އަޙްމަދިއްޔާ ސްކޫލުގެ ގްރޭޑު އެކަކުން ފެށިގެން އަށަކަށް ކިޔަވާ ދަރިވަރުންނަށް ތާނަ އާއި ޢަރަބި ލިއުމަކީ މަޖުބޫރު ދެ މާއްދާއެއްގެ ގޮތުގައި ހަމަޖައްސައިފިއެވެ.
'ސަން' އާ ވާހަކަ ދައްކަވަމުން އަޙްމަދިއްޔާ ސްކޫލުގެ ޕްރިންސިޕަލް މުޙައްމަދު ރަޝީދު މިރޭ ވިދާޅުވީ، ސްކޫލު ނިމޭއިރު ބައެއް ދަރިވަރުންނަށް އެ ކުދިންގެ ނަން ވެސް ޢަރަބިބަހުން ލިޔަން ނޭނގޭ ކަމަށާއި، މިހާރު ތާނަވެސް ރީތިކޮށް ލިއުމުގެ ހުނަރު ތަރައްގީނުކުރެވޭ ކަމަށެވެ.
ރަޝީދު ވިދާޅުވީ، ތާނަ އަކުރުތައް އެ އަކުރުތަކުގެ ހަމަތަކާ އެއްގޮތަށް، ލިޔަން އެނގެނީ މަދު ކުއްޖަކަށް ކަމަށެވެ. އަދި، މިހާރު ގޭގޭގައި އިނގިރޭސިބަހުން ބެލެނިވެރިން ކުދިންނާ މުއާމަލާތުކުރާތީ ދިވެހިބަހަށް މިހާރު އޮންނަ ލޯބި ދަށްވެއްޖެކަން އޭނާ ފާހަގަކުރެއްވިއެވެ.
މީގެ ދެ އަހަރު ކުރިން އަޙްމަދިއްޔާ ސްކޫލުގެ ގްރޭޑު ހަތަކާއި އަށަކަށް ތާނައާއި އަރަބި ލިޔަން ދަސްކޮށްދޭން މުދައްރިސުން ހޯދައިގެން އެ މަސައްކަތް ކުރި ކަމަށާއި، މި އަހަރުން ފެށިގެން ގްރޭޑު އެކަކުން އަށަކަށް ތާނައާއި އަރަބި ލިޔަން ދަސްކޮށްދޭން ނިންމީ ކަމަށް، ރަޝީދު ވިދާޅުވިއެވެ.
އެހެންވީމާ ގްރޭޑު އެކަކުން ފަށައިގެން ގްރޭޑު އަށަކަށް، މި އަހަރު ދިރާސީ އަހަރު ފެށުނުއިރުގައި، އަރަބި ތާނަ ލިޔެދޭ މުދައްރިސުން އިއުލާނުކޮށް ހޯދައިގެން އެ މާއްދާއެއްގެ ގޮތުގައި، ރިޕޯޓު ފޮތަށް މާކްސްވެސް އަރާ މާއްދާއެއް ގޮތުގައި މިހާރު އެ އޮތީ އިންޓްރޮޑިއުސްކޮށްފައި ހުރިހާ ކުދިންވެސް ކިޔަވަންޖެހޭ ގޮތަށް،މުޙައްމަދު ރަޝީދު - އަޙްމަދިއްޔާ ސްކޫލުގެ ޕްރިންސިޕަލް
ރަޝީދު ވިދާޅުވީ، މި ދެ މާއްދާއިން ޓާމު ޓެސްޓު ނަގައި، ރިޕޯޓު ފޮތުގައި ގްރޭޑުވެސް ކުރާނެ ކަމަށެވެ.
"މިހާރު ބައްލަވާ، އެސްއެސްސީ އިމްތިހާނުގައި މާކުކުރާ މުދައްރިސުންވެސް އަޅުގަނޑު ގާތުގައި ބުނޭ، ބައެއް ކުދިން ލިޔެފައި ހުންނަ އެއްޗެހި ކިޔާކަށްވެސް ނޭނގެއޭ، މިސާލަކަށް ފާފުތޯ ދާލުތޯ، އެއީ ޅަވިޔަންޏެއްތޯ، ނޫނިއްޔާމު ޓަވިޔަންޏެއްތޯ، ގިނަ ފަހަރަށް ލިޔެފައި ހުންނަ އެއްޗެހި، ދެން ގެސްކޮށްފައި މާކުކުރަނީއޭ،" އޭނާ ވިދާޅުވިއެވެ.
މާލޭގެ އެންމެ ބޮޑު އެއް ސްކޫލު ކަމަށްވާ އަޙްމަދިއްޔާ ސްކޫލުގައި 2،000 އަށްވުރެ ގިނަ ދަރިވަރުން ކިޔަވާއިރު، މި އަހަރުން ފެށިގެން އެ ސްކޫލުގައި ކިޔަވައިދޭނީ އެއް ދަންފަޅިއަށެވެ.