މީހެއްގެ މީސްމީޑިއާ އެކައުންޓުތައް ހެކުކޮށް، އެ މީހާގެ އެކައުންޓުތަކުން 279،000 އަށް ވުރެ ގިނަ ރުފިޔާ ނެގި މައްސަލައަކާ ގުޅިގެން ފުލުހުން 10 މީހުން ހައްޔަރުކޮށްފިއެވެ.
ފުލުހުން ބުނީ، މީހެއްގެ މީސްމީޑިއާ އެކައުންޓުތައް ހެކުކޮށް އޭނާގެ ހިއްސާ އޮންނަ ކުންފުނީގެ ބޭންކު އެކައުންޓުން 279،000 އަށްވުރެ ގިނަ ރުފިޔާ ނަގާފައިވާ މައްސަލައަކާ ގުޅިގެން 10 މީހަކު ހައްޔަރުކުރީ އެ މައްސަލައާ ގުޅިގެން ހިންގި ކޯޓު އަމުރެއްގެ ދަށުން ކަމަށެވެ.
މިދިޔަ ބުދަ ދުވަހުން ފެށިގެން ހިންގި މި އޮޕަރޭޝަނުގައި ގޭންގު ކްރައިމާއި ހިންމަފުށީ ފުލުހުންނާއި އައްޑޫ ހިތަދޫގެ ފުލުހުން ބައިވެރިވި ކަމަށް ފުލުހުން ބުންޏެވެ.
މި މައްސަލައިގައި ފުލުހުން ހައްޔަރުކުރީ 10 މީހުންނަކީ:
- ލ. އިސްދޫ / ގުޑްލައިފް، މުޙައްމަދު ޙަސަން (59އ)
- އައްޑޫ ހިތަދޫ / އުދަ، އަލީ ޢިރުފާނު އަޙްމަދުދީދީ (26އ)
- އައްޑޫ ހިތަދޫ / ނަންރީތިގެ، ޢަލީ ޝިރާޒު (38އ)
- ހދ. ވައިކަރަދޫ / ޕެރިމްރޯޒް، ޢަބްދުﷲ ނާފިޛް (39އ)
- ގއ. ކަނޑުހުޅުދޫ / ފޫހިވާގެ، މުޙައްމަދު ޢަލީ (42އ)
- މ. މާލޭގެއާގެ / މާލެ، މުޙައްމަދު ނުހާދު ޢަލީ (30އ)
- ހއ. ކެލާ / ޕެނަމާ، މުޙައްމަދު ސިމާދު (38އ)
- ގދ. ފިޔޯރީ / ހީނާމާގެ، އަލީ އިމްރާން (38އ)
- ގދ. ތިނަދޫ / ގުލްބަކާގެ، ޢަބްދުﷲ އިސްރާޤް (19އ)
- ކ. ހިންމަފުށި / މެޑޯޒް، މުޙައްމަދު އިބްރާހީމް (49އ)
މި މީހުންގެ ތެރެއިން އެކަކު ހިންމަފުށިން ހައްޔަރުކުރިއިރު، ތިން މީހަކު އައްޑޫން ހައްޔަރުކުރި ކަމަށާއި، ބާކީ ތިބި މީހުން ހައްޔަރުކުރީ މާލޭން ކަމަށް ފުލުހުން ބުންޏެވެ.
މި 10 މީހުންގެ ތެރެއިން ހަ މީހަކު، ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް ފައިސާ ނަގާފައިވާ ކަމަށާއި، އެ ތަނުން އެކަކު ސްކޭމްކޮށްގެން ހޯދާފައިވާ ފައިސާ އެކި ވިޔަފާރިތަކަށް ޖަމާކޮށް، އެ ފައިސާއަށް މުދާ ގަނެފައިވާ ކަމަށް ފުލުހުން ބުންޏެވެ. އަދި، އަނެއް ތިން މީހުންނަކީ އެކި މީހުން އޭޓީއެމަށް ގެންގޮސް، އެ މީހުން މެދުވެރިކޮށް އޭޓީއެމުން ފައިސާ ނެގުމަށް ފަހު އެ ފައިސާތަކާ ހަވާލުވެފައިވާ މީހުން ކަމަށް ފުލުހުން މައުލޫމާތު ދެއެވެ.
މި މައްސަލައާ ގުޅިގެން ހައްޔަރުކުރި 10 މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން މުޙައްމަދު އިބްރާހީމް ފަސް ދުވަހަށް، މުޙައްމަދު ޢަލީއާއި މުޙައްމަދު ޙަސަން ހަތް ދުވަހަށް، ޢަލީ ޢިރުފާން އަޙްމަދުދީދީ 10 ދުވަހަށް، އަދި ބާކީ ތިބި މީހުން 15 ދުވަހަށް ބަންދުކުރުމަށް ވަނީ އަމުރުކޮށްފައި ކަމަށް ފުލުހުން ބުންޏެވެ.
ފުލުހުން ބުނީ، މި މައްސަލަ ފުލުހުންގެ އެންޓި ސްކޭމް ސެންޓަރުން ބަލަމުން އަންނަ ކަމަށެވެ.