ޔުއޭފާ ޔޫރޮޕާ ލީގުގެ ލީގު ފޭސްގައި މެންޗެސްޓާ ޔުނައިޓެޑުން އެފްސީއެސްބީ ބަލިކޮށް، ތިންވަނައިގައި އޮވެ، ލީގު ފޭސް ނިންމާލައިފިއެވެ.
އެފްސީއެސްބީގެ ދަނޑުގައި ކުޅުނު މި މެޗު ޔުނައިޓެޑުން ކާމިޔާބުކޮށްފައިވަނީ 2-0 އިންނެވެ.
ފުރަތަމަ ލަނޑު މެޗުގެ 60 ވަނަ މިނެޓުގައި ކާމިޔާބުކޮށްދިނީ ކޯބީ މައިނޫ ތަނަވަސްކޮށްދިން ފުރުސަތެއްގައި ޑިއޮގޯ ޑާލޮޓެވެ. އެ ލަނޑު ޖެހިތާ އަށް މިނެޓު ފަހުން ޔުނައިޓެޑްގެ ފަހު ލަނޑު އެލެހަންޑްރޯ ގެނާޗޯ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ މައިނޫއެވެ.
މި ކާމިޔާބީއާ އެކު ޔުނައިޓެޑް ލީގް ފޭސް ނިންމާލީ 18 ޕޮއިންޓާ އެކު ތިންވަނައިގައި އޮވެގެންނެވެ. އެއީ، އެއްވަނައާއި ދެވަނައިގައި އޮތް ލާޒިއޯއާއި އެތުލެޓިކް ބިލްބާއޯއަށް ވުރެ އެއް ޕޮއިންޓް މަދުން ލިބިގެންނެވެ.
މި ފަހަރުގެ ލީގު ފޭސްގައި މިހާތަނަށް މެޗަކުން ބަލިނުވެ އޮތް ހަމައެކަނި ޓީމަކީ ވެސް ޔުނައިޓެޑެވެ. އެ ޓީމު ކުޅުނު އަށް މެޗުގެ ތެރެއިން ފަސް މެޗު ކާމިޔާބުކުރިއިރު ތިން މެޗު ނިމުނީ އެއްވަރުވެގެންނެވެ.
މުބާރާތުގައި އޭއެސް ރޯމާއާއި އެއިންޓްރެކްޓް ފްރޭންކްފާޓް ބައްދަލުކުރި މެޗު 2-0 އިން ކާމިޔާބުކޮށްފައިވަނީ ރޯމާއިންނެވެ. މެޗުގައި ރޯމާއިން ކާމިޔާބުކުރި ދެ ލަނޑު އެ ޓީމަށް ކާމިޔާބުކޮށްދީފައިވަނީ އެންޖެލީނިއޯއާއި އެލްޑޯ ޝޮމުރޮޑޯވްއެވެ. މި ކާމިޔާބީއާ އެކު ރޯމާއިން ލީގު ފޭސް ނިންމާލާފައިވަނީ 12 ޕޮއިންޓާ އެކު ޕްލޭ އޮފް ޖާގައަކާ އެކު 15 ވަނައިގައި އޮވެގެންނެވެ. މެޗުން ބަލިވި ނަމަވެސް ފްރޭންކްފާޓް ލީގު ފޭސް ނިންމާލާފައިވަނީ 16 ޕޮއިންޓާ އެކު ފަސްވަނައިގައި އޮވެގެންނެވެ.
އޮލިމްޕިއާކޯސްއާއި ގަރަބާގް ބައްދަލުކުރި މެޗު 3-0 އިން ކާމިޔާބުކޮށް، އޮލިމްޕިއާކޯސް ވެސް ވަނީ ސީދާ ޖާގައެއް ކަށަވަރުކޮށްފައެވެ. އެއީ، އަށް މެޗުން ލިބުނު 15 ޕޮއިންޓާ އެކު ހަތްވަނަ ކަށަވަރުކޮށްގެންނެވެ.