ދިވެހިރާއްޖޭގައި މިހާރު އެންމެ ބާރަށް ކުރިއަރަމުން އަންނަ އެއް ކުޅިވަރަކީ ވޮލީބޯޅައޭ ބުނުމުން ދޮގަކަށް ނުވާނެއެވެ. ދިވެހީންގެ މެދުގައި އެންމެ މަގުބޫލު ކުޅިވަރު ފުޓްބޯޅައާއި، މިހާރު މަގުބޫލުވަމުން އަންނަ ފުޓްސަލަށް ފަހު، ދެން ގިނަ މީހުންގެ މެދުގައި ރާއްޖޭގައި އެންމެ މަގުބޫލު އެއް ކުޅިވަރަކީ ވޮލީބޯޅައެވެ.
ކޮންމެއަކަސް، ރާއްޖޭގައި ވޮލީގެ މުސްތަގުބަލު ފެންނަނީ އުޖާލާކޮށެވެ. އެގޮތުން ވޮލީގައި ޒުވާން ކުޅުންތެރިން އަންނަނީ ތަފާތު ދައްކަމުންނެވެ.
އޭގެ ތެރެއިން އެއް ކުޅުންތެރިއަކީ ތ. މަޑިފުށްޓަށް އުފަން، އުމުރުން ވިހި އަހަރުގެ މާޔާ ޙުސައިން ޞަލާޙެވެ. މިވަގުތު މާޔާ ކުޅެމުން އަންނަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގައި އައުޓްސައިޑް އެޓޭކަރަކަށެވެ. އުމުރުން ކިތަންމެ ހަގަސް، ކުރިއަށް އޮތް ތަނުގައި ވޮލީން ތަފާތު ދައްކާނެ އެއް ކުޅުންތެރިޔަކީ މާޔާއެވެ.
އުމުރުން އެންމެ 17 އަހަރުގައި މާޔާގެ ހުނަރަށް ސަމާލުކަން ލިބެން ފެށީ އޭނާގެ އެންމެ ފުރަތަމަ ބޮޑު ކުލަބު ކަމަށްވާ ވޭސްޓް މެނޭޖްމެންޓް ކޯޕަރޭޝަން (ވެމްކޯ)ގެ ކުލަބަށް ކުޅެން ފެށި ހިސާބުންނެވެ.
މާޔާ (މ)، ގައުމީ ވޮލީ ޓީމާއެކު އުފާފާޅުކުރަނީ --- ފޮޓޯ: އިސްމާޢީލް ޠާރިޤް / އިމޭޖަސްއެމްވީ
"އެންމެ ފުރަތަމަ ފެށުނުއިރު އެންމެ ބޮޑު ސަޕޯޓެއް ލިބުނީ [ގައުމީ ޓީމުގެ ކުރީގެ ކުޅުންތެރިޔާ، އަދި ވޮލީބޯޅައިގައި އޭރު އެންމެ މޮޅު ކުޅުންތެރިޔާ އަޙްމަދު ޢަބްދުލްކަރީމް] ލޯންގޭ، އެންމެ ފުރަތަމަ ޗާންސެއް ހޯދައިދިނީ ވެމްކޯއިން [އޭރުގެ މަޝްހޫރު ކުޅުންތެރިޔާ] ނިޒާރު [އިބްރާހީމް] ކޯޗާއި އަދީލް ކޯޗާ،" ވެމްކޯއިން އެންމެ ފުރަތަމަ ސަމާލުކަން ލިބުނު މާޔާ ބުންޏެވެ.
ޝައުގުވެރިކަން އުފެދުނީ މަންމަ ކުޅޭތަން ފެނުމުން، ބޮޑު މުބާރާތެއް ކުޅުނީ ފުރާވަރުގައި
ވަރަށް ކުރުކޮށް މާޔާ 'ސަން'އަށް ކިޔައިދިން ގޮތުގައި، ވޮލީބޯޅައަށް އެންމެ ފުރަތަމަ ޝައުގުވެރިކަން އުފެދުނީ މާޔާ ކުޑައިރު، އޭނާގެ މަންމަ ވޮލީ ކުޅެން ގޮސް އުޅުމުގެ ތެރޭ، މަންމަ ވޮލީ ކުޅޭތަން ފެނިގެންނެވެ.
"އެންމެ ފުރަތަމަ މާޔާ ކުޑައިރު މަންމަމެން ކުޅެން ދާނެ، އޭރު ހުންނާނީ ބަލަން، އެގޮތަށް އެތަނުގަ ހުރެގެން ޗާންސް ލިބުނީ އަރަން އަސްލު އިންޓްރެސްޓް އުފެދުނީ ކުޅެން،"
އޭނާ އެންމެ ފުރަތަމަ ބޮޑު މުބާރާތެއް ކުޅުނުއިރު، އުމުރުން އެންމެ 14 އަހަރެވެ، އޭރު މާޔާ ކުޅުނީ އުފަން ރަށް ތ. މަޑިފުށްޓަށް، އަތޮޅު މުބާރާތުގައެވެ.
ސްކޫލު ދައުރުގައި ހޭންޑްބޯޅައާއި ފުޓްސަލްވެސް ކުޅުނު މާޔާ އޭރުވެސް ކުޅިވަރަށް ޝައުގުވެރިކަން ހުއްޓެވެ. އެކަމަކު އޭނާގެ ޝައުގު ވޮލީބޯޅައަށް ހުއްޓި، ފަހުން ވޮލީއަށް ހުސްވީއެވެ. މިހާރު ގައުމީ ޓީމަށް ކުޅެމުން އަންނަ އެންމެ ޒުވާން އެއް ކުޅުންތެރިޔާ މާޔާ ބުނީ، އޭނާގެ އަމާޒަކީ އެންމެ މަތީ ފަންތީގައި ކުޅެ، ވޮލީގައި ދިވެހިރާއްޖެ ތަމްސީލުކުރުން ކަމަށެވެ.
މާޔާ، މިދިޔަ އަހަރު އޮތް ކާވާ މުބާރާތުގައި --- ފޮޓޯ: ނައުޝަމް ވަޙީދު / އިމޭޖަސްއެމްވީ
ގައުމީ ޓީމުގެ ސަމާލުކަން ލިބުނުއިރު، އުމުރުން އެންމެ 15 އަހަރު
ކްލަބް ވެމްކޯއިން މާޔާ ފާހަގަވި ނަމަވެސް، ގައުމީ ވޮލީޓީމުގެ ލޮލުގައި މާޔާ އަޅައިގަތީ އޭނާގެ އުމުރުން އެންމެ 15 އަހަރުގައެވެ. އޭރު މާޔާ ދިޔައީ ރަށު ސްކޫލުގައި ގްރޭޑް ނުވައެއްގައި ކިޔަވަމުންނެވެ.
ރަށުން ސާނަވީ ތައުލީމު ފުރިހަމަކުރުމަށްފަހު މަތީ ތައުލީމު ހާސިލުކުރުމަށްޓަކައި މާޔާ މާލެ ބަދަލުވިއިރު އުމުރުން 16 އަހަރެވެ. މާޔާއަށް ލިބުނު ފުރުސަތުގައި އޭނާ ވެމްކޯގެ ކުލަބާ 2022ވަނަ އަހަރު ގުޅުނެވެ. އޭގެ ފަހުން 2023ވަނަ އަހަރު ބެންޗުން ފަށައި، 2024ވަނަ އަހަރު އެސޯސިއޭޝަން ކަޕުގައި ކުޅެ، އެންމެ މޮޅު އޮޕޮޒިޓް ޕްލެޔަރުގެ މަގާމު ހޯދިއެވެ.
މާޔާއަށް ގައުމީ އަންހެން ވޮލީޓީމުގެ ސްކޮޑުން އެންމެ ފުރަތަމަ ޖާގަ ލިބުނީ 2023ވަނަ އަހަރު، ރާއްޖޭގައި ބޭއްވި ފޯ ނޭޝަންސް ކަޕަށް އެކުލަވާލި ޓީމުންނެވެ. އެއަށްފަހު ގައުމީ ޓީމުގައި ބަރާބަރަށް ހިމެނި، އަންނަނީ ފަރިތަކުރަމުންނެވެ.
މާޔާ ބުނީ، ވޮލީގެ ކަންކަން ރަނގަޅުކުރުމަށް ވޮލީބޯޅަ އެސޯސިއޭޝަނުން މަސައްކަތްތައް ކުރަމުން އަންނަ ކަމަށާއި، ބައެއް ކަންކަން ރަނގަޅުވެސް ކޮށްފައިވާ ކަމަށެވެ. ނަމަވެސް މާޔާ ދެކޭގޮތުގައި ރާއްޖޭން ބައިވެރިވާ ބައިނަލްއަގުވާމީ މުބާރާތްތައް އަދި މަދެވެ.
އޭގެ އިތުރުން، ކުޅުންތެރިންގެ ހުނަރު ތަރައްގީކޮށް، ކުރިއަރުވަން ބޭނުންވާ ވަސީލަތްތައް ނެތުމަކީވެސް މާޔާގެ ކަންބޮޑުވުމެކެވެ.
"އަސްލު ނުލިބެނީ އިންޑޯ [ކޯޓު]، ކުޅުންތެރިން ކުރިއަރުވަން ޖިމް ނުލިބެނީ، ފެސިލިޓީސްތައް މަދީ، ދެން އެކަމަކު މިހާރު ވީއޭއެމުން (ވޮލީބޯޅަ އެސޯސިއޭޝަނުން) ވެސް އެބަ މަސައްކަތްކުރޭ ހުރިހާ ކަމެއް ރަނގަޅުކުރަންވެގެން،"
މާޔާ ބުނީ، ބައިނަލްއަގުވާމީ ކުލަބަކުން ފުރުސަތު ލިބިއްޖެނަމަ އެ ފުރުސަތުގެވެސް ބޭނުންހިފައި ވޮލީގައި ކުރިއަށްދާން މަސައްކަތްކުރާނެ ކަމަށެވެ.