މި ސަރުކާރުން އިއުލާނުކޮށްފައިވާ އާއިލާ ބޯހިޔާވަހިކަމުގެ ސްކީމްގެ ތެރެއިން އެންމެ ބޮޑު އިސްކަމެއް ދޭނީ އެއްވެސް ބޯހިޔާވަހިކަމެއް ނެތް އާއިލާތަކަށް ކަމަށާއި އެ ނޫން މީހުން އަންނާނީ އޭގެ ފަހުން ކަމަށް ހައުސިން މިނިސްޓަރު ޑރ. ޢަބްދުﷲ މުއްޠަލިބް މިއަދު ވިދާޅުވެއްޖެއެވެ.
ސަރުކާރުން ވަނީ އާއިލީ ބޯހިޔާވަހިކަމުގެ ސްކީމްގެ ތެރެއިން 15،000 ގޯއްޗާއި 7،900 ފުލެޓަށް އެދި ކުރިމަތުލުމުގެ ފުރުސަތު ހުޅުވާލާފައެވެ.
އެ ސްކީމާ ގުޅޭ ގޮތުން ލިންކްޑްއިންގައި ކުރެއްވި ޕޯސްޓެއްގައި މިނިސްޓަރު މުއްޠަލިބް ވިދާޅުވީ، ފާއިތުވި ދުވަސްތަކުގައި ބޯހިޔާވަހިކަމުގެ ސްކީމަށް ޝަރުތު ހަމަވުމާ ގުޅޭ ގޮތުން ގިނަ ބަޔަކު ސުވާލުކޮށް، ކަންބޮޑުވުން ފާޅުކުރަމުން އަންނަ ކަމަށެވެ. އެހެންވެ، ސްކީމާ ގުޅޭ މައުލޫމާތުތައް އޭނާ ވަނީ ވަރަށް ތަފުސީލީ ގޮތެއްގައި ހިއްސާކުރައްވާފައެވެ.
އެ ގޮތުން، މިނިސްޓަރު ވިދާޅުވި ގޮތުގައި ދެމަފިރިންގެ ތެރެއިން އެކަކުގެ ދެ ކޮޓަރީގެ ނުވަތަ އެއް ކޮޓަރީގެ ބޯހިޔާވަހިކަމެއް ހުރި ނަމަވެސް 18 އަހަރުން ދަށުގެ ދަރިން ތިބި ނަމަ މި ސްކީމަށް ކުރިމަތިލެވޭނެއެވެ.
ރަސްމާލޭގެ ބިން ހިއްކަނީ: ހުޅުމާލޭ ތިންވަނަ ފިޔަވަހީގެ ބިން ވެސް ވަނީ ހިއްކާ ނިންމާފައި --- ފޮޓޯ/ ރައީސް އޮފީސް
"ސަރުކާރުގެ ބޯހިޔާވަހިކަމުގެ ސްކީމެއް އޮންނަނީ އެންމެ ސަބަބަކަށްޓަކައި. އެއީ، އެންމެ އަސާސީ ހައްގުތަކާއި ހަމަޖެހުން އެއްވެސް އާއިލާއަކަށް ނުގެއްލޭނެކަން ކަށަވަރުކުރަން. އެއީ، އިތުރުކުރަން ލިބޭ ބޯނަސްއެއް ނޫން،" މިނިސްޓަރު މުއްޠަލިބް ވިދާޅުވިއެވެ.
އޭނާ ވިދާޅުވީ، އާއިލާއެއްގެ އެއްވެސް ބޯހިޔާވަހިކަމެއް ނެތް ނަމަ ލިބޭ ގެއްލުން ބޮޑުވާނެ ކަމަށެވެ. ކޮންމެ ވެސް ވަރެއްގެ ބޯހިޔާވަހިކަމެއް އޮތް އާއިލާތަކަށް އެ ވަރުގެ ގެއްލުމެއް ނުލިބޭނެ ކަމަށް އޭނާ ވިދާޅުވިއެވެ.
ސަރުކާރުގެ ބޯހިޔާވަހިކަމުގެ ސްކީމްގެ މައިގަނޑު އަސާސަކީ ކޮންމެ ވެސް އެއްޗެއް އޮތް މީހުންނަށްވުރެ އެއްވެސް އެއްޗެއް ނެތް މީހުންނަށް އިސްކަން ދިނުން ކަމަށެވެ. އެއީ، އެންމެ ބޮޑު ގެއްލުން ލިބުނަ ނުދޭން ސަރުކާރުން މަސައްކަތްކުރުމުގެ ވިސްނުމެއް ކަމަށް އޭނާ ވިދާޅުވިއެވެ.
އެ ގޮތުން، މުއްޠަލިބް ވިދާޅުވީ އެއްވެސް ބޯހިޔާވަހިކަމެއް ނެތް އާއިލާތަކަށް އެއްވެސް ބެކަޕްއެއް، އަދި ޚަރަދު ބޮޑުވުން ފަދަ ހާލަތެއްގައި ވެސް އިތުރު ގޮތެއް ނޯންނާނެ ކަމަށެވެ.
"ކޮންމެ ސައިޒެއްގެ ވިޔަސް ކޮންމެ ވެސް ވަރެއްގެ ބޯހިޔާވަހިކަމެއް ލިބިފައިވާ އާއިލާތަކަށް ކޮންމެ ވެސް ވަރެއްގެ ސެކިއުރިޓީއެއް އެބަ ލިބޭ، އެންމެ ރަނގަޅު ނޫނަސް. ރިސޯސްތައް މަދުވީމާ، އެންމެ ބޭނުންޖެހިފައިވާ މީހުންނަށް އިސްކަން ދިނުމަކީ ތަފާތުކުރުމެއް ނޫން. އެއީ ޒިންމާއެއް،" މިނިސްޓަރުގެ ޕޯސްޓުގައި އިނގިރޭސިބަހުން ލިޔެފައިވެއެވެ.
އޭނާ ވިދާޅުވީ، މި އުސޫލަކީ ދާއިމީ ގޮތެއްގައި އޮންނާނެ އެއްޗެއް ނޫން ކަމަށެވެ.
މި ފަދަ ނިންމުންތައް ނިންމަންޖެހެނީ މި ވަގުތު ބޯހިޔާވަހިކަމަށް އޮތް ޑިމާންޑާ އެއްވަރަށް ސަޕްލައި ނުއުފެއްދޭތީ ކަމަށާއި ސަރުކާރުން ބޯހިޔާވަހިކަން ފޯރުކޮށްދެމުން އަންނަ ވަރަކަށް އެ ކަންކަން މަޑުމަޑުން ހައްލުވަމުން އަންނާނެ ކަމަށް މިނިސްޓަރު ވިދާޅުވިއެވެ.
އޭރުން ޝަރުތުތައް މަދުކޮށް، ކުރިމަތިލެވޭ މީހުން ގިނަކޮށް، ވީހާ ވެސް ގިނަ މީހުންނަށް ފުރުސަތު ހުޅުވައިދޭނެ ކަމަށް އޭނާ ވިދާޅުވިއެވެ.
މި ސްކީމަށް އާއިލީ ބޯހިޔާވަހިކަން ކިޔަން ޖެހުނު ސަބަބަކީ ވެސް ބޯހިޔާވަހިކަމަކީ އާއިލާތަކަށް އަސަރުކުރާ ކަމަކަށްވުމުން ކަމަށް އޭނާ ވިދާޅުވިއެވެ. އެ ގޮތުން، ދުވަސްވީ މީހުންނާއި ކުޑަކުދިންނާއި ނުކުޅެދުންތެރިކަން ހުންނަ މީހުން ބަލާ އާއިލާތަކަށް އިސްކަން ދޭންޖެހޭނެ ކަމަށް އޭނާ ވިދާޅުވިއެވެ.
"އެއީ ބާކީ ކުރުމެއް ނޫން. އެއީ އެންމެ ރިސްކް ބޮޑު މީހުންނަށް އިސްކަން ދިނުން،" އޭނާ ވިދާޅުވިއެވެ.
މިނިސްޓަރު ވިދާޅުވީ، އާއިލީ ބޯހިޔާވަހިކަން ސްކީމްގެ އެންމެ މުހިންމު އަސާސަކީ ކޮންމެ އާއިލާއަކަށް ވެސް އުޅޭނެ ތަނެއް ހޯދައިދިނުން ކަމަށެވެ. އެއަށް ފަހު، މަޑުމަޑުން ދެން ހުރި ކަންކަން ރަނގަޅުކުރަމުން ގެންދެވޭނެ ކަމަށް އޭނާ ގަބޫލުކުރައްވައެވެ.
ހައުސިން މިނިސްޓްރީން ގޯއްޗާއި ފުލެޓަށް އެދި ކުރިމަތިލާން ހުޅުވާލީ ވެބްސައިޓެއް މެދުވެރިކޮށެވެ. މި ގޮތުން، ގޯއްޗަށް އެދުމުގެ ފުރުސަތު ދީފައިވަނީ އަންނަ މާރިޗު ފަސްވަނަ ދުވަހުގެ 23:59އަށް ކަމަށްވާއިރު، ފުލެޓަށް އެދި އެޕްލައިކުރެވެނީ އަންނަ އޭޕްރީލް 18 ގެ 23:59 އަށެވެ.
މި ސްކީމުގެ ދަށުން 7900 ފުލެޓު ދޫކުރާއިރު، 1250 އަކަފޫޓުގެ 15,000 ގޯތި ދޫކުރަން ހަމަޖެހިފައިވެއެވެ. އޭގެ ތެރެއިން ގޯތި ދޫކުރަނީ ދެ ކެޓަގަރީން ކަމަށްވާއިރު މާލޭ ރަށްވެހިންނަށް އަދި ޚާއްޞަ އިސްކަންދެވޭ ކެޓަގަރީތަކަށް ގޯތި ދޫކުރުމަށް ހަމަޖެހިފައިވަނީ ގްރޭޓާ މާލޭ ސަރަހައްދުންނާއި ރަސްމާލެއިންނެވެ. އަދި، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރަން ހަމަޖެހިފައިވަނީ ހަމައެކަނި ރަސްމާލެއިންނެވެ.