ރޭ ހުޅުމާލޭގައި ޓެކްސީ ޑްރައިވަރުން ކުރި އިހުތިޖާޖުގެ ތެރެއިން ހަތަރު ފުރޮޅުލީ 22 އުޅަނދު ޓޯކޮށްފައިވާ ކަމަށް ފުލުހުން ބުނެފިއެވެ.
އިއްޔެ އިރުއޮއްސުނު ވަގުތުން ފެށިގެން ޓެކްސީ ޑްރައިވަރުން ވަނީ ހުޅުމާލޭގައި އިހުތިޖާޖުކޮށްފައެވެ. އެއީ ސަރުކާރަށް އަހަރުވީއިރު، އެ މީހުންގެ ކަންބޮޑުވުންތަކަށް އެއްވެސް ހައްލެއް ގެނެސްދީފައިނުވާ ކަމަށް ބުނެއެވެ.
އިހުތިޖާޖު ހޫނުވީ، އެ ޑްރައިވަރުންގެ ޑިމާންޑުތަކަށް ޖަވާބެއް ލިބުމެއް ނެތި ގިނައިރުވެ، ހުޅުމާލެއިން ހައިވޭއަށް އެރެން އޮންނަ މަގު ޑްރައިވަރުން ބަންދުކުރުމުންނެވެ. އެއާއެކު ޓްރެފިކް ބްލޮކްވެ، މުޅި ސަރަހައްދު ތޮއްޖެހުނެވެ.
މި މައްސަލައާ ގުޅިގެން ފުލުހުން ބުނީ ޓެކްސީ ޑްރައިވަރުން ކުރިޔަށް ގެންދިޔަ އިހުތިޖާޖުގެ ތެރެއިން އާންމު ދަތުރުފަތުރަށް ހުރަސްއަޅައި، ހުޅުމާލޭގެ މަގުތައް ބްލޮކުކުރި މައްސަލައިގައި ހަތަރު ފުރޮޅުލީ 22 އުޅަނދެއް ޓޯކޮށްފައިވާ ކަމަށެވެ.
ޓެކްސީ ޓޯކުރި މައްސަލައިގައި ހައްޔަރުކުރި މީހުން: އެ މައްސަލައިގައި ހައްޔަރުކުރި ނުއުމާން ދޫކޮށްލައި، ބާކީ ދެ މީހުން ވަނީ ބަންދުކޮށްފައި --
މީގެ އިތުރުން މި މައްސަލައިގައި ތިން މީހަކު ހައްޔަރުކުރިއެވެ. އެއީ:
- މުޙައްމަދު ޝާމިން، 39އ، މއ. ވިރާހު، މާލެ
- އަހުމަދު ޝަބީން، 33އ، ސަންރޭ، ލ. ދަނބިދޫ
- ނުއުމާން އަހުމަދު، 36އ، ހޮލިޑޭވިލެޖް، ހދ. ކުމުންދޫ
އޭގެ ތެރެއިން ޝާމިން އާއި ޝަބީން ފަސް ދުވަހު ބަންދުގައި ބޭތިއްބުމަށް ކޯޓުން އަމުކުރިއެވެ. ނަމަވެސް ނުއުމާން ވަނީ ޝަރުތުތަކާއެކު ދޫކޮށްލައިފައެވެ.
ޓެކްސީ ޑްރައިވަރުންގެ އިހުތިޖާޖުގައި ގޮލާވާފައިވާ ބައެއް ކަންތައްތަކުގެ ތެރޭގައި:
- ސަރުކާރުން ޓެކްސީ ފްލީޓު ވުޖޫދަށް ނުގެންނާނެ ކަމަށް އިއުލާން ކުރުން
- ވޭން ދަތުރުގެ އަގުތައް ކުރިން އޮތް ގޮތަށް ބަދަލުކުރުން
- މާލެ އަދި އެއާޕޯޓުގެ ޓްރެފިކް ފްލޯ ފަސޭހަވާނެ ގޮތަށް ހެދުން
- ފަސޭހައިން ދަތުރު ނެގޭނެ މާހައުލެއް ފަހިކޮށްދިނުން
- ޓެކްސީ ޑްރައިވަރުންގެ ދަފްތަރު އަލުން ހުޅުވައިލުން
- މާލޭގައި ޕާކު ކުރެވޭނެ ނިޒާމެއް ގާއިމްކުރުން
ސަރުކާރުން ޓެކްސީގެ ޚިދުމަތް ފަށަން ނިންމުމާއި، ޕާކު ކުރާނެ ޖާގަ ނުދައްކައި ވެހިކަލް ޓޯކުރާ މައްސަލައިގައި ވެސް މިދިޔަ އޮގަސްޓު މަހު ޓެކްސީ ޑްރައިވަރުން އިހުތިޖާޖުކުރިއެވެ. އެ އިހުތިޖާޖު ނިންމައިލީ، ޑްރައިވަރުންނަށް ގެއްލުން ނުވާނެ ކަމުގެ ޔަގީންކަން ޓްރާންސްޕޯޓް މިނިސްޓަރު މުޙައްމަދު އަމީން ދެއްވުމުންނެވެ.