ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އަށް ނިމިދިޔަ އަހަރު ލިބިފައިވާ ޖުމްލަ އާމްދަނީ 15.5 ބިލިއަން ރުފިޔާއަށް އަރައިފައި ވާކަމަށް އެ ކުންފުނީގެ ތަފާސްހިސާބުތަކުން ދައްކައިފިއެވެ.
އެސްޓީއޯއިން އާންމުކޮށްފައިވާ އެ ކުންފުނީގެ ނިމިދިޔަ އަހަރުގެ ހަތަރުވަނަ ކުއާޓަރުގެ ތަފާސްހިސާބުތައް ދައްކާގޮތުން، ޖުމްލަ އާމްދަނީގެ ގޮތުގައި ނިމިދިޔަ އަހަރުގެ ހަތަރުވަނަ ކުއާޓަކުރުގައި އެ ކުންފުންޏަށް 4.1 ބިލިއަން ރުފިޔާ ލިބުނެވެ. އެއީ އޭގެ ކުރީ ކުއާޓަރާ އަޅާބަލާއިރު، އަށް ޕަސެންޓުގެ އިތުރުވުމެކެވެ.
ޖުމްލަ އާމްދަނީގެ ގޮތުގައި އެ ކުންފުންޏަށް 15.5 ބިލިއަން ރުފިޔާ ލިބިފައިވާއިރު، އޭގެ ކުރީ އަހަރު، 2024ގެ އާމްދަނީއަކީ 15.4 ބިލިއަން ރުފިޔާއެވެ.
އެ ކުންފުނިން ވަނީ ކުންފުނީގެ އާމްދަނީއާއި ފައިދާ އިތުރުވުމުން ޓެކުހަށް ކެނޑުމުގެ ކުރީން މިދިޔަ އަހަރު 910 މިލިއަން ރުފިޔާ ލިބިފައި ވާކަމަށް ބުނެފައެވެ. އަދި ޓެކުހަށް ކެނޑުމަށްފަހު 762 މިލިއަން ރުފިޔާ އެ ކުންފުންޏަށް ސާފު ފައިދާގެ ގޮތުގައި ލިބިފައި ވާކަމަށް އެ ކުންފުނިން ވަނީ ބުނެފައެވެ. އޭގެ ކުރީ އަހަރު އެ އަދަދު ހުރީ 741 މިލިއަން ރުފިޔާގައެވެ.
އެ ކުންފުނިން ވަނީ ކުންފުނީގެ ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ ކުންފުނީގެ ވިޔަފާރި ރަނގަޅުވުން ކަމަށް ބުނެފައެވެ.