ފުވައްމުލަކު ސިޓީ ކައުންސިލަށް ލިބެން ޖެހި ނުލިބި، 4.68 މިލިއަން ރުފިޔާ އެބައޮތްކަން އޮޑިޓް ރިޕޯޓުން ހާމަވެއްޖެއެވެ.
ފުވައްމުލަކު ސިޓީ ކައުންސިލްގެ 2023 ވަނަ އަހަރުގެ ކޮމްޕްލަޔަންސް އޮޑިޓް އަދި 2024 ވަނަ އަހަރުގެ މާލީ އޮޑިޓް ރިޕޯޓުން ދައްކާ ގޮތުގައި އެ ކައުންސިލަށް ލިބެން ޖެހި ނުލިބިވާ 4،684،351 ރުފިޔާ އެބައޮތްކަން ވަނީ ހާމަވެފައެވެ.
އޮޑިޓުގައި ބުނެފައިވާ ގޮތުގައި ޝެޑިއުލްއާ އެއްގޮތަށް ފައިސާ ނުދައްކާ ފަރާތްތަކާ މެދު ދައުލަތުގެ މާލިއްޔަތު ގަވައިދުގައި ބަޔާންކޮށްފައިވާ އިތުރު ފިޔަވަޅުތައް، އެ ފިޔަވަޅެއް އަޅަންޖެހޭ މަރުހަލާތަކުގައި އަޅާފައި ނުވާކަން ވަނީ ފާހަގަކޮށްފައެވެ. އެގޮތުން ޑިސެމްބަރު 31، 2024ގެ ނިޔަލަށް ލިބެންޖެހޭ ފައިސާގެ ތެރެއިން 4،387،485 ރުފިޔާ ނުލިބި ހުރިއިރު އެ ފައިސާގެ ތެރެއިން މިދިޔަ އަހަރު ވަނީ 747،714 ރުފިޔާ ލިބިފައެވެ. ބާކީ 3،639،771 ރުފިޔާ ނިމުނު އަހަރުގެ ޑިސެމްބަރު 25 ގެ ނިޔަލަށް ނުލިބިވާ ކަމަށް އޮޑިޓުގައި ބުންޏެވެ.
ހަމައެއާއެކު ޓެލެކޮމިއުނިކޭޝަންގެ ޚިދުމަތްތައް ދިނުމަށް ދޫކޮށްފައިވާ ބިންތަކުގެ އެއްބަސްވުންތައް އާކޮށްފައި ނުވުމާއި، އެ ބިންތަކަށް ކުލި ދައްކަމުން ގޮސްފައި ނުވާކަން ވެސް އޮޑިޓުގައި ފާހަގަކޮށްފައިވެއެވެ. އެ ޚިދުމަތް ދިނުމަށް ދޫކުރި ދެ ބިމަކުން، އެއްބަސްވުންތައް އާކުރުމެއްނެތި ވޭތުވެދިޔަ ހަތަރު އަހަރު އެ ބިންތައް ބޭނުންކޮށްފައިވާއިރު، އެ ޚިދުމަތް ދިނުމަށް ދިން އިތުރު ބިމަކުން ވެސް ކުލި ދައްކާފައެއް ނުވެއެވެ. އެގޮތުން އެ ތިން ބިމުން ޖުމްލަ 1،044،580 ރުފިޔާ ކައުންސިލަށް ލިބެންޖެހޭ ފައިސާގެ ގޮތުގައި ހުރިކަމަށް އޮޑިޓުގައި ވަނީ ފާހަގަކޮށްފައެވެ.
ހަމައެއާއެކު އެ ކައުންސިލުން ޑިސެމްބަރު 31، 2024ގެ ނިޔަލަށް ދައުލަތުގެ އާމްދަނީގެ ގޮތުގައި ބަލައިގެންފައިވާ 1،040،405 ރުފިޔާ އޮޑިޓްކުރި ތާރީޚު ކަމަށްވާ ޖޫން 16، 2025ގެ ނިޔަލަށް ވެސް ބޭންކު އެކައުންޓަށް ޖަމާކޮށްފައި ނުވާ ކަމަށް އޮޑިޓުގައި ވަނީ ފާހަގަކޮށްފައެވެ. އެއީ އައިޑީ ކާޑު ފައިސާގެ ގޮތުގައި 827،305 ރުފިޔާ އަދި ސަލާމަތީ ސެޓްފިކެޓް ފައިސާގެ ގޮތުގައި ލިބުނު 213،100 ރުފިޔާއެވެ.
އޮޑިޓް އޮފީހުން ވަނީ އެ ފައިސާ ވެސް ޕަބްލިކް ބޭންކު އެކައުންޓަށް ޖަމާކުރުމަށް ލަފާދީފައެވެ.
ފުވައްމުލަކު ސިޓީ -- ފޮޓޯ/ ޔުނެސްކޯ
އޮޑިޓުގައި ދެން ފާހަގަކުރީ ފުވައްމުލަކު ސިޓީގައި އަލަށް މަގު ބައްތި ޖެހުމަށް ހަމަޖެހިފައިވާ ސަރަހައްދުތަކުގައި ބައްތި ޖެހުމުގެ މަސައްކަތް 105 ދުވަސް ތެރޭގައި 1،049،976 ރުފިޔާއަށް މަސައްކަތް ނިންމާ ގޮތަށް، ޖަނަވަރީ 08، 2024ގައި ކުންފުންޏަކާއެކު ވަނީ އެއްބަސްވެފައިވާ ކަމެވެ. ނަމަވެސް އެއްބަސްވެފައިވާ މުއްދަތުގައި މަސައްކަތް ނިމިފައި ނުވާއިރު ކައުންސިލުން އިތުރުކޮށްދިން 30 ދުވަހަށް ފަހު ވެސް އެ ކުންފުނިން އެއްވެސް ވަރަކަށް މަސައްކަތް ފަށާފައި ނުވާއިރު، އިތުރުކުރި މުއްދަތަށް ކައުންސިލުން ޕާފޯމަންސް ގެރެންޓީ އާ ކުރުމަށް ލިޔުމުން ކޮންޓްރެކްޓަރަކަށް އަންގާފައި ނުވާ ކަމަށް އޮޑިޓުގައި ބުންޏެވެ.
އެ އެއްބަސްވުމާ އެއްގޮތަށް އެއްވެސް މަސައްކަތެއް ކުރިއަށް ނުުދިޔުމުން ކައުންސިލް އިދާރާއިން އޮކްޓޫބަރު 07، 2024ގައި ވަނީ އެއްބަސްވުން ބާތިލުކޮށްފައެވެ. ނަމަވެސް ކައުންސިލް އިދާރާއިން ޕާފޯމަންސް ގެރެންޓީ އާ ކޮށްފައި ނުވުމުން ޕާފޯމަންސް ގެރެންޓީގެ ގޮތުގައި ކައުންސިލަށް ނަގަންޖެހޭ 83،998 ރުފިޔާ ނެގުމުގެ ފުރުސަތު ގެއްލިފައިވާ ކަމަށް އޮޑިޓުގައި ބުންޏެވެ.
އޮޑިޓުން ލަފާ ދިނީ މި މައްސަލަ ބަލައި، އެކަމުގައި އިހުމާލުވާ ފަރާތެއްވާނަމަ، އެ ފަރާތަކާ މެދު ފިޔަވަޅު އެޅުމަށެވެ.
އިތުރު މައްސަލައަކަށް އޮޑިޓުން ފާހަގަކުރީ ސިވިލް ސާވިސް ކޮމިޝަނުން އަންގާފައިވާ އެންގެވުމާ ޚިލާފަށް އެޓެންޑެންސް އެލަވަންސް އެ ކައުންސިލްގެ މުވައްޒަފުންނަށް ދީފައިވާ މައްސަލައެކެވެ. އޮޑިޓުގައި ފާހަގަކުރި ގޮތުގައި ސިވިލް ސާވިސް ކޮމިޝަނުން ކަނޑައަޅާފައިވާ އެލަވަންސްތަކުގެ ތެރޭގައި ނުހިމެނޭ އެޓެންޑެންސް އެލަވަންސެއް އެ ކައުންސިލުގެ މުވައްޒަފުންނަށް ދިނުމަށް މިދިޔަ އަހަރުގެ ޖަނަވަރީ 19ގައި ބޭއްވި ޖަލްސާގައާއި މިދިޔަ އަހަރުގެ މާޗު މަހުގެ 13ގައި ބޭއްވި ޖަލްސާއިން ވަނީ ނިންމާފައެވެ. އެގޮތުން މަސައްކަތު ގަޑި ނިމެންދެން މަސައްކަތްކުރާ ކޮންމެ ދުވަހަކަށް 50 ރުފިޔާގެ ރޭޓުން އެޓެންޑެންސް އެލަވަންސް ދެމުން ގެންދާ ކަމަށާއި، އެ ދެމުންދަނީ އާމްދަނީ ފައިސާއިން ކަމަށް އޮޑިޓުގައި ވަނީ ފާހަގަކޮށްފައެވެ.
އޮޑިޓުން ވަނީ އިތުރަށް މުވައްޒަފުންނަށް ދީފައިވާ އެލަވަންސް އަނބުރާ ހޯދުމަށް ވެސް އަންގައިފައެވެ. އަދި އެކަމުގައި ފިޔަވަޅެއް އަޅަންޖެހޭ ފަރާތެއް ވާނަމަ ފިޔަވަޅު އެޅުމަށް ވެސް އޮޑިޓުން ވަނީ ބުނެފައެވެ.