ކެފޭ މާރާމާރީގައި އަނިޔާވި ބަންގްލަދޭޝް މީހާގެ ހާލު ސީރިއަސް

މާވެޔޮ މަގުގައި ހުރި ކެފޭއެއްގެ ބަދިގެ ތެރޭގައި މިއަދު މެންދުރުފަހު ހިންގި މާރާމާރީއެއްގައި އަނިޔާވި ދެ މީހުންގެ ތެރެއިން އެކެއްގެ ހާލު ސީރިއަސްކަމަށް، އައިޖީއެމްއެޗާ ހަވާލާދީ ފުލުހުން މިއަދު ބުނެފިއެވެ.

މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، މާވެޔޮ މަގުގައި ހުރި ކެފޭއެއްގައި މާރާމާރީއެއް ހިންގާފައިވާ މައްސަލައެއް 12:10 ހާއިރު ރިޕޯޓުކުރި ކަމަށެވެ.

ފުލުހުން ފަހުން ބުނީ އެ މާރާމާރީ ހިނގީ އެ ކެފޭގައި މަސައްކަތްކުރާ ނޭޕާލް ކައްކާއާއި، ބަންގްލަދޭޝަށް ނިސްބަތްވާ އެހީތެރިޔަކާ ދެމެދު ކަމަށެވެ.

ދެ މީހުންނަށް ވެސް ހޮސްޕިޓަލުގައި ފަރުވާ ދެމުން އަންނަައިރު އޭގެތެރެއިން ބަންގްލަދޭޝް މީހާގެ ހާލު ސީރިއަސްކަމަށް ފުލުހުން ވަނީ ބުނެފައެވެ.

މި މާރާމާރީ ހިނގުމަށްފަހު ވީޑިއޯއެއް ސޯޝަލް މީޑިއާގައި ވަނީ ދައުރުވެފައެވެ. އެ ވިޑިއޯގައި ޒަޚަމުވެފައިއިން ފިރިހެނެއް ކެފޭއެއްގައި އިން މަންޒަރު ފެންނައިރު، އެމީހާގެ އަތުގަޔާއި ގަމީހުގައި ލޭހުރި ތަން ފެނެއެވެ.

އިތުރު ފިރިހެނެއް އެ މީހާ ކައިރީ ހުރިއިރު، އެ ސަރަަހައްދުގައި ފުލުހުން ހަރަކާތްތެރިވާ މަންޒަރު ވެސް ފެނެއެވެ.

އެހެން ވީޑިއޯއެއްގައި ދެ ފިރިހެނުން ކެފޭގެ ބަދިގެތެރޭގައި މާރާމާރީ ހިންގާތަން ފެންނައިރު، އެ ސަރަހައްދުގައި ލޭ ހުރި ތަން ވެސް ފެނެއެވެ.

ބިދޭސީންގެ މެދުގައި ހިންގާ މާރާމާރީތައް އިތުރުވަމުން އަންނައިރު، މިފަހުން އާޓިފިޝަލް ބީޗުގައި ވެސް ވަނީ މާރާމާރީއެއް ހިންގާފައެވެ. އެހެންވެ، އިމިގްރޭޝަނުން ވަނީ އާންމު ސަރަހައްދުތަކުގައި ބިދޭސީންގެ މެދުގައި ހަމަނުޖެހުން އުފެދޭ ފަދަ ކަންކަން އިތުރުވާތީ، ހަމަނުޖެހުން ހިންގާ ސަރަހައްދުތައް ސިލްސިލާކޮށް މޮނީޓަރުކުރުމުގެ މަސައްކަތް ވެސް ފަށައިފައެވެ.