ދުނިޔޭގެ ގިނަ ބައެއްގެ މެދުގައި މަގުބޫލު އެމެރިކާގެ މަޝްހޫރު ޔުނިވަސިޓީ، ހާވާޑްގައި ކިޔަވާ ދަރިވަރުންނަށް ޚާއްސަކޮށްގެން ބާއްވަމުން އަންނަ 23 ވަނަ "އިންޑިއާ ކޮންފަރެންސް"ގައި ބޮލީވުޑްގެ ބަތަލާ ޕްރިޔަންކާ ޗޯޕްރާ ބައިވެރިވާނެކަން އިއުލާނުކޮށްފިއެވެ.
މި ކޮންފަރެންސް އޮންނާނީ އެމެރިކާގެ ހާވާޑް ޔުނިވަސިޓީގައި މި އަންނަ މަހުގެ 14 އިން 15އަށެވެ.
ހާވާޑްގެ ދަރިވަރުން އަމިއްލައަށް އިންތިޒާމްކޮށްގެން ބާއްވަމުން އަންނަ މި ކޮންފެރަންސްގެ މި އަހަރުގެ ތީމް އަކީ "ދި އިންޑިއާ ވީ އިމޭޖިން"އެވެ.
މި ކޮންފަރެންސްގައި އިންޑިއާގެ ސަގާފަތާއި ސިޔާސަތު އެކުލަވާލުމުގައި ގެންގުޅޭ އުސޫލުތަކާ ގުޅޭގޮތުން މަޝްވަރާ ކުރުމުގެ އިތުރުން އެ ގައުމުގެ ތައުލީމާއި ވިޔަފާރީގެ ދާއިރާގައި މަސައްކަތްކުރާ ތަޖުރިބާކާރުންގެ ތަޖުރިބާތައް ދަރިވަރުންނާ ހިއްސާ ކުރެވޭނެއެވެ.
ފިލްމު "ދަ ބްލަފް"ގެ މަންޒަރެއްގައި ބަތަލާ ޕްރިޔަންކާ-- ފޮޓޯ/ ބޮލީވުޑްހަންގާމާ
ބޮލީވުޑްގެ އިތުރުން ހޮލީވުޑްގައި ވެސް ފައިތިލަ ސާބިތުކޮށްފައިވާ ބަތަލާ ޕްރިޔަންކާ ޗޯޕްރާގެ އިތުރުން މި އަހަރުގެ ކޮންފަރެންސްގައި ބައިވެރިވާ ޝަޚްސިއްޔަތުންގެ ތެރޭގައި އިންޑިއާގެ މަޝްހޫރު ލިޔުންތެރިޔާ އަދި ޕާލަމެންޓަރީ މެމްބަރު ޝަޝީ ތަރޫރް އަދި އިންޓަނޭޝަނަލް ރިލޭޝަން ދާއިރާގެ ތަޖުރިބާކާރެއް ކަމަށްވާ އަމީތާބް އަޗަރިއާ ވެސް ބައިވެރިވާނެއެވެ.
މި ކޮންފަރެންސްގައި ބަތަލާ ޕްރިޔަންކާގެ 25 އަހަރުވީ ކެރިއަރުގައި ދިމާވި ގޮންޖެހުންތަކާއެކު ވެސް ކާމިޔާބު ކެރިއަރެއް ބިނާކުރުމަށް ކުރި މަސައްކަތްތަކާއި ކުރެވުނު ތަޖުރިބާތައް ދަރިވަރުންނާ ހިއްސާކުރާނެއެވެ.
މިސް ވޯލްޑްގެ ތާޖު އިންޑިއާއަށް ކާމިޔާބުކޮށްދިން ބަތަލާއަކީ ފިލްމީ ތަރިއެއްގެ އިތުރުން ފިލްމު ޕްރޮޑިއުސްކޮށް ލިޔުންތެރިއެއްގެ ގޮތުގައި ވެސް މަސައްކަތް ކުރަމުން އަންނަ ފަރާތެކެވެ.
ހަމައެއާއެކު ޕްރިޔަންކާއަކީ ޔުނިސެފްގެ ނެޝަނަލް އެމްބެސެޑަރެއްގެ ގޮތުގައި ވެސް މަސައްކަތް ކުރަމުން އަންނަ ފިލްމީ ތަރިއެކެވެ. ގްލޯބަލް ޔުނިސެފްގެ ގުޑްވިލް އެމްބެސެޑަރެއްގެ ގޮތުގައި ހޮވި ކުޑަކުދިންގެ ހައްގުތައް ރައްކާތެރި ކުރުމަށާއި، އަންހެން ކުދިންނަށް ތައުލީމު އުނގަންނައި ދިނުމުގެ މުހިއްމުކަމާ ގުޅޭ ގޮތުން ބަތަލާ ވަނީ ހޭލުންތެރިކަމުގެ އެކި ޕްރޮގްރާމްތައް ހިންގާފައެވެ.
މީގެ އިތުރުން ކުޑަކުދިން ރައްކާތެރިކޮށް އަންހެނުންނާއި ފިރިހެނުންނަށް ހަމަހަމަ އުސޫލުން ޚިދުމަތްތައް ފޯރުކޮށްދިނުމާ ގުޅޭ ގޮތުން ބަތަލާ ވަނީ އެކި ޕްލެޓްފޯމްތަކުގައި ވަކާލާތުކޮށްފައެވެ.
ޕްރިޔަންކާ ދެން އެންމެ އަވަހަށް ބެލުންތެރިންނަށް ފެންނާނީ މި އަންނަ މަހުގެ 26ގައި އެމެޒޯން ޕްރައިމްގައި ޕްރީމިއާކުރާ ފިލްމު "ދަ ބްލަފް"އިންނެވެ.