ކުޅިވަރާއި ކިޔެވުމުގެ ތެރެއިން ނުހާ، ކުޅިއަކަށް ފަހު ކުޅިއެއް ކުރިއަށް!

އެ ކުޅިވަރަށް އޭނާގެ ހިތް ދޫވިއިރު، އެންމެ 10 އަހަރެވެ. އެތައް ވަގުތަކާއި ފަރިތަކުރުމެއް އެ ކުޅިވަރަށް ބޭނުންވެއެވެ. އެ ވަރަކުން އަދި ނުފުދެއެވެ. ވިސްނުމާއި ހުށިޔާރުކަމަކީ ވެސް މުހިންމު އުކުޅުތަކެކެވެ. ތިލަކޮށް ބުނާނަމަ، މިއީ ރާޒުވާ ނުވަތަ ޗެސްއެވެ. އެކަމަކު، މި ފަހަރު މި އުޅެނީ، ރާޒުވާގައި ކުރިއަރަމުން އަންނަ ޒުވާނެއްގެ ވާހަކަ ކިޔައިދޭށެވެ.

ޅަ އުމުރުގައި އޭނާ ފެށި، ރާޒުވާގެ ހަޔާތުގައި ހީނުކުރާ އެތައް ކާމިޔާބީއެއް ލިބިއްޖެއެވެ. އެކަމަކު، ގުރުބާނީތަކަކާ ވެސް އެކީގައެވެ. އެ ކާމިޔާބީތަކުން އޭނާ އަންނަނީ، ރާޒުވާގެ ހަޔާތުގައި ރާއްޖޭގެ ނަން ރީތިކޮށްދެމުންނެވެ. މިއީ، 19 އަހަރުގެ ނުހާ ރިލްވާންގެ ދަތުރުގެ ވާހަކައެވެ.

ފަހަރަކު ކުޅިއެއް ކުރިއަށް!

ރާޒުވާއަކީ ނުހާއަށް އާ އެއްޗެއް ނޫނެވެ. އެއީ، އޭނާގެ އެއްބަނޑު އެއްބަފާ ބޭބެ ކުޅޭތަން ފެންނާތީއެވެ. އެކަމަކު، އެއަށް ނުހާ ވެއްދީ ބޭބެއެއް ނޫނެވެ. ބައްޕައެވެ. ފުރަތަމަ ފެށީ ޓެސްޓަކަށެވެ. އެއީ ނުހާއަށް ވާނެ ކަމެއްތޯ ޓެސްޓްކޮށްލާށެވެ. އެއީ ބައްޕަގެ ޚިޔާލެކެވެ.

އެކަމަކު، ފުރަތަމަ ކުޅިއަކީ ކޯޗު ގާތަށް ދިއުމެވެ. ނުހާގެ ފުރަތަމަ ކޯޗަކީ އަހުމަދު ފުއާދެވެ. މީގެ 10 އަހަރު ކުރިން ރާޒުވާގެ ކުޅިތަކުގެ ތެރެއަށް ނުހާ ވަނީ އެ ކޯޗުގެ އިރުޝާދާ އެކުގައެވެ. އެ އަހަރުގެ ވިމެންސް ޗެސް ޗެމްޕިއަންޝިޕްގައި އޭނާ ބައިވެރިވީ ވެސް އަޖުމަ ބަލައިލާށެވެ.

އެކަމަކު، އެ މުބާރާތްވީ ކާމިޔާބުވާން ކީ ސަޔަކަށެވެ. އެ މުބާރާތުގައި ނުހާގެ ފަރާތުން ފެނުނު އާދަޔާޚިލާފު މޮޅު ކުޅުންވީ، ރާޒުވާ ހަޔާތުގެ ބިންގަލަށެވެ. ދިވެހި ގައުމީ ޓީމަށް ހޮވުނީ އެންމެ 10 އަހަރުގައެވެ.

އެއީ ލިބުނު އުންމީދެކެވެ. ވާނެކަމުގެ ޔަގީންކަމެވެ. އެއަށް ފަހު، އެ އަންނަނީ ފަހަރަކު ކުޅިއެއް ކުރިއަށް ކުޅެމުންނެވެ. ހިތްވަރާއި އަޒުމާ އެކުގައެވެ.

ނުހާ ރާޒުވާ ކުޅެން ފެށި ދުވަސްވަރު ----

"[ގައުމީ ޓީމަށް ހޮވުނީމަ] ވަރަށް މޯޓިވޭޓްވި. ހިތަށް އެރީ މި ދާއިރާގައި ނުހާއަށް ވެސް ކުރިއެރިދާނެޔޭ. ހަމަ ވަރަށް ކުޅޭ ހިތްވި އެ ހިސާބުން،" ރާޒުވާ ދަތުރުގެ ނުހާ 'އެސްއެސްޓީވީ'އާ ހިއްސާކުރަން ފެށީ މިހެންނެވެ.

ކިޔެވުމާއި ރާޒުވާ ފުށޫއަރައި، ހިތް ނޭދޭ ވަގުތުތަކެއް!

ނުހާގެ ހިތް މި ކުޅިވަރަށް ދޫވިއިރު، އޭނާއަކީ ސްކޫލު ދަރިވަރެކެވެ. އެ ކަމަށް ވެސް ވަގުތު ދޭން ޖެހެއެވެ. މި ދަތުރުގައި ނުހާއަށް އެންމެ އުނދަގުވީ އެހެންވެއެވެ. ކިޔެވުމާއި ކުޅިވަރު އެއް ހަމައެއްގައި ހިފައްޓަން ޖެހުމުންނެވެ. ދެ ކަންތަކުން ކުރިއެރުންތައް ހޯދުމަކީ، އޭނާގެ އެދުމެވެ. ކުރާ ފޮނި އުންމީދެކެވެ.

އެހެންވެ، އެހާ ލޯބިން ކުރާ ދެ ކަންތަކުން އެއް ކަމެއް ޚިޔާރުކުރަން ޖެހޭ އެތައް ފަހަރެއް އޭނާއަށް ކުރިމަތިވިއެވެ. ގައުމީ ޓީމަށް ހޮވުނު ހިސާބުން، ބައެއް އަހަރު މުބާރާތްތަކުގައި ތިން ފަހަރަށް ވެސް ރާއްޖެން ބޭރަށް ދާންޖެހިދާނެއެވެ. އެއިން ކޮންމެ ފަހަރަކު ނުހާއަށް ޖެހެނީ، ކިޔެވުން ގުރުބާން ކުރާށެވެ.

މުބާރާތް ނިންމާފައި އެނބުރި ރާއްޖެ އަންނައިރު، އޭނާއަށް އޮންނަނީ އެތައް ފިލާވަޅެއް ގެއްލިފައެވެ. އެކަމަކު، އެއީ އޭނާގެ އަޒުމު ގުޑުވާލި ގޮންޖެހުމެއް ނޫނެވެ. ގެއްލުނު ހުރިހާ ފިލާވަޅެއް ހޯދައި، ދަސްކުރެއެވެ. އެހެން ކުދިންނާ އެއް ހަމައެއްގައި ހިފަހައްޓަން އޭނާ ކުރާ މަސައްކަތް ދޫކޮށެއް ނުލައެވެ.

އޭރު އެންމެ ބޭނުންވީ ޔުނިޓު ޓެސްޓުތަކުގައި އެންމެ މަތިން މާކްސް ހޯދާށެވެ. މުބާރާތަކަށް ރާއްޖޭން ބޭރަށް ދާން ޖެހިއްޖެނަމަ، އެ އަމާޒު ހާސިލުކުރަން ނުހާ ކުރަން ހުންނަ މަސައްކަތް ދެ ގުނަވެއެވެ. ނަމަވެސް، އެ ބުރަކަމުން އޭނާއަށް ނޫހާ މާޔޫސްކޮށެއް ނުލައެވެ. އަޒުމާ އެކީ ދިޔައީ ކުރިއަށެވެ.

ކިޔެވުމުގައި ނަން ފަވާހެން ރާޒުވާއަށް އޭނާގެ ހިތުގައި އޮންނަ ލޯބި ވެސް ކުޑައެއް ނޫނެވެ. މި ދަތުރުގައި އޭނާއަށް ނިންމާނެ ގޮތެއް ނޭނގެނީ، އެއް ކަމެއް ޚިޔާރުކުރަން ޖެހުމުންނެވެ. އެއީ، ބައެއް ފަހަރަށް މުބާރާތް އޮންނަ ގަޑީގައި ޓެސްޓުތައް އޮންނަ ފަހަރަށެވެ.

މި ގޮތުން، 2024 ވަނަ އަހަރު ހަންގަރީގެ ބުޑަޕެސްޓުގައި އޮތް ދުނިޔޭގެ ރާޒުވާ އޮލިމްޕައިޑްއަށް ދާން ފުރުސަތު ލިބި، އެ ކަން އޭނާ ޖެހުނީ ދޫކޮށްލާށެވެ. ހިތާ ދެކޮޅަށެވެ. ހަމަ އެންމެ ކަމެއް ހާސިލުކުރުމުގެ ގަދަ އަޒުމުގައެވެ. ބާރަ އަހަރު ކިޔެވި ފިލާވަޅުތަކުގެ އެހީގައި އޭލެވެލްއިން ރަން ވަނައެއް ހާސިލުކުރުމަށެވެ. މުބާރާތް ފުށުއެރީ، އޭލެވެލް ޓެސްޓު ދުވަސްވަރަށެވެ.

ނުހާގެ އުންމީދަކަށްވީ، އޭލެވެލްގައި ރަނގަޅު ނަތީޖާއެއް ހާސިލުކޮށް، ރައީސުލްޖުމްހޫރިއްޔާގެ ސްކޮލަޝިޕް ހޯދުމެވެ. އެ ފޮނި ހޮވަފެނުގައި އޭނާ ކުލަ ވެސް ޖެއްސިއެވެ. ނުހާގެ އެ އުންމީދީ ހުޅުކޮޅުން އޭނާގެ ކާމިޔާބީގެ ދަތުރު އިތުރު އުޖާލާވިއެވެ. ކުރިއަށް ދިޔުމަށް ޖޯޝު އާލާވިއެވެ.

އޭލެވެލްއިން އެއްވަނަ ހާސިލުކޮށް، ރައީސްގެ ސްކޮލާޝިޕް ނުހާއާ ރައީސް މުއިއްޒު ހަވާލުކޮށްދެއްވަނީ --- ފޮޓޯ/ ރައީސް އޮފީސް

އަޑިގުޑަންތަކާ އެކީގައި ވެސް ލިބުނު ކާމިޔާބީތަކުން އުފަލުން ފޮޅިފައި!

ނުހާ ދެކޭ ގޮތުގައި އޭނާއަށް ލިބުނު އެންމެ ބޮޑު ކާމިޔާބީއަކީ، ވުމެން ފިޑޭ މާސްޓާ ޓައިޓަލް ހާސިލުކުރެވުމެވެ. ހަތް އަހަރު ކުރިން 2018 ވަނަ އަހަރު ބައިނަލްއަގުވާމީ އެ ތަށި ނުހާ ރާއްޖެއަށް ހާސިލުކޮށްދިނީ އަލަށެވެ. އޭރު، އޭނާގެ އުމުރުން އެންމެ 13 އަހަރެވެ.

އޭގެ ކުރިން ވެސް 2016 ވަނަ އަހަރުން ފެށިގެން ރާއްޖޭގެ ޖޫނިއާ ޗެސް ޗެމްޕިއަންޝިޕުގައި ހަތް އަހަރު ޖެހިޖެހިގެން އަންހެން ކުދިންގެ ކެޓެގަރީން އެއްވަނަ ހާސިލުކުރިއެވެ.

ވިސްނުމާ ހުނަރުން ކުޅެވޭ ރާޒުވާގެ މުބާރާތްތަކުގައި ކޮންމެ މެޗަކުން މޮޅުވުމަކީ، ހާސިލުކުރަން އުނދަގޫ ކަމެކެވެ. އޭނާއަށް އެންމެ ފުރަތަމަ ހުރިހާ މެޗެއް މޮޅުވީ، ޗައިނާއަށް ދާން ޗެސް އެސޯސިއޭޝަނުން ބޭއްވި ސެލެކްޝަނެއްގައެވެ. އެއީ، 2016 ގައެވެ.

ނުހާ މުބާރާތެއްގައި ރާޒުވާ ކުޅެނީ ---

އޭގެ ފަހުން، 2022 ގައި އިންޓަ ސްކޫލު ޗެސް ޗެމްޕިއަންޝިޕްގައި ހުރިހާ މެޗަކުން ނުހާ ވަނީ އެއްވަނަ ހާސިލުކޮށްފައެވެ. ޖެހިގެން އައި 2023 ގައި ވެސް އެ ވަނަ އޭނާ ދިފާއުކުރިއެވެ. އަދި، އެ އަހަރުން ފެށިގެން އަދިވެސް އޭނާ އަންނަނީ ގައުމީ ޓީމު ތަމުސީލުކުރަމުންނެވެ.

ނުހާ ބުނީ، ދިވެހި ދިދަ ޖަހައިގެން އެހެން ގައުމުތަކާ ބައްދަލުކޮށް، ތަމުސީލުކުރެވުމަކީ ވަރަށް އުފާވާ ކަމެކެވެ.

މި ހުރިހާ ކާމިޔާބީތަކާ އެކު ނުހާ އެންމެ ފުރަތަމަ ވެސް ހަމުދުކުރީ މަތިވެރި މާތް ﷲ އަށެވެ. އެ ކުޅިވަރުން ރަންވަނަތައް ހާސިލުކުރުމުގެ ގާބިލުކަން އޭނާއަށް ދެއްވި ކަމަށްޓަކައެވެ. އެއަށް ފަހު، މި ބިންގަލުގައި ދެމިހުރުމަށް ނުހާއަށް ހިތްވަރުދޭ މައިންބަފައިންނަށް ޝުކުރު ހައްގެވެ. އޭނާއަށް ބޭނުންވާ ކޮންމެ ކަމެއް ކޮށްދެނީ އުފަލާ އެކީގައެވެ. ހިތުން ރުހުމުންނެވެ.

"މިހާރު އުމުރުން 19 އަހަރު. މި އުމުރުގައި ވެސް މައިންބަފައިންގެ ސަޕޯޓު އެބަލިބޭ. ބޭނުންވާ ކޯޗުން ހޯދައިދީ. ހަމަ މުބާރާތްތަކަށް ގެނެސްދީ، ގައިޑުކޮށްދީ. ކިޔެވުމުގެ ކަންކަން ބެލެންސްކުރަން އެހީވެދީ ހުރިހާ ކަމެއް ކޮށްދިނީ، މަންމައާއި ބައްޕަ،" ނުހާ ކިޔައިދިނެވެ.

ނުހާ، މަންމައާއި ބައްޕައާއެކު ---

ރާޒުވާ ކުޅެން ޝައުގުވެރިވާ ކުދިންނަށް ނުހާގެ މި ދަތުރު ފުދޭނެއެވެ. މި ވާހަކަތަކުން އެކަނި އަޒުމާއި ހިތްވަރު އާވާނެއެވެ. އެ ކުދިންނަށް ނުހާގެ އޮތީ އެންމެ ވާހަކައެކެވެ. ފެންނަ ފެނުމަށް ވަރަށް ފަސޭހަ ކަމަށް ހީވިޔަސް، ރާޒުވާއަކީ ވަރަށް ތައްޔާރުވާން ޖެހޭ ކުޅިވަރެކެވެ. ފަރިތަކުރުންތަކާއި ސިކުނޑި ތައްޔާރުވެފައި ހުރުން ކޮންމެހެން މުހިންމެވެ.

"މެޗެއް ކުޅުމުގެ ކުރިން ވަރަށް ބޮޑަށް ތައްޔާރުވާން ވާނެ. ކުޅުންތެރިޔާގެ މޫވްސް ދަސްކޮށް، ބަލަންވާނެ. އަލަށް ޗެސް ކުޅެން ބޭނުންވާ ކުދިންނަށް ބުނާނީ، ގަވާއިދުން [ރާޒުވާ] ކުޅޭށޭ. ހަމަ އެހެން ހުރެލާފައި ކުޅެލުމާ، ޕްރެސްޓިކްސްއަކާ ރަނގަޅު އެއިމްއަކާ އެކީ ކުޅުމަކީ އިމްޕްރޫވްވާން ވަރަށް މުހިންމު ކަމެއް،"

ކާމިޔާބީއަކީ ހަމައެކަނި މުބާރާތަކުން ހާސިލުވާ ވަނަތަކެއް ނޫނެވެ. ކޮންމެ މުބާރާތަކުން ދަސްވާ އުކުޅުތަކަކީ ވެސް ރާޒުވާގައި ވަރަށް މުހިންމު އެއްޗެކެވެ. ނުހާއަށް ބޮޑު ކާމިޔާބެކެވެ. ހުނަރުތައް ކުރިއަރާނީ އެ ގޮތަށެވެ. ތަޖުރިބާއިންނެވެ.

ނުހާގެ ކާމިޔާބީއާއި ތަޖުރިބާއިން ބޭނުންވަނީ އެހެން ކުދިންނަށް ހިތްވަރު ދޭށެވެ.