އެމެރިކާގެ ރައީސް ޑޮނަލްޑް ޓްރަމްޕް އީރާނަށް އަސްކަރީ ހަމަލާއެއް ދީފާނެ ކަމުގެ އިންޒާރު ދެއްވުމާ ގުޅިގެންނާއި، އެމެރިކާ ޑޮލަރުގެ އަގު ދަށްވުމުގެ ސަބަބުން ދުނިޔޭގެ ބާޒާރުގައި ރަނުގެ އަގު ރެކޯޑް މިންވަރަކަށް މައްޗަށް ގޮސްފިއެވެ.
ބުރާސްފަތި ދުވަހު ރަނުގެ އަައުންސެއްގެ އަގު ވަނީ 5،500 އެމެރިކާ ޑޮލަރަށްވުރެ މައްޗަށް އަރާފައެވެ. މިއީ މިއަހަރު ފެށުނީއްސުރެ ބަލާއިރު ރަނުގެ އަގަށް އައި 20 އިންސައްތައިގެ ކުރިއެރުމެކެވެ.
ރަނުގެ އަގު މިހާ ބޮޑަށް އުފުލިގެން ދިޔައީ، އީރާނާ ދެކޮޅަށް އެމެރިކާގެ "ބިޔަ އަސްކަރީ ފައުޖެއް" (މެސިވް އާމާޑާ) ދަތުރުކުރަމުންދާ ކަމަށާއި، ބޭނުންވެއްޖެ ހިނދެއްގައި "ހަލުވިކަމާއި ނުރައްކާތެރިކަމާއެކު" ހަމަލާދޭން އެމެރިކާގެ ސިފައިން ތިބީ ތައްޔާރަށް ކަމަށް ވިދާޅުވެ ރައީސް ޓްރަމްޕް ދެއްވި އިންޒާރުތަކާ ގުޅިގެންނެވެ.
އިގްތިސާދީ ގޮތުން ނުތަނަވަސްކަން އުފެދޭ ދަނޑިވަޅުތަކުގައި، އަބަދުވެސް ރަނަކީ އެމީހުންގެ ރައުސްމާލު ރައްކާތެރިކުރުމަށް އޮތް އެންމެ އިތުބާރު ހުރި ވަސީލަތް ކަމުގައި ދެކޭ ބައެކެވެ. އެގޮތުން 2025 ވަނަ އަހަރު ވެސް ރަނުގެ އަގު ވަނީ 64 އިންސައްތަ މައްޗަށް ގޮސްފައެވެ. އެއީ ޓްރަމްޕް އަލުން ވެރިކަމަށް ވަޑައިގެން، ބައިނަލްއަގުވާމީ ވިޔަފާރިއާއި ދުނިޔޭގެ އިދާރާތަކަށް ގެންނެވި ބޮޑެތި ބަދަލުތަކާ ގުޅިގެން އުފެދުނު ބަދަލުތަކުގެ ސަބަބުންނެވެ.
މީގެ އިތުރުން، އެމެރިކާ ހިމެނޭ ގޮތަށް ދުނިޔޭގެ ކުރިއަރާފައިވާ ގައުމުތަކުގެ ދަރަނި އިންތިހާއަށް ބޮޑުވުމުގެ ސަބަބުން، ސަރުކާރުގެ ބޮންޑު ފަދަ ތަކެއްޗަށް އޮންނަ އިތުބާރު ކުޑަވުމަކީ ވެސް ރަނުގެ އަގު އުފުލުމަށް މެދުވެރިވި ސަބަބެއް ކަމަށް މާހިރުން ލަފާކުރެއެވެ.
ދުނިޔޭގެ މަސްރަހަށް އައި މި ބަދަލުތަކާއެކު، އޭޝިއާގެ ހިއްސާގެ ބާޒާރުތައް ބުރާސްފަތި ދުވަހު ހުޅުވުނުއިރު އަގުތައް ދަށްވި ނަމަވެސް، މެންދުރުފަހު ބާޒާރު ވަނީ ކުޑަކޮށް ރަނގަޅުވާން ފަށާފައެވެ. އެގޮތުން ޖަޕާނުގެ ނިކޭ އިންޑެކްސް 0.2 އިންސައްތަ މައްޗަށް ދިޔައިރު، ހޮންކޮންގްގެ ހޭންގް ސެންގް ވަނީ 0.07 އިންސައްތަ އަދި ޝަންހާއީގެ އެސް.އެސް.އީ ކޮމްޕޮސިޓް އިންޑެކްސް ވަނީ 0.1 އިންސައްތަ މައްޗަށް ޖެހިލާފައެވެ.
ދުނިޔޭގެ އިގްތިސާދީ ނުވަތަ ސިޔާސީ މަސްރަހަށް ލޮޅުމެއް އަރާ ކޮންމެ ހިނދެއްގައި، އިންވެސްޓަރުން އެންމެ ބޮޑަށް ބަރޯސާވާ "ރައްކާތެރި ބަނދަރަކީ" ރަނެވެ. ފާއިތުވި ދެ އަހަރެއްހާ ދުވަހުގެ ތެރޭގައި ދުނިޔޭގެ ބާޒާރުތަކުގައި ރަނުގެ އަގު މެދުކެނޑުމެއްނެތި އުފުލެމުންދަނީ، އެމެރިކާގެ ދަރަނި ރެކޯޑް މިންވަރަކަށް އިތުރުވުމާއި، ބައިނަލްއަގުވާމީ ވިޔަފާރީގެ ގުޅުންތަކަށް އަންނަމުންދާ ބޮޑެތި ބަދަލުތަކުގެ ސަބަބުންނެވެ. ހާއްސަކޮށް 2025 ވަނަ އަހަރު ރައީސް ޓްރަމްޕް ދެވަނަ ދައުރަކަށް އިންތިހާބުވެވަޑައިގަތުމަށްފަހު، އެމެރިކާގެ ހާރިޖީ ސިޔާސަތުތަކަށް ގެންނެވި ހަރުކަށި ބަދަލުތަކާއި، މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ މާލީ ބާޒާރުތަކުގައި ވަނީ ބޮޑު ނުތަނަވަސްކަމެއް އުފެދިފައެވެ.
މީގެ ކުރިން ވެސް އެމެރިކާއާއި އީރާނާ ދެމެދު އުފެދިފައިވާ ދުސްމަންކަމުގެ ސަބަބުން ދުނިޔޭގެ ތެލުގެ ބާޒާރަށާއި މާލީ އިދާރާތަކަށް އޭގެ ނޭދެވޭ އަސަރުކޮށްފައިވެއެވެ.