްޑިވްސް އާއި ވިޒިޓް މޯލްޑިވްސްއާ ދެމެދު ގާއިމުކުރި ސްޓްރެޓިޖިކް ޕާޓްނާޝިޕްގެ ދަށުން ވެފައިވާ އެއްބަސްވުމެއް ކަމަށެވެ.
މި ޕާޓްނާޝިޕްގެ މަގްސަދަކީ ފަތުރުވެރިކަމުގެ ދާއިރާގައި ޑިޖިޓަލް ކުރިއެރުންތައް އަވަހަށް ފޯރުކޮށްދިނުމާއި، މަސައްކަތުގެ ހިންގުން ހަރުދަނާކުރުމުގެ އިތުރުން، ބައިނަލްއަގުވާމީ މައިދާނުގައި ރާއްޖޭގެ ފަތުރުވެރިކަމުގެ ސިނާއަތުގެ މަގުބޫލުކަން އިތުރުކުރުން ކަމަށް ވިޒިޓް މޯލްޑިވްސްއިން ބުނެއެވެ.