ފިލިޕީންސްގެ ދެކުނުގެ ޕްރޮވިންސެއް ކަމަށްވާ ބަސިލަން ކައިރިއަށް، 350 އަށްވުރެ ގިނަ މީހުންނާއެކު ދަތުރުކުރި ފެރީއެއް ބަންޑުންޖަހާލައި، 15 މީހުން މަރުވެއްޖެ ކަމަށް އެ ގައުމުގެ އޮފިޝަލުން ބުނެފިއެވެ.
"އެމްވީ ޓްރިޝާ ކާސްޓިން 3" ނަމަކަށް ކިޔާ މި ފެރީ ބަންޑުންޖަހާލާފައިވަނީ ހޯމަ ދުވަހުގެ މެންދަމުގެ ވަގުތެއްގައެވެ. މި އުޅަނދު ދަތުރުކުރަމުން ދިޔައީ ޒަމްބޮއަންގާ ސިޓީން ފުރައިގެން ސޫލޫ ޕްރޮވިންސްގެ ޖޯލޯ އައިލެންޑަށެވެ.
ފިލިޕީންސްގެ ކޯސްޓްގާޑުން ބުނި ގޮތުގައި، 332 ފަސިންޖަރުންނާއި 27 ފަޅުވެރިންނާއެކު ދަތުރުކުރި މި ފެރީން ނުރައްކަލުގެ ސިގްނަލް ދީފައިވަނީ ހޯމަ ދުވަހުގެ ފަތިހު 1:50 ގައެވެ. އެއީ ޒަމްބޮއަންގާ ސިޓީން ފުރިތާ ގާތްގަނޑަކަށް ހަތަރު ގަޑިއިރު ފަހުންނެވެ.
މި ހާދިސާ ހިނގި ވަގުތު މޫސުން ރަނގަޅު ކަމަށް ކޯސްޓްގާޑުން މައުލޫމާތު ދެއެވެ. ފެރީ ބަންޑުންޖަހާލާފައިވަނީ ބަސިލަން ޕްރޮވިންސްގެ ބަލޫކް-ބަލޫކް އަވަށާ ގާތްގަނޑަކަށް ދެ ކިލޯމީޓަރު ބޭރުންނެވެ.
ސަދަން މިންޑަނާއޯ ޑިސްޓްރިކްޓްގެ ކޯސްޓްގާޑް ކޮމާންޑަރު ރޮމެލް ދުއާ ވިދާޅުވި ގޮތުގައި، މިހާތަނަށް 316 މީހުން ވަނީ ސަލާމަތް ކުރެވިފައެވެ. ނަމަވެސް 15 މީހަކު މަރުވެފައިވާކަން ކަށަވަރު ކުރެވިފައިވާއިރު، 28 މީހަކު އަދިވެސް ފެނިފައެއް ނުވެއެވެ. މީހުން ހޯދުމުގެ މަސައްކަތުގައި ކޯސްޓްގާޑުގެ މަތިންދާބޯޓެއްގެ އިތުރުން ނޭވީ އާއި އެއާފޯސްގެ ވަސީލަތްތައް ވެސް ދަނީ ބޭނުންކުރަމުންނެވެ.
ސަލާމަތްކުރެވުނު މީހުންގެ ތެރެއިން ސިއްހީ އެހީތެރިކަން ބޭނުންވާ މީހުންނަށް އިޒަބެލާ ސިޓީގެ ހޮސްޕިޓަލްތަކުގައި ދަނީ ފަރުވާ ދެމުންނެވެ. ބަސިލަންގެ ގަވަރުނަރު މުޖީވް ހަތަމަން ވިދާޅުވީ، ގިނަ މީހުންގެ ހާލު ރަނގަޅު ނަމަވެސް އުމުރުން ދުވަސްވީ ބައެއް މީހުންނަށް ކުއްލި ފަރުވާ ދޭންޖެހިފައިވާ ކަމަށެވެ.
ކޯސްޓްގާޑުން ބުނި ގޮތުގައި ފެރީ ބަންޑުންޖަހާލަން މެދުވެރިވި ސަބަބެއް އަދި ސާފެއް ނުވެއެވެ. ނަމަވެސް އެ އުޅަނދު ބަނދަރުން ފުރިއިރު އޯވަލޯޑް ކޮށްފައިވާ ކަމުގެ ނިޝާނެއް ފެންނަން ނެތް ކަމަށް އޮފިޝަލުން ވިދާޅުވިއެވެ.
ސަލާމަތްކުރާ މީހުންގެ ޓީމްތަކުން އެހީތެރިވަނީ --- ފޮޓޯ: އަލްޖަޒީރާ
ފިލިޕީންސްއަކީ ކަނޑުމަތީގެ ނުރައްކާތެރި ހާދިސާތައް އާންމުކޮށް ހިނގާ ގައުމެކެވެ. މީގެ މައިގަނޑު ސަބަބުތަކުގެ ތެރޭގައި ގިނައިން ތޫފާންތައް ކުރިމަތިވުމާއި، އުޅަނދުފަހަރު ރަނގަޅަށް މަރާމާތު ނުކުރުމާއި، ގަވާއިދާ ހިލާފަށް މީހުން ބަރުކުރުން ހިމެނެއެވެ.
މިދިޔަ ހަފުތާގައިވެސް އެ ގައުމުގައި ކަނޑުމަތީގެ އިތުރު ދެ ހާސިދާއެއް ހިނގައި ބައެއް މީހުން ވަނީ މަރުވެފައެވެ.