އަދާލަތު ޕާޓީގެ ރައީސްކަމަށް އެ ޕާޓީގެ މިހާރުގެ ނައިބު ރައީސް ޝައިޚް މުޙައްމަދު ޝިފާން، އަދި ނައިބު ރައީސްކަމަށް ޝައިޚް ޢަބްދުالله ރަޝީދު, 99 ޕަސެންޓު ވޯޓާއެކު އިންތިޚާބުވެއްޖެއެވެ.
މިއަދު ހެނދުނު ނުވަޔަކުން ފެށިގެން މިރޭ އަށެއް ޖަހަންދެން އަދާލަތު ޕާޓީގެ ރައީސާއި ނައިބު ހޮވާ އިންތިޚާބު ވަނީ ކުރިއަށް ގެންގޮސްފައެވެ. އެ ޕާޓީގެ އިންތިޚާބުގެ ވޯޓުލުން ކުރިއަށް ގެންދިޔައީ އޮންލައިންކޮށް، ފަހިވޯޓު އެޕްލިކޭޝަން މެދުވެރިކޮށެވެ.
އަދާލަތު ޕާޓީން އާންމުކުރި ނަތީޖާއިން ދައްކާ ގޮތުގައި، ޝިފާނާއި ރަޝީދު އިންތިޚާބު ކާމިޔާބުކުރެއްވީ އިންތިޚާބުގައި ވޯޓުލީ މެންބަރުންގެ 99 ޕަސެންޓު ލިބިގެންނެވެ. ޝިފާނާއި ރަޝީދާ ވާދަކުރެއްވި ޑރ. އިކްރާމް ޢަބްދުއްސައްތާރާއި ރަނިން މޭޓުގެ ގޮތުގައި ވާދަކުރެއްވި މުޙައްމަދު މުއްޠަލިބަށް ލިބުނީ އެންމެ ޕަސެންޓެކެވެ.
މި އިންތިޚާބުގައި ވޯޓުލީ ކިތައް މެންބަރުންނެއްކަން އަދި ސާފެއްނޫނެވެ.
ފާހަގަކުރެވޭ ގޮތުގައި، މިއަދު ބޭއްވި އަދާލަތު ޕާޓީގެ އިންތިޚާބުގެ ވޯޓުލުން ކުރިއަށް ގެންދިޔައީ ވޯޓު ލާނެ ގޮތަކާ މެދު އެޕާޓީގެ އެތެރޭގައި ޚިޔާލު ތަފާތުވުން އުފެދިފައި ވަނިކޮށެވެ.
އެގޮތުން، އެ އިންތިޚާބުގައި ވޯޓު ފޮށި ބެހެއްޓުމަށް އެދިވަޑައިގެން މިމަހު 11ގައި، އެ ޕާޓީގެ ރައީސް ކަމަށް ވާދަކުރެއްވި އިކްރާމް ސިޓީއެއް ފޮނުއްވިއެވެ. ނަމަވެސް އިންތިޚާބުގައި ވޯޓު ފޮށި ބަހައްޓަން ޕާޓީގެ އެތެރޭގެ އިންތިޚާބުތަކަށް ހަދާފައިވާ ގަވާއިދުން ޖާގަ ނުދޭ ކަމަށް އަދާލަތު ޕާޓީން ވަނީ ބުނެފައެވެ.
އޭގެފަހުން، އިކްރާމް ނެރުއްވި ބަޔާނެއްގައި ވަނީ، އިންތިޚާބާ ގުޅިގެން ހުރިހާ ކަމެއް ކުރަމުން ދިޔައީ، ދެފުށްފެންނަ ޢަދުލު އިންސާފުގެ އުސޫލުތަކާ ޚިލާފަށް ކަމަށް ތުހުމަތުކުރައްވައި، އަދާލަތު ޕާޓީގެ ރައީސަކު ހޮވާ އިންތިޚާބު ބޮއިކޮޓު ކުރާނެ ކަން ހާމަކުރައްވައިފައެވެ.
އަދާލަތު ޕާޓީގެ މިހާރުގެ ނައިބު ރައީސް ޝައިޚް މުޙައްމަދު ޝިފާން އިންތިޚާބުގައި ވާދަކުރެއްވީ ފާހަގަކުރެވޭ ގޮތުގައި، އެ ޕާޓީގެ މިހާރުގެ ރައީސް ޢިމްރާން އަބްދުالله އާއި ޑރ. މުޙައްމަދު ޢިޔާޡް ޢަބްދުއްލަޠީފާއި ޝައިޚް އިލްޔާސް ޙުސައިންގެ ތާއީދާއެކުގައެވެ.