އިހުތިޖާޖު ކުރުމުން ޓެކްސީ ޑްރައިވަރުންނަށް ދައުވާ ކުރަނީ

މިދިޔަ އަހަރުގެ ޑިސެންބަރު 11ގައި ހުޅުމާލެ ނިރޮޅުމަގު، އެމްޑަބްލިޔުއެސްސީ ކައިރީ ކުރިއަށްގެންދިޔަ ޓެކްސީ ޑްރައިވަރުންގެ މުޒާހަރާއާ ގުޅިގެން ތިން މީހެއްގެ މައްޗަށް ދައުވާކުރުމަށް، ޕްރޮސެކިއުޓާ ޖެނެރަލް (ޕީޖީ) އޮފީހުން ހުޅުމާލޭ މެޖިސްޓްރޭޓް ކޯޓަށް ހުށަހަޅައިފިއެވެ.

ޓެކްސީ ޑްރައިވަރުން އިހުތިޖާޖު ކުރި މައިގަނޑު ސަބަބަކީ ސަރުކާރަށް އަހަރެއްވީ އިރު، ޓެކްސީ ޑްރައިވަރުންގެ ކަންބޮޑުވުންތަކަށް އެއްވެސް ހައްލެއް ގެނެސްދީފައިނުވާ ކަމަށް ބުނެއެވެ.

ޓެކްސީ --- ސަން ފޮޓޯ/ ފަޔާޒު މޫސާ

އިހުތިޖާޖު ހޫނުވީ، އެ ޑްރައިވަރުންގެ ޑިމާންޑުތަކަށް ޖަވާބެއް ނުލިބި ގިނަ އިރުވެ، ހުޅުމާލެއިން ހައިވޭއަށް އެރެން އޮންނަ މަގު ޑްރައިވަރުން ނިކުމެ ބަންދުކުރުމުންނެވެ.

އެއާއެކު ވަަރަށް ބޮޑަށް ޓްރެފިކް ބްލޮކްވެ، މުޅި ސަރަހައްދު ތޮއްޖެހުމާއެކު އެރޭ ފުލުހުން އެ ސަރަހައްދުން 22 ޓެކްސީ ޓޯވެސް ކުރިއެވެ. އަދި ތިން މީހަކު ފުލުހުން ހައްޔަރު ކުރިއެވެ. އެއީ:

• މުޙައްމަދު ޝާމިން، 39އ، މއ. ވިރާހު، މާލެ
• އަހުމަދު ޝަބީން، 33އ، ސަންރޭ، ލ. ދަނބިދޫ
• ނުއުމާން އަހުމަދު، 36އ، ހޮލިޑޭވިލެޖް، ހދ. ކުމުންދޫ

އޭގެ ތެރެއިން ޝާމިން އާއި ޝަބީން ފަސް ދުވަހު ބަންދުގައި ބޭތިއްބުމަށް ކޯޓުން އޭރު އަމުކުރިއެވެ. ނަމަވެސް ނުއުމާން ވަނީ ޝަރުތުތަކާއެކު ދޫކޮށްލައިފައެވެ.

https://sun.mv/200163

ޕީޖީ އޮފީހުން ބުނީ ޓެކްސީ ޑްރައިވަރުން ކުރި އިހުތިޖާޖުގެ ބައިވެރިންތަކެއް އެ ސަރަހައްދުގެ މަގު ބަންދުކޮށް، އާންމު ދަތުރުފަތުރަށް ހުރަސްއަޅައި އެ ސަރަހައްދުގައި ހަރަކާތްތެރިވި ފުލުހުންގެ ދައުރު އަދާކުރުމަށް ހުރަސް އަޅާފައިވާ ކަމަށެވެ.

އެ ގޮތުން އެ ސަރަހައްދުގެ އަމަން ނަގައިލަން އުޅުނު ކަމުގެ ތުހުމަތުގައި ޝާމިން، ޝަބީން އަދި ނުއުމާނުގެ މައްޗަށް ދައުވާ ކުރަން މި މަހުގެ ފަސްވަނަ ދުވަހު ހުޅުމާލޭ މެޖިސްޓްރޭޓް ކޯޓަށް ހުށަހަޅާފައިވާ ކަމަށް ޕީޖީން ބުންޏެވެ.

ދައުވާކުރާ ސަބަބުތަކުގެ ތެރޭގައި ހިމެނެނީ:

• މި މީހުން ޓެކްސީ ކުރުމަށް ބޭނުންކުރާ ކާރުތައް ނިރޮޅުމަގުގައި ހުރަހަށް ބާއްވައިގެން އެ މަގުގެ އެއް ލޭނު ބަންދުކުރުން
• އެ ސަރަހައްދު ދޫކޮށް ދިއުމަށް ފުލުހުން އެންގުމުން އެ ކަމަށް އިންކާރުކުރުން
• މަގުމަތީގެ ސަލާމަތާ ރައްކާތެރިކަން ކަށަވަރުކުރުމަށް ފުލުހުންގެ މައްޗަށް އޮންނަ ޒިންމާއަށް ހުރަސް އެޅުން
• އެއްގަމު ދަތުރުފަތުރުގެ ނިޒާމަށް ހުރަސް އެޅުން

އެ ގޮތުން މި ތިން މީހުންގެ މައްޗަށް ވެސް ކޮށްފައިވަނީ ދައުލަތުގެ އެހެނިހެން މަސައްކަތްތަކަށް ހުރަސް އެޅުމުގެ ކުށުގެ ދައުވާއެވެ.

މި ދައުވާ ސާބިތުވެއްޖެނަމަ، ހަތަރު މަހާއި 24 ދުވަހުގެ މުއްދަތެއްގެ ޖަލު އަދަބެއް އަންނާނެއެވެ.

ސަރުކާރުން ޓެކްސީގެ ޚިދުމަތް ދޭން ނިންމުމާ ގުޅިގެން، ޓެކްސީ ޑްރައިވަރުން އަންނަނީ ވަރަށް ބޮޑަށް ކަންބޮޑުވުން ފާޅުކުރަމުންނެވެ. ޑްރައިވަރުންގެ ކަންބޮޑުވުންތައް އިންތިހާއަށް ބޮޑުވެފައި އޮއްވައި، މިދިޔަ ބުދައިގައި ވަނީ މާލެ ސަަރަހައްދުގައި ޓެކްސީގެ ޚިދުމަތް ފެށުމަށް ވާންޖެހޭ ތައްޔާރީތައް ވުމަށް ޓްރާންސްޕޯޓް މިނިސްޓްރީން އެމްޓީސީސީއާއެކު އެމްއޯޔޫއެއްގައި ސޮއިކޮށްފައެވެ.

އެއީ ސަރުކާރުން ޓެކްސީގެ ޚިދުމަތް ދޭން ނޫޅޭ ކަމަށް ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހީމް ފަލާހު ވިދާޅުވެފައިވަނިކޮށެވެ.