މި ސަރުކާރުގައި ގިނަ ކުންފުނިތަކެއްގެ ޑެޕިއުޓީ މެނޭޖިން ޑިރެކްޓަރު (ޑީއެމްޑީ)ކަން ކުރެއްވި, މުހައްމަދު އަބްދުލްކަރީމް (ރުކުމާ) މޯލްޑިވްސް ގޭސްގެ ޑީއެމްޑީގެ މަގާމުން އިސްތިއުފާ ދެއްވައިފިއެވެ.
އޭނާ އެ މަގާމަށް އައްޔަންކުރެއްވީ މިދިޔަ އަހަރުގެ ޖުލައި މަހުގެ ތެރޭގައެވެ. އެހާތަނަށް އެއީ މި ސަރުކާރުގައި ރުކުމާ ކުންފުނި ބަދަލުކުރެއްވި ތިންވަނަ ފަހަރެވެ. ސަރުކާރު އައުމާއެކު އެންމެ ފުރަތަމަ އޭނާ އައްޔަންކުރެއްވީ ކުނި މެނޭޖުކުރާ ވެމްކޯގެ ޑީއެމްޑީއަކަށެވެ. ނަމަވެސް، 2024 ވަނަ އަހަރުގެ އޮގަސްޓް މަހުގެ ފަހުކޮޅު އޭނާ ވަނީ ފެނަކައިގެ ޑީއެމްޑީއަކަށް ބަދަލު ކުރައްވައިފައެވެ.
އޭގެ ފަހުން ދެން ބަދަލުވެ ވަޑައިގެންނެވީ މޯލްޑިވް ގޭސްގެ ޑީއެމްޑީގެ މަގާމަށެވެ.
ރުކުމާ މިއަދު "ސަން"އަށް ވިދާޅުވީ، ސަރުކާރު ހިއްސާވާ އެހެން ކުންފުންޏެއްގެ ޑީއެމްޑީގެ މަގާމަށް ދިއުމަށްޓަކައި މޯލްޑިވް ގޭސްގެ ޑީއެމްޑީގެ މަގާމުން އިއްޔެ އިސްތިއުފާ ދެއްވާފައިވާ ކަމަށެވެ.
ދެން ވަޑައިގަންނަވާ ކުންފުންޏާއި މޯލްޑިވް ގޭސް ދޫކޮށްލެއްވި ސަބަބެއް ރުކުމާ ވިދާޅެއް ނުވެއެވެ.
މި ސަރުކާރުގައި މޯލްޑިވް ގޭސްއަކީ ހިންގުން ދޯދިޔާވެފައިވާކަމުގެ ތުހުމަތާއި ހިޔާނާތުގެ ތުހުމަތުތަކެއް ވެސް ކުރެވިފައިވާ ކުންފުންޏެކެވެ. އެ ގޮތުން، އެ ކުންފުނިން ގޭސް ގަތުމަށް ފައިސާ ދެއްކި ނަމަވެސް ގޭސް ޝިޕްމަންޓެއް ނުލިބޭ މައްސަލައެއް ވެސް ފެންމަތިވެ, އެކަން ތަހުގީގީ އިދާރާތަކުން ބަލަން ވެސް ފެށިއެވެ.
މޯލްޑިވް ގޭސްގެ މެނޭޖިން ޑިރެކްޓަރަކީ ކުރިން ޓީޗަރަކަށް އުޅުއްވުމަށް ފަހުން ސިޔާސީ މައިދާނަށް ނުކުންނެވި, އަބްދުﷲ މުޙައްމަދެވެ.