ޑޮލަރުގެ އަގު ވެއްޓުމަކީ މައްސަލައެއް ނޫން ކަމަށް ރައީސް ޑޮނަލްޑް ޓްރަމްޕް ދޭހަވާ ގޮތަށް ވާހަކަފުޅު ދެއްކެވުމާ ގުޅިގެން، ބައިނަލްއަގުވާމީ ބާޒާރުގައި އެމެރިކާ ޑޮލަރުގެ އަގު ފާއިތުވި ހަތަރު އަހަރުގެ ތެރޭގައި ނުވެއްޓޭ މިންވަރަކަށް ދަށަށް ހިނގައްޖެއެވެ.
މިކަމުގެ ސަބަބުން އިންވެސްޓަރުން މިހާރު ދަނީ ޑޮލަރު ދޫކޮށް، ރަނާއި ސްވިސް ފްރޭންކް ފަދަ "ރައްކާތެރި" ވަސީލަތްތަކަށް އިންވެސްޓް ކުރަމުންނެވެ.
އަންގާރަ ދުވަހު ޓްރަމްޕް ދެއްކެވި ވާހަކަފުޅުތަކަށްފަހު، ދުނިޔޭގެ މައިގަނޑު ފައިސާތަކާ އަޅާބަލާއިރު ޑޮލަރުގެ އަގު ވަނީ 1.3 އިންސައްތަ ދަށަށް ގޮސްފައެވެ. އަދި ބުދަ ދުވަހުގެ ހެނދުނު އިތުރު 0.2 އިންސައްތަ ވަނީ ދަށަށް ގޮސްފައެވެ. މިއީ 2022 ވަނަ އަހަރުގެ ފެބްރުއަރީ މަހަށްފަހު ޑޮލަރުގެ އަގު މިހާ ބޮޑަށް ވެއްޓުނު ފުރަތަމަ ފަހަރެވެ.
އެމެރިކާގެ އިގްތިސޯދީ ހާލަތާ ގުޅޭ ގޮތުން ވާހަކަދައްކަވަމުން ޓްރަމްޕް ވިދާޅުވީ ޑޮލަރުގެ އަގު ދަށްވުމަކީ "ވަރަށް ރަނގަޅު ކަމެއް" ކަމަށެވެ. އަދި ޑޮލަރުގެ އަގު ދަށަށް ދާތީ ކަންބޮޑުވޭތޯ ނޫސްވެރިން ސުވާލުކުރުމުން، ޓްރަމްޕް ވިދާޅުވީ އެމެރިކާގެ ވިޔަފާރިތަކަށް ބަލާއިރު ޑޮލަރުގެ ހާލަތު އޮތީ ރަނގަޅަށް ކަމަށެވެ.
ނަމަވެސް، މާކެޓް އެނަލިސްޓުން ބުނާ ގޮތުގައި ޑޮލަރުގެ އަގު ދަށްވުމަކީ ދެކޮޅަށް ކެނޑޭ ކަނޑިއެއް ފަދަ ކަމެކެވެ. ބޭރު ގައުމުތަކުގައި ވިޔަފާރިކުރާ އެމެރިކާގެ ކުންފުނިތަކަށް މީގެ ފައިދާ ކުރި ނަމަވެސް، އެމެރިކާއަށް އެތެރެކުރާ މުދަލުގެ އަގު ބޮޑުވެ، ތަކެތީގެ އަގު އުފުލުމުގެ (އިންފްލޭޝަންގެ) ބިރު އެބައޮތެވެ.
ޑޮލަރުގެ އަގު ވެއްޓުމާއެކު ރަނުގެ އަގު ވަނީ މީގެ ކުރިން ދުވަހަކުވެސް މައްޗަށް ނުދާ މިންވަރަށް އުފުލިފައެވެ. މިގޮތުން ރަނުގެ އަގު ވަނީ އައުންސެއް 5,200 ޑޮލަރަށްވުރެ މައްޗަށް އަރާފައެވެ. މިއީ ޓްރަމްޕްގެ ދެވަނަ ދައުރު ފެށުނު ފަހުން ރަނުގެ އަގަށް އައި 90 އިންސައްތައިގެ ބޮޑު ކުރިއެރުމެކެވެ.
މީގެ އިތުރުން ޔޫރޯގެ އަގު ވަނީ 1.20 ޑޮލަރަށް އުފުލިފައެވެ. އަދި ސްވިސް ފްރޭންކްގެ އަގު ވެސް ވަނީ ފާއިތުވި 10 އަހަރުގެ ތެރޭގައި މައްޗަށް ނުދާ މިންވަރަށް އުފުލިފައެވެ.
ޑޮލަރުގެ އަގު ދަށަށް ދިއުމުގެ އެއް ސަބަބަކީ އެމެރިކާގެ މަރުކަޒީ ބޭންކް (ފެޑަރަލް ރިޒާވް) އަށް ޓްރަމްޕް ކުރައްވަމުން ގެންދަވާ ފިއްތުންތައް ކަމަށް ތަޖުރިބާކާރުން ބުނެއެވެ. ފެޑްގެ ޗެއާމަން ޖެރޯމް ޕަވަލްއަށް ޓްރަމްޕް ތަކުރާރުކޮށް ފާޑުވިދާޅުވަމުން ގެންދަވާއިރު، ބޭންކްގެ ހެޑްކުއާޓާ މަރާމާތުކުރުމުގައި ހިނގާފައިވާ ކަންތައްތަކަކާ ގުޅިގެން ޖަސްޓިސް ޑިޕާޓްމަންޓުން ދަނީ ޕަވަލްގެ މައްޗަށް ޖިނާއީ ތަހުގީގެއް ވެސް ހިންގަމުންނެވެ.
އިންޓަރެސްޓް ރޭޓް ދަށްކުރުމަށް ޓްރަމްޕް ބާރުއަޅުއްވަމުން ގެންދެވި ނަމަވެސް، މިއަދު ބާއްވާ ބައްދަލުވުމުގައި ފެޑްއިން ރޭޓްތަކަށް ބަދަލެއް ނުގެންނާނެ ކަމަށް ބެލެވެއެވެ.
ޕަވަލްގެ ދައުރު އަންނަ މެއި މަހު ހަމަވާއިރު، ޓްރަމްޕް އާ ޗެއާމަނެއް އައްޔަންކުރައްވާނެ ކަމުގެ ނިޝާންތައް ވަނީ ފެންނަން ފަށާފައެވެ.