މިދިޔަ ޑިސެމްބަރު މަހުގައި އެކަނި ފެމިލީ ކޯޓުން، 137 ވަރި ކޮށްދީފައިވާ ކަމަށް އެ ކޯޓުގެ ހިސާބުތަކުން ދައްކައިފިއެވެ.
އެ ކޯޓުގެ ހިސާބުތަކުން އެނގޭ ގޮތުގައި، ޑިސެމްބަރުގައި ވަނީ، 277 ކައިވެންޏެއް ކޮށްދީފައެވެ. އަދި، 137 ވަރި އެ މަހު ކޮށްދީފައިވާއިރު، އޭގެ ކުރިން ނޮވެންބަރުގައި ވަނީ، 108 ވަރި ކޮށްދީފައެވެ. އެހެންވެ، މިދިޔަ މަހު ނޮވެންބަރަށް ވުރެ އިތުރަށް 29 ވަރިއެއް ވަނީ ކޮށްދީފައެވެ.
ނޮވެންބަރަށް ވުރެ މިދިޔަ މަހު، ކޮށްދިން ކައިވެނީގެ އަދަދު ވެސް ވަނީ އިތުރުވެފައެވެ. މިގޮތުން، ނޮވެންބަރަށް ވުރެ އިތުރަށް 108 ކައިވެނި މިދިޔަ މަހު ފެމިލީ ކޯޓުގައި ވަނީ ކޮށްދީފައެވެ.
ފެމިލީ ކޯޓުން ބުނީ، މިދިޔަ މަހު އެ ކޯޓުން 176 ވަރީގެ މައްސަލައެއް ބަލައި ނިންމާފައިވާ ކަމަށެވެ. އެއީ، ނޮވެންބަރުގައި ވަރިވުމަށް އެދި ހުށަހެޅި 74 މައްސަލައަކާއި ވަރިކުރުމަށް އެދުނު 40 މައްސަލައާއި ވަރި ސާބިތުކުރުމަށް ހުށަހެޅި 59 މައްސަލައިގެ އިތުރަށް ވަރިއާމެދު ޝައްކު ކުރެވުނު ތިން މައްސަލައެކެވެ.
އޭގެއިތުރަށް، އެހެނިހެން މައްސަލަތައް ވެސް އެ ކޯޓުން މިދިޔަ މަހު ވަނީ ނިންމާފައެވެ. މިގޮތުން، ވަރީގެ މައްސަލަތައް ހިމެނޭހެން ޖުމްލަ 245 މައްސަލަ ފެމިލީ ކޯޓުން ވަނީ މިދިޔަ މަހު ނިންމާފައެވެ.
އޭގެތެރޭގައި ހިމެނެނީ، ކުޑަކުދިންނާ ގުޅޭ 14 މައްސަލައެއް މިދިޔަ މަހު ނިންމާފައިވާއިރު ޚަރަދުގެ 20 މައްސަލައަކާއި ގެވެށި އަނިޔާއާ ގުޅޭ 16 މައްސަލައާއި އާއިލީ އެހެނިހެން 19 މައްސަލައެކެވެ.
ތަފާސްހިސާބުތަކުން އެނގޭ ގޮތުގައި، މިދިޔަ މަހު އެ ކޯޓުގައި ނުނިމި އެންމެ ގިނައިން ހުރީ ވަރީގެ މައްސަލަތަކެވެ. އެ ބާވަތުގެ 173 މައްސަލަ ނުނިމި އެބަހުއްޓެވެ. އެއާއެކު، ކުޑަކުދިންނާ ގުޅުންހުރި 59 މައްސަލައާއި ޚަރަދުގެ 35 މައްސަލައާއި ގެވެށި ނުވަ މައްސަލައާއި އާއިލީ އެހެނިހެން 29 މައްސަލަ ބާކީ ނުނިމި ހުރިކަމަށް ފެމިލީ ކޯޓުން ވަނީ ބުނެފައެވެ.