ކުރިއަށް އޮތް ލޯކަލް ކައުންސިލް އިންތިޚާބު ކާމިޔާބުކުރަން ޕާޓީގެ އެންމެން ގަދައަށް މަސައްކަތް ކުރާނެކަމުގެ ޔަގީންކަން އެބައޮތް ކަމަށް ކުރީގެ ރައީސް އިބްރާހިމް މުހައްމަދު ޞާލިހު މިއަދު ވިދާޅުވެއްޖެއެވެ.
ވާދަވެރި ކެމްޕެއިނަކަށް ފަހުގައި، 154 ކެންޑިޑޭޓުން ވާދަކުރި އެމްޑީޕީގެ ޕްރައިމަރީ އިއްޔެ ވަނީ ބާއްވާފައެވެ. އެ ޕްރައިމަރީގައި މާލޭގެ މޭޔަރުގެ ޓިކެޓު އާދަމް އާޒިމާއި މައްޗަންގޮޅި އުތުރު ދާއިރާގެ ޓިކެޓު ހަދީޖާ މުހައްމަދު (ހައްޖަ) ވަނީ ކާމިޔާބުކޮށްފައެވެ.
ޞާލިހު މިއަދު އެކްސްގައި ވަނީ އެ އިންތިޚާބުގައި އެމްޑީޕީގެ ޓިކެޓު ކަށަވަރުކުރި ކެންޑިޑޭޓުންނަށް މަރުހަބާ ދަންނަވާފައެވެ.
އެމްޑީޕީގެ އިސްވެރިން: ސޯލިހު ވިދާޅުވީ، ކައުންސިލް އިންތިޚާބު ކާމިޔާބު ކުރުމަށް ޕާޓީގެ އެންމެން ގަދައަށް މަސައްކަތް ކުރާނެ ކަން ޔަގީން ---- ސަން ފޮޓޯ/ ހުސައިން ހާފިޒު
މި ގޮތުން، ޕްރައިމަރީ ވޯޓުގެ އެންމެހާ އިންތިޒާމުތައް ފުރިހަމައަށް ހަމަޖައްސަވައި ކުރިއަށް ގެންދިޔަ ކަމަށްޓަކައި، ޕާޓީގެ ލީޑަޝިޕާއި ހަރަކާތްތެރިންނަށް އެ މަނިކުފާނު ވަނީ ޝުކުރު ދަންނަވަފާއެވެ.
ޞާލިހު ވިދާޅުވީ، ލޯކަލް ކައުންސިލް އިންތިޚާބު އެޕާޓީއަށް ކާމިޔާބު ކަށަވަރުކުރުމަށްޓަކައި ޕާޓީގެ ލީޑަޝިޕާއި ހުރިހާ މެންބަރުން އެކުގައި ގަދައަށް މަސައްކަތްކުރާނެކަމުގެ ފުރިހަމަ ޔަގީންކަން އެބައޮތް ކަމަށެވެ.
ޞާލިހު އެ ފަދައިން ވިދާޅުވިއިރު، މިއީ އިދިކޮޅު އެމްޑީޕީގެ 20 އަހަރުގެ ދިގު ތާރީޚުގައި ވެސް އެންމެ ރަނގަޅަށް ކަންކަންދިޔަ އެތެރޭގެ އެއް އިންތިޚާބުކަމަށް އެ ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ ވަނީ ވިދާޅުވެފައެވެ.
ސަރުކާރު ހިންގާ ޕީއެންސީގެ ޕްރައިމަރީ ވެސް ބާއްވާފައިވާއިރު، ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގައި ވާދަކުރުމަށް ހުށަހަޅަން އިލެކްޝަންސް ކޮމިޝަނުން މިއަދު ވަނީ ހުޅުވާލާފައެވެ. އެ ކަމަށް އީސީން، ފުރުސަތު ދިނީ ދެ ހަފުތާގެ މުއްދަތަކަށެވެ.
އެތެރޭގެ ބައިބައިވުމާއި ދެބަސްވުމުގެ ސަބަބުން އެމްޑީޕީއަށް ފާއިތުވި އިންތިޚާބުތަކުގައި ގިނަ ގޮންޖެހުންތަކެއް ކުރިމަތިވިއެވެ.
އެ ގޮތުން، 2023 ގެ ރިޔާސީ އިންތިޚާބުގައި ޕްރައިމަރީން ނާކާމިޔާބުވި ކުރީގެ ރައީސް މުހައްމަދު ނަޝީދުގެ ފެކްޝަނުން އޭރު އުފެއްދި ދަ ޑިމޮކްރެޓްސްއިން ވާދަކުރުމުން އެމްޑީޕީއަށް ދަތިތަކާ ކުރިމަތިވިއެވެ. އަދި، ޑިމޮކްރެޓްސްއާއި އެމްޑީޕީން ވަކިން ވާދަކުރި މަޖިލީސް އިންތިޚާބުގައި ވެސް އެމްޑީޕީއަށް ކާމިޔާބުވީ އެންމެ 12 ގޮނޑިއެވެ.
އެކަމަކު، އޭގެ ފަހުން ނަޝީދާއި ޑިމޮކްރެޓްސްގެ އިސްވެރިން ވަނީ އެނބުރި އެމްޑީޕީއާ ގުޅިފައެވެ. އެ ޕާޓީން އަންނަނީ އެކުގައި މަސައްކަތްކުރަން ގިނަ މަސައްކަތްތަކެއް ކުރަމުންނެވެ.