ރާއްޖޭގެ އެންމެ ދެކުނަށް އޮންނަ އައްޑޫ ސިޓީގައި މުދާ އުފުލާ ބޯޓުތައް މަޑުކުރުމަށް ޓްރާންސްޝިޕްމެންޓް ބަނދަރެއް ހަދައި، އެ އަތޮޅު ހިމެނޭ ގޮތަށް ގްރީން އިކޮނޮމިކް ކޮރިޑޯއެއް ހަދަން ކުރީގެ ރައީސް މުޙައްމަދު ނަޝީދުގެ ވިސްނުންފުޅު މިއަދު ހިއްސާކުރައްވައިފިއެވެ.
ނަޝީދު އެކްސްގައި އާންމުކުރެއްވި ވީޑިއޯއެއްގައި ވިދާޅުވީ، އައްޑުއަށް ލިބިފައިވާ އެންމެ ބޮޑު ނިއުމަތަކީ އެ އަތޮޅު ގުދުރަތީ ގޮތުން އުފެދިފައި އޮތް ތަން ކަމަށް ގަބޫލުކުރައްވާ ކަމަށެވެ. އެގޮތުން އައްޑޫ އޮތީ އިންޑިއާ ކަނޑުގެ ސީދާ މެދުގައި ކަމަށްވާއިރު، އެއްކޮޅުގައި އެފްރިކާ އަދި އަނެއްކޮޅުގައި އިންޑޮނޭޝިއާއާއި މެލޭޝިއާއާއި ސިންގަޕޫރު ފަދަ ގައުމުތައް އޮތްކަން އެ މަނިކުފާނު ފާހަގަކުރެއްވިއެވެ.
ނަޝީދު ވިދާޅުވީ ދުނިޔޭގެ އެކި ސަރަހައްދުތަކުން އުފުލާ ވަރަށް ގިނަ މުދާ އުފުލަނީ އިންޑިއާ ކަނޑު ހުރަސްކޮށް ކަމަށްވާއިރު، އައްޑޫ ހިމެނޭ ގޮތަށް ގްރީން އިކޮނޮމިކް ކޮރިޑޯއެއް ހެދުމުގެ ވިސްނުންފުޅު ގެންގުޅުއްވަނީ އެހެންވެ ކަމަށެވެ.
"މި ކޮރިޑޯ ފަށަން އެންމެ ރަނގަޅު ތަނެއް ކަމަށް އަޅުގަނޑަށް ފެންނަނީ މޮމްބާސާ، ކެންޔާ ދެން އައިސް އައްޑޫން ގޮސް ނިންމަން ޖަކާޓާ، އިންޑޮނޭޝިއާ،" އެ މަނިކުފާނު ވިދާޅުވިއެވެ.
ނަޝީދު ވިދާޅުވީ، އެ މަނިކުފާނަށް ފެނިވަޑައިގަންނަވަނީ އެ ދެ ސަރަހައްދުން ބޯޓުތަކަށް އާދެވޭ ގޮތަށް އައްޑޫގައި ޓްރާންސްޝިޕްމެންޓް ބަނދަރެއް ހަދަން ކަމަށެވެ. އެގޮތުން، އިރުމަތީ އެފްރިކާގެ ގައުމުތަކުން، ޚާއްސަކޮށް ކެންޔާއާއި ސޯމާލިއާގެ ބަނދަރުތަކުން ބޯޓުފަހަރު ގެނެވޭނެ ކަމަށް އެ މަނިކުފާނު ވިދާޅުވިއެވެ.
ހަމަ އެއާއެކީގައި ޖަކާޓާއިން ވެސް ހަމަ އެ ސައިޒުގެ ބޯޓުފަހަރު އައްޑުއަށް އައިސް މުދާ ބަހައްޓައިފައި އައްޑޫއިން، އެފްރިކާއިން ގެނައި މުދާ ހިފައިގެން އަނބުރާ ޖަކާޓާއަށް ދިޔުން އަދި އެފްރިކާއަށް ދާ ބޯޓުފަހަރު ވެސް އަނބުރާ ދާ ދަތުރުގައި ޖަކާޓާއިން ގެނައި، އައްޑޫގައި ބަހައްޓައިފައި ހުރި މުދަލާ އެކުގައި ދިޔުން
ކުރީގެ ރައީސް މުހައްމަދު ނަޝީދު
ނަޝީދު ވިދާޅުވީ އެއީ ''ގްރީން ކޮރިޑޯއެއް''ގެ ގޮތުގައި ސިފަކުރައްވަނީ، އެ ތަން ހިންގުމުގައި ހުރިހާ މަސައްކަތެއް ވެސް އިޔާދަކުރަނިވި ހަކަތަ ބޭނުންކޮށްގެން ކުރިއަށްގެންދިޔުމަށް ކަމަށެވެ. އެގޮތަށް މަސައްކަތް ބައްޓަންކޮށް، އެ ސަރަހައްދަކީ ގްރީން އިކޮނޮމިކް ކޮރިޑޯއެއްގެ ގޮތުގައި އައްޑޫން މުޅި ދުނިޔެއަށް އިއުލާންކުރުމަށް އެ މަނިކުފާނު ޚިޔާލު ދެއްވިއެވެ.
ނަޝީދު ވިދާޅުވީ އެ މަނިކުފާނު ދާދި ފަހުން ކެންޔާގެ ރައީސް ވިލިއަމް ރޫޓޯއާ ބައްދަލުކުރައްވައި، އެ އިކޮނޮމިކް ކޮރިޑޯއާ ގުޅޭ ގޮތުން ވާހަކަދެއްކެވި ކަމަށެވެ. އަދި އެ ވާހަކަފުޅަށް އިޖާބަ ދެއްވައި، ކެންޔާގެ ރައީސް ހުންނެވީ ފީސިބިލިޓީ ޓެސްޓެއް ހަދަން ތައްޔާރަށް ކަމަށް ވެސް އެ މަނިކުފާނު ވިދާޅުވިއެވެ.
"އަދި ކެންޔާގެ ރައީސް ވަނީ އެ ބޭފުޅާގެ ވަޒީރުންގެ އަރިހުގައި އެކަމައިގެން އުޅުމަށް ވިދާޅުވެސް ވެފައި. މިހާރު އަޅުގަނޑު ދެން މި ޖެހޭނީ ރާއްޖޭގެ ބޭފުޅުންނާއި އަދި ޖަކާޓާއިންނާއި މިކަމުގައި އެއްބާރުލުން ހޯދަން،" ނަޝީދު ވިދާޅުވިއެވެ.
އެ މަނިކުފާނު ވިދާޅުވީ އެ ވާހަކަފުޅު އައްޑޫ ސިޓީގެ މޭޔަރު އަލީ ނިޒާރާ ވެސް ހިއްސާކުރެއްވި ކަމަށާއި، ނިޒާރު ހުންނެވީ އެކަމުގައި އިސްނަންގަވަން ތައްޔާރަށް ކަމަށެވެ.
ރާއްޖޭގައި މީގެ ކުރިން އެކި ވެރިކަންތަކުގައި، ގައުމުގެ އުތުރުގައި ޓްރާންސްޝިޕްމަންޓް ބަނދަރެއް ހެދުމަށް މަޝްވަރާކޮށްފައިވެއެވެ. އޭގެ ތެތޭގައި ކުރީގެ ރައީސް މައުމޫން އަބްދުލްގައްޔޫމާއި ކުރީގެ ރައީސް އަބްދުالله ޔާމީނާއި ކުރީގެ ރައީސް އިބްރާހީމް މުހައްމަދު ޞާލިހްގެ ވެރިކަމުގައި ވެސް ހިމެނެއެވެ.
ރައީސް ޑރ. މުހައްމަދު މުއިއްޒުގެ ސަރުކާރުގައި ވަނީ، ރާއްޖޭގެ މަގުން ދަތުރުކުރާ ބޯޓުފަހަރަށް ތެޔޮ އަޅައި ދިނުމަށް ބަންކަރިން ޚިދުމަތް ފަށައިފައެވެ. ނަމަވެސް އެ ޚިދުމަތުން ވެސް ލަފާކުރި މިންވަރަށް ފައިދާ ނުލިބުމުގެ ކަންބޮޑުވުން އޮތީ އުފެދިފައެވެ.