އަންނަ މަހު ބާއްވަން ހަމަޖެހިފައިވާ ބަންގްލަދޭޝްގެ އާންމު އިންތިޚާބަށް, ވެރިކަމުން ދުރުކޮށްފައިވާ އެ ގައުމުގެ ކުރީގެ ބޮޑުވަޒީރު ޝައިޚް ހަސީނާ ފާޑުވިދާޅުވެއްޖެއެވެ.
ހަސީނާ ނިސްބަތްވެވަޑައިގަންނަވާ އަވާމީ ޕާޓީއަށް އިންތިޚާބުގައި ވާދަކުރުން ވަނީ މަނާކޮށްފައެވެ.
ދަ އެސޯސިއޭޓެޑް ޕްރެސް ނޫސް އެޖެންސީ (އޭޕީ)އަށް ފޮނުއްވި އީމެއިލްއެއްގައި ހަސީނާ ވަނީ ބަޔަކު ބާކީ ކުރުމަށް ފަހު ބާއްވާ އިންތިޚާބަކުން އުފެދޭ ސަރުކާރަކަށް ގައުމު އެއްބައިވަންތަ ނުކުރޭވެނެ ކަމަށް ވިދާޅުވެފައެވެ. އަދި އިންތިޚާބުން ގަސްތުގައި ޕާޓީ ބާކީކުރުމުން އެ ކަމަނާއަށް ތާއިދުކުރާ އެތައް މިލިއަން މީހުންގެ ހައްގު ގެއްލިފައިވާ ކަމަށްވެސް ވިދާޅުވިއެވެ.
އޭގެއިތުރުން ވަގުތީ ވެރިޔާ މުޙައްމަދު ޔޫނުސްގެ ބެލުމުގެ ދަށުން ބަންގްލަދޭޝްގައި ދުވަހަކުވެސް މިނިވަން އަދި އިންސާފުވެރި އިންތިޚާބެއް ނުބޭއްވޭނެ ކަމަށް، ވެރިކަމުން ދުރުކުރި ފަހުން ފުރަތަމަ ފަހަރަށް އާންމުކޮށް ދެއްވި ތަގުރީރެއްގައި މިދިޔަ ހުކުރު ދުވަހު ހަސީނާ ވަނީ ވިދާޅުވެފައެވެ.
އަންނަ މަހުގެ 12 ވަނަ ދުވަހު ބާއްވާ އިންތިޚާބުގައި ބަންގްލަދޭޝްގެ 127 މިލިއަނަށް ވުރެ ގިނަ މީހުންނަށް ވޯޓުލުމުގެ ހައްގު ލިބިގެންދާއިރު، ގިނަ ބަޔަކު ދެކޭ ގޮތުގައި އެއީ އެތައް އަހަރަކަށް ފަހު އެ ގައުމުގައި ރަނގަޅު ނަތީޖާއެއް ނެރެވޭނެ އިންތިޚާބެކެވެ.
މިނިވަން އިންސާފުވެރި އިންތިޚާބެއް ބާއްވާނެ ކަމަށް ޔޫނުސް ވައުުދުވެވަޑައިގެންފައިވާއިރު، މަޝްރަހު ދިރާސާކުރާ ފަރާތްތަކުން ބުނާ ގޮތުގައި ހަސީނާގެ އަވާމީ ލީގު އިންތިޚާބުގައި ވާދަކުރުން މަނާކުރުމަކީ މިނިވަން އަދި އިންސާފުވެރި މިންގަނޑުތަކަށް ފެތޭނެ ކަމެއްތޯ ސުވާލު އުފެދެއެވެ.
ހަސީނާގެ 15 އަހަރުވީ ދިގު ވެރިކަން ވެއްޓެން މެދުވެރިވީ 2024 ވަނަ އަހަރު ބަންގްލަދޭޝްގެ ދަރިވަރުންތަކެއް އިސްނަގައިގެން ކުރިއަށް ގެންދިޔަ މުޒާހަރާތަކާ ގުޅިގެންނެވެ. އެ ގައުމުގެ އިގުތިސާދީ ހާލަތު ދަށްވުމާއި ކޮރަޕްޝަން އިތުރުވުމާ ގުޅިގެން ހިންގި އެ މުޒާހަރާތައް ރޫޅާލަން ބާރުގެ ބޭނުން ކުރުމަށް ހަސީނާ އެންގެވުމުން، މުޒާހަރާގެ ބައިވެރިންތަކެއް މަރުވެފައިވެއެވެ.
އެ މުޒާހަރާތަކާ ގުޅިގެން ހަސީނާ ގައުމުން ފިއްލަވައިގެން ވަޑައިގަތެވެ. އެ މުޒާހަރާތަކުގައި މީހުން މަރުވި މައްސަލަ ބަލައި، ހަސީނާގެ ޣައިރު ހާޒިރުގައި އޭނާގެ މައްޗަށް ވަނީ މަރުގެ ހުކުމް އިއްވައިފައެވެ.
ބަންގްލަދޭޝް އިން އިންޑިއާ އިން ހަސީނާ ހަވާލުކުރުމަށް އެދެމުން އައި ނަމަވެސް އެކަމާ ގުޅޭގޮތުން އިންޑިއާއިން ވަކި އެއްޗެއް ހާމަކޮށްފައެއްނުވެއެވެ.