އުތުރުގެ 21 ފެރީ ސްޓޮޕެއް ކައުންސިލްތަކާ ހަވާލުކުރަނީ

ފެރީ ސްޓޮޕްތައް ކައުންސިލްތަކާ ހަވާލުކުރުމުގެ ލިޔުން، ޓްރާންސްޕޯޓް މިނިސްޓަރު ލޯކަލް ގަވަމެންޓް މިނިސްޓަރާ ހަވާލުކުރެއްވުން: އެ އެއްބަސްވުމުގެ ދަށުން 21 ފެރީ ސްޓޮޕް ކައުންސިލްތަކާ ހަވާލުކޮށްފައިވޭ -- ސަން ފޮޓޯ/ މާނިއު މުހައްމަދު

ރައްޖޭގެ ރަށްތަކަށް ދަތުރުފަތުރުން ގުޅާލުމަށް ތައާރަފުކުރި އިންޓަގްރޭޓެޑް ނެޝަނަލް ޕަބްލިކް ފެރީ ނެޓްވޯކް މަޝްރޫއުގެ ދަށުން އިމާރާތްކޮށްފައިވާ 21 ފެރީ ސްޓޮޕް، ކައުންސިލްތަކާ ހަވާލުކުރުމަށް އެއްބަސްވުމެއް ހަދައިފިއެވެ.

އެ އެއްބަސްވުމުގެ ދަށުން، ލޯކަލް ގަވަމެންޓް މިނިސްޓްރީން ކައުންސިލްތަކާ ހަވާލުކުރަނީ ހއ، ހދ. އަދި ށ. އަތޮޅުގައި މިހާތަނަށް ތައްޔާރުކޮށްފައި ހުރި ހުރިހާ ފެރީ ސްޓޮޕެކެވެ.

އެ ފެރީ ސްޓޮޕްތައް ހަވާލުކުރުމުގެ އެއްބަސްވުމުގައި ސޮއިކުރެއްވީ ލޯކަލް ގަވަމެންޓް މިނިސްޓްރީއާއި ޓްރާންސްޕޯޓް މިނިސްޓްރީއާއި ފެރީތައް ހިންގާ އެމްޓީސީސީންނެވެ. އެގޮތުން ލޯކަލް ގަވަމެންޓް މިނިސްޓްރީގެ ފަރާތުން ސޮއިކުރެއްވީ ޕާމަނަންޓް ސެކްރެޓަރީ ޑރ. ފާތިމަތު މުނާއެވެ.

ޓްރާންސްޕޯޓް މިނިސްޓްރީގެ ފަރާތުން ސޮއިކުރެއްވީ މަރިޔަމް ޝަހާނާ ކަމަށްވާއިރު، އެމްޓީސީސީގެ ފަރާތުން ސޮއިކުރެއްވީ ޖެނެރަލް މެނޭޖަރު އަލީ ފާތިހެވެ.

އެ ފެރީ ސްޓޮޕްތައް ހަވާލުކުރުމުގެ ލިޔުން، ޓްރާންސްޕޯޓް މިނިސްޓަރު މުޙައްމަދު އަމީންވަނީ ލޯކަލް ގަވަމެންޓް މިނިސްޓަރު އާދަމް ޝަރީފާ ހަވާލުކުރައްވައިފައެވެ.

އެ ރަސްމިއްޔާތުގައި އަމީން ވިދާޅުވީ މިއަދު ސޮއިކުރި އެއްބަސްވުމުގެ ދަށުން، އެ 21 ފެރީ ސްޓޮޕްއިން ރައްޔިތުންނަށް ޚިދުމަތް ދިނުމުގެ މަސައްކަތްތައް ކައުންސިލްތަކާ ހަވާލުކުރާނެ ކަމަށެވެ.

"އަޅުގަނޑުމެން ސަރުކާރާ ހަވާލުވެފައި މިހާރު ކުރަމުންގެންދާ އެންމެ މުހިންމު އެއް މަސައްކަތަކީ އާރްޓީއެލްގެ ޚިދުމަތް ރޯލްއައުޓް ޕްލޭން އަވަސްކޮށްގެން، މި އަހަރު، 2025ވަނަ އަހަރު ނިމުމުގެ ކުރިން މުޅި ރާއްޖެއަށް އެ ޚިދުމަތް ފުޅާކުރުން،" އަމީން ވިދާޅުވިއެވެ.

ޓްރާންސްޕޯޓް މިނިސްޓަރު މުހައްމަދު އަމީން: އުތުރުގެ 21 ފެރީ ސްޓޮޕެއް ކައުންސިލްތަކާ ހަވާލުކޮށްފައިވާ ކަމަށް އޭނާ ވިދާޅުވި - ސަން ފޮޓޯ/ މާނިއު މުޙައްމަދު

އެ މަސައްކަތުގެ ދަށުން، ރައީސް ޑރ. މުޙައްމަދު މުއިއްޒު އިއުލާނު ކުރައްވާފައިވާ ގޮތަށް މި އަހަރުގެ ޖޫން މަހުގެ ތެރޭގައި ރ. އަތޮޅާއި ބ. އަތޮޅުގައި އާރުޓީއެލް ފެރީގެ ޚިދުމަތް ފަށާނެކަން އަމީން ފާހަގަކުރެއްވިއެވެ.

ކައުންސިލްތަކުން ފެރީ ސްޓޮޕްތަކުގެ ޚިދުމަތްތައް ކުރިއަށްގެންދާނެ ކަމުގެ ޔަގީންކަން ދެއްވަމުން އެ ރަސްމިއްޔާތުގައި އާދަމް ޝަރީފް ވިދާޅުވީ، ކައުންސިލްތަކާ ހަވާލު ކުރާ މަސައްކަތްތަކުން މިހާތަނަށް އެއްވެސް ކައުންސިލަކުން ފަހަތަށް ޖެހިފައި ނުވާ ކަމަށެވެ.

"ގިނަ ވެގެން އިރާދަކުރެއްވިއްޔާ ތިން މަސް ދުވަސް ތެރޭގައި ކައުންސިލުތަކަށް މި ތަަންތަން ހަވާލުކުރާނަން،" އާދަމް ޝަރީފް ވިދާޅުވިއެވެ.

މިނިސްޓަރު ވިދާޅުވީ ފެރީ ސްޓޮޕްތައް ހިންގުމަކީ ބުރަ ކަމަކަށްވީ ނަމަވެސް އެ މަސައްކަތްތައް ކައުންސިލްތަކުން ވަރަށް ރަނގަޅަށް ކުރިއަށްގެންދާނެ ކަމުގެ ޔަގީންކަން އޮތް ކަމަށެވެ.

comment ކޮމެންޓް