ސިޓީއަށް އިތުރު ހާސްކަން: ހާލަންޑަށް އަނިޔާވެ، ގިނަ ދުވަސްތަކަކަށް ނުކުޅެވުމުގެ ބިރު

ހާލަންޑް، ސިޓީގެ ތަމްރީނުތަކުގައި ބައިވެރިވަނީ -- ފޮޓޯ/ މެންޗެސްޓާ ސިޓީ

އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީގެ ފޯވަޑް އާލިން ހާލަންޑްގެ ފަޔަށް އަނިޔާވެ، ގިނަ ދުވަސްތަކަކަށް ކުޅުމާ ދުރަށްދާން ޖެހުމުގެ ބިރު ހީވެއްޖެއެވެ.

ހާލަންޑްގެ ފަޔަށް އަނިޔާވެފައިވަނީ އިނގިރޭސި އެފްއޭ ކަޕްގެ ކުއާޓާ ފައިނަލްގައި ބޯންމޯތާއި ބައްދަލުކުރި މެޗުގެ ދެވަނަ ހާފުގައި ބޯންމޯތުގެ ކެޕްޓަން ލުވިސް ކުކް އަތުން ބޯޅައެއް ހޯދަން އުޅުމުގެ ތެރޭގައެވެ. މި އަނިޔާއާ އެކު އިތުރަށް ކުޅެވޭތޯ މަސައްކަތްކުރި ނަމަވެސް ފަޔަށް ތަދުވާތީ އިތުރަށް ކުޅެވޭގޮތް ނުވުމުން ފޭބީއެވެ.

ސިޓީން ހާމަކުރި ގޮތުގައި، ހާލަންޑް ވަރަށް އަވަހަށް ކަމާބެހޭ ސުޕެޝަލިސްޓަކަށް ދައްކާ ކުރިއަށް ގެންދާނެ ފަރުވާއާ ގުޅޭގޮތުން މަޝްވަރާ ކުރާނެއެވެ. އުމުރުން 24 އަހަރުގެ ހާލަންޑް ބޯންމޯތު މެޗަށް ފަހު ވައިޓާލިޓީ ސްޓޭޑިއަމްއިން ނުކުމެގެންދިޔައީ ޕްރޮޓެކްޓިވް ބޫޓާ އެކު އަށިގަނޑުގެ އެހީގައެވެ. މި އަނިޔާއާ އެކު މި ސީޒަންގެ ބޮޑު ބަޔެއް ނުވަތަ ފަހަރުގައި މި ސީޒަންގައި ނުފެނުމަކީ ވެސް ގާތް ކަމެކެވެ.

ނަމަވެސް, ސިޓީން ގަބޫލުކުރާ ގޮތުގައި މި ސީޒަންގައި ފަހު ބައިގައު އޭނާ އަލުން ސިޓީއަށް ކުޅޭތަން ފެނުމަކީ ގާތް ކަމެކެވެ. އަދި ޖޫން މަހު އެމެރިކާގައި ބާއްވާ ކްލަބް ވޯލްޑް ކަޕްގައި އޭނާ ފެންނާނެއެވެ.

ހާލަންޑްވަނީ މި ސީޒަންގައި ސިޓީއަށް މިހާތަނަށް ކުޅުނު 40 މެޗުގައި 30 ލަނޑު ކާމިޔާބުކޮށްދީފައެވެ.

ބޯންމޯތާއި ދެކޮޅަށް ސިޓީ ކުޅުނު ކުއާޓާ ފައިނަލްގައި ހާލަންޑް ލަނޑެއް ކާމިޔާބުކުރި ނަމަވެސް އޭނާ އަތުންވަނީ ޕެނަލްޓީއެއް ބޭކާރުވެ، ލަނޑު ޖަހަން ލިބުނު ރަނގަޅު ދެ ފުރުސަތެއް ބޭކާރު ވެފައެވެ. މި ސީޒަންގައި އަނިޔާގެ ގިނަ މައްސަލަތަކަކާ ކުރިމަތިލާން ޖެހިފައިވާ ސިޓީގެ ފަރާތުން އެ މެޗުގައި ރަނގަޅު ކުޅުމެއް ފެނުނު ނަމަވެސް އަނެއްކާ މި ވަނީ ޓީމުގެ މުހިންމު ކުޅުންތެރިއެއް އަނިޔާގެ ސަބަބުން ގެއްލިފައެވެ.

މި ސީޒަންގައި ސިޓީއަށް މިހާރު ތައްޓެއް ކާމިޔާބުކުރަން އޮތް ހަމައެކަނި ފުރުސަތަކީ އެފްއޭ ކަޕެވެ. ޕްރިމިއާ ލީގުގައި ސިޓީން ދަނީ އަންނަ ސީޒަންގެ ޔުއޭފާ ޗެމްޕިއަންސް ލީގުގެ ޖާގައެއް ކަށަވަރުކުރުމަށްޓަކައި ހަތަރުވަނަ މަގާމަށް ވާދަކުރަމުންނެވެ. ލީގުގައި ސިޓީ ދެން ކުޅޭ މެޗުގައި ބުދަ ދުވަހުގެ ރޭ ބައްދަލުކުރާނީ ލެސްޓާ ސިޓީއާއެވެ.

comment ކޮމެންޓް