ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ ވެރިކަމުގައި މުޒާހަރާގެ ބައިވެރިންނާ ދެކޮޅަށް ހިންގި ލާއިންސާނީ އަމަލުތަކާ ގުޅިގެން، ވެރިރަށް ޑާކާގެ ކުރީގެ ފުލުހުންގެ ވެރިޔާ ހަބީބުއްރަހްމާނާއި އިތުރު ދެ އޮފިސަރަކު މަރަން އެގައުމުގެ ކޯޓުން މިއަދު ހުކުމްކޮށްފިއެވެ.
ބަންގްލަދޭޝްގެ ކޯޓުން އިއްވި މި ހުކުމުގައި، ހަބީބުއްރަހްމާންގެ އިތުރުން ދެން ތިބި ދެ އޮފިސަރުން ވެސް ދަންޖައްސައިގެން މަރަން ވަނީ އަމުރުކޮށްފައެވެ.
މި ތިން މީހުންގެ މައްޗަށް މި ހުކުމް އިއްވާފައިވަނީ އެ މީހުންގެ ޣައިރު ހާޒިރުގައެވެ. މި މީހުން މިހާރު ތިބި ތަނެއް ކަމާބެހޭ ފަރާތްތަކަށް އެނގިފައެއް ނުވެއެވެ.
ބަނގްލާދޭޝްގެ ކުރީގެ ބޮޑުވަޒީރު ޝެއިޚް ހަސީނާ -- މިހާރު ހުންނެވި ފިއްލަވައިގެން އިންޑިއާގައި -- ފޮޓޯ: އޭޕީ
މި މައްސަލައަކީ 2024 ވަނަ އަހަރުގެ އޯގަސްޓް މަހުގެ ފަސް ވަނަ ދުވަހު، މުޒާހަރާގެ ބައިވެރިން ބޮޑުވަޒީރުގެ ގަނޑުވަރުކޮޅަށް ވަދެގަތުމާ ގުޅިގެން ހަސީނާ ފިލައިގެން އިންޑިއާއަށް ވަޑައިގަތް ދުވަހު، ޑާކާގައި ފުލުހުން ބަޑިޖަހައި ހަ މީހަކު މަރާލި މައްސަލައެވެ.
ހުކުމުގައި ފަނޑިޔާރު ގޯލަމް މުރުތަޒާ މުޒަމްދަރު ވިދާޅުވީ، ފުލުހުން މުޒާހަރާގެ ބައިވެރިންނާ ދެކޮޅަށް ނުރައްކާތެރި ހަތިޔާރު ބޭނުންކޮށްފައިވަނީ ހަބީބުއްރަހްމާން ފޮނުވި މެސެޖުތަކަކުން ދީފައިވާ އަމުރަށް ކަމަށެވެ.
މި މައްސަލާގައި އިތުރު ފަސް ފުލުހަކަށް އެކި މުއްދަތުގެ ޖަލު ހުކުމްތައް ވަނީ އިއްވާފައެވެ. ނަމަވެސް، ޗީފް ޕްރޮސެކިއުޓާ ތާޖުލް އިސްލާމް ވިދާޅުވީ އެ ފަސް މީހުންނަށް ވެސް މިއަށްވުރެ ހަރުކަށި އަދަބެއް ދިނުމަށް އެދޭ ކަމަށެވެ.
އދ. އިން އާންމުކޮށްފައިވާ ތަފާސްހިސާބުތަކަށް ބަލާއިރު، 2024 ވަނަ އަހަރުގެ ޖުލައި އަދި އޯގަސްޓް މަހު ހަސީނާގެ ސަރުކާރުން މުޒާހަރާތައް ހުއްޓުވުމަށް ހިންގި ލާއިންސާނީ ހަރަކާތްތަކުގައި 1,400 އެއްހާ މީހުން މަރުވެފައިވެއެވެ.
މިދިޔަ ނޮވެމްބަރު މަހު ހަމަ މި ކޯޓުން ވަނީ ޝައިޚް ހަސީނާގެ މައްޗަށް ވެސް މަރުގެ ހުކުމް އިއްވާފައެވެ.
މީގެ އިތުރުން، ކުރީގެ އިންޓީރިއާ މިނިސްޓަރު އަސަދުއްޒަމާން ޚާން ކަމާލް ވެސް ވަނީ މަރަން ހުކުމްކޮށްފައެވެ. ނަމަވެސް، ކުށަށް އިއުތިރާފުވި ކުރީގެ ޕޮލިސް ޗީފް ޗައުދަރީ އަބްދުﷲ އަލް މައުމޫނަށް އިއްވާފައިވަނީ ފަސް އަހަރުގެ ޖަލު ހުކުމެކެވެ.
މި ހުކުމްތައް އިއްވާފައި މިވަނީ، ހަސީނާގެ ވެރިކަން ވެއްޓުނު ފަހުން ބަންގްލަދޭޝްގައި ބާއްވާ ފުރަތަމަ އިންތިޚާބު އަންނަ މަހުގެ 12 ވަނަ ދުވަހު ބޭއްވުމަށް ތައްޔާރުވަމުންދާ ދަނޑިވަޅެއްގައެވެ.