އީރާނުގެ އެންމެ ނުފޫޒުގަދަ އަސްކަރީ ބާރު ކަމަށްވާ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އަކީ ޓެރަރިސްޓް ޖަމާއަތެއްގެ ގޮތުގައި ޔޫރަޕްގެ އިއްތިހާދު (އީޔޫ) އިން ކަނޑައަޅަން ތައްޔާރުވަމުންދާ ކަމަށް އެ އިއްތިހާދުގެ ފޮރިން ޕޮލިސީ ޗީފް ކާޖާ ކަލަސް ވިދާޅުވެއްޖެއެވެ.
ބްރަސަލްސްގައި ނޫސްވެރިންނާ ވާހަކަދައްކަވަމުން ކަލަސް ވިދާޅުވީ، އީރާނުގެ ސަރުކާރުން އެގައުމުގެ ރައްޔިތުންނާ ދެކޮޅަށް ހިންގަމުންދާ އަނިޔާވެރި އަމަލުތަކާ ގުޅިގެން އައިއާރުޖީސީ ބްލެކްލިސްޓް ކުރުމަށް އީޔޫގެ ގައުމުތަކުން އެއްބަސްވާނެ ކަމަށް އުއްމީދު ކުރައްވާ ކަމަށެވެ. "ޓެރަރިސްޓުން ފަދައިން އަމަލުކުރާ ނަމަ، އެ ބަޔަކާ މެދު އަމަލުކުރަން ޖެހޭނީ ވެސް ޓެރަރިސްޓުންގެ ގޮތުގައި،" އޭނާ ވިދާޅުވިއެވެ.
އީރާނުގެ އަސްކަރީ ސިފައިން -- ފޮޓޯ: އޭޕީ
އައިއާރުޖީސީ ޓެރަރިސްޓް ލިސްޓަށް އެރުވުމަށް މީގެ ކުރިން ދެކޮޅު ހަދަމުން ދިޔަ ފްރާންސް، އިޓަލީ އަދި ސްޕެއިން އިން މިހާރު ވަނީ އެ ނިންމުމަށް ތާއީދުކޮށްފައެވެ. މީގެ ކުރިން އެ ގައުމުތަކުން ކަންބޮޑުވުން ފާޅުކުރީ މިފަދަ ނިންމުމެއްގެ ސަބަބުން އީރާނާއެކު އޮންނަ ހާރިޖީ ގުޅުންތަކަށް ބުރޫ އަރާފާނެތީއެވެ. ނަމަވެސް، އީރާނުގެ ސަރުކާރާ ދެކޮޅަށް ކުރަމުންދާ މުޒާހަރާތަކުގައި އެތައް ހާސް ބަޔަކު މަރާލާފައިވާތީ، އީޔޫ އިން ވަނީ އީރާނުގެ 20 އަށް ވުރެ ގިނަ ފަރާތްތަކަކާ ދެކޮޅަށް ދަތިކުރުމުގެ ފިޔަވަޅު އެޅުމަށް ވެސް ނިންމާފައެވެ.
މި ނިންމުމާ ގުޅިގެން މަސްރަހު އިތުރަށް ގޯސްވެފައިވަނީ އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަފުޅުތަކާ ގުޅިގެންނެވެ. ޓްރަމްޕް ވަނީ އީރާނާ ދެކޮޅަށް "މާސިވް އާމާޑާ" ނުވަތަ ބޮޑު އަސްކަރީ ލަޝްކަރެއް ދަތުރުކުރަމުންދާ ކަމަށާއި، ކުރިއަށް އޮތް ހަމަލާ މާ ވަރުގަދަވާނެ ކަމަށް ވިދާޅުވެ އިންޒާރު ދެއްވާފައެވެ.
މީގެ ރައްދުގައި އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އީރާނުގެ ސިފައިން ތިބީ "ބަޑީގެ ޓްރިގާގައި އިނގިލި ޖައްސައިގެން" ކަމަށާއި، އެގައުމަށް ދޭ ކޮންމެ ހަމަލާއަކަށް ވަރުގަދަ ރައްދެއް ދޭނެ ކަމަށެވެ.
މެދުއިރުމަތީގެ މަސްރަހު ހޫނުވުމާ ގުޅިގެން ދުނިޔޭގެ ބާޒާރުގައި ތެލުގެ އަގު ވަނީ 1.13 އިންސައްތަ އުފުލި، ބްރެންޓް ކްރޫޑް ފީފާއެއްގެ އަގު 67.03 ޑޮލަރަށް އަރާފައެވެ. އަދި ރަނުގެ އަގު ވެސް ވަނީ ރެކޯޑް މިންވަރަކަށް މައްޗަށް ގޮސް، އައުންސެއްގެ އަގު 5,600 ޑޮލަރާ ގާތްކޮށްފައެވެ.
އިންވެސްޓަރުން ރަނަށް އިންވެސްޓް ކުރަމުންދަނީ ހަނގުރާމައެއްގެ ބިރު ބޮޑުވުމުން ރައްކާތެރިކަމުގެ ފިޔަވަޅެއްގެ ގޮތުންނެވެ.