ކޭ ޕާކް ފްލެޓްތައް، މަކަރާއި ހީލަތުން އެތައް ބަޔަކަށް ވިއްކުމުގެ މައްސަލައިގައި 159 އަހަރަށް ޖަލަށްލާން ހުކުމްކޮށްފައިވާ ރ. އަލިފުށީ ކިނާރާ ޖައިޝާން ސައީދު، ބޭންކުން ނަގާފައިވާ ލޯނެއްގެ މައްސަލައިގައި އެއް އަހަރު ދުވަހުގެ ތެރޭގައި ގާތްގަނޑަކަށް 200،000 ރުފިޔާ ދައްކަން ހުކުމްކޮށްފިއެވެ.
ހުޅުމާލޭގައި ތަރައްގީ ކުރަން ފެށި 'ކޭ ޕާކް ރެޒިޑެންސް'ގައި ހިމެނޭ އެޕާޓްމަންޓުތަކުގެ ތެރެއިން ބައެއް ޔުނިޓުތައް އެތައް ބަޔަކަށް ވިއްކައި ފައިސާ ހޯދާފައިވާ މައްސަލައިގައި ޖައިޝާންގެ މައްޗަށް ކުރި 95 ދައުވާގެ ތެރެއިން 86 ދައުވާއެއް އޭނާގެ މައްޗަށް ވަނީ ސާބިތު ވެފައެވެ.
ސާބިތުވި 86 ދައުވާއާ ގުޅިގެން މިދިޔަ މަހުގެ 31ގައި އޭނާގެ މައްޗަށް އިއްވީ 159 އަހަރުގެ ޖަލު ހުކުމެކެވެ. އެއީ ޓެކުމުގައި ބައިވެރިވުމުގެ 45 ދައުވާގައި 139 އަހަރުގެ ޖަލު ހުކުމަކާއި އޮޅުވާލުމުގެ އަމަލެއް ކުރުމުގެ 40 ދައުވާގައި 13 އަހަރުގެ ޖަލު ހުކުމަކާއި މަނީ ލޯންޑްރިންއަށް އެހީވުމުގެ ކުށުގައި ފަސް އަހަރަށް ޖަލަށްލުމާއެކު ތިން ލައްކަ ރުފިޔާގެ ޖޫރިމަނާ އެކެވެ.
އެ ހުކުމާއެކު ޖަލުގައި ހުރި ޖައިޝާންގެ މައްޗަށް މި ހަފުތާގައި ސިވިލް ކޯޓުން އިއްވި ހުކުމަކީ ބޭންކުން ނަގާފައިވާ 300،000 ރުފިޔާގެ ލޯނެއް، އެއްބަސްވީ ގޮތަށް ނުދައްކައިގެން ކުރި ހުކުމެކެވެ. ލޯން ފައިސާ ނުދައްކައިގެން ހުކުމް ކުރީ، ބާކީ ނުދައްކައި އޮތް 188،819 ރުފިޔާ އެއް އަހަރު ތެރޭ ދައްކާށެވެ.
ސިވިލް ކޯޓުން މި މައްސަލައިގެ ހުކުމް ކުރީ ޖައިޝާންގެ ޣައިރު ހާޒިރުގައެވެ.
ކޭ ޕާކް ފުލެޓުތަކުގެ މައްސަލައިގައި މަންޑޭގެ މައްޗަށް 94 ދައުވާއެއް ސާބިތުވުމާ ގުޅިގެން، އޭނާ 397 އަހަރަށް ޖަލަށްލާން ކްރިމިނަލް ކޯޓުން ވަނީ ހުކުމް ކޮށްފައެވެ. އެއީ މިހާތަނަށް ރާއްޖޭގައި އިއްވި އެންމެ ދިގު ޖަލު ހުކުމެވެ.
މަންޑޭގެ މައްޗަށް އިއްވި ޖަލު ހުކުމްގެ އިތުރުން މަނީ ލޯންޑްރިންގެ ކުށުގައި މަންޑޭ 30 މިލިއަން ރުފިޔާއިން ޖޫރިމަނާ ކުރުމާއެކު، ހުޅުމާލެއިން އޭނާ ގަނެފައިވާ ޕެންޓްހައުސް ދައުލަތަށް ނެގުމަށް ވެސް ކޯޓުން އަމުރުކުރިއެވެ.