ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއާ ރައީސް ޑރ. މުހައްމަދު މުއިއްޒާ ދެމެދު އުފެދުނީ ބައިނޭޅުމުގެ މައްސަލައެއް ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިރޭ ތުހުމަތު ކުރައްވައިފިއެވެ.
ޓޫރިޒަމް މިނިސްޓަރުކަމުގައި ހުންނެވި އަބްދުއްރަހީމްގެ ދަރިކަލުން، އިބްރާހީމް ފައިސަލް މަގާމުން ވަކިކުރީ މިދިޔަ އަންގާރަ ދުވަހުގައެވެ. ފައިސަލް މަގާމުން ވަކިކުރި ނަމަވެސް، އެކަމާ ގުޅޭ މާގިނަ މައުލޫމާތެއް ރައީސް އޮފީހުން ހާމަކޮށްފައެއް ނުވެއެވެ.
މި ކަމާ ގުޅިގެން އަބްދުއްރަހީމްވަނީ، އެ މަނިކުފާނާއި ރައީސް މުއިއްޒާ ދެމެދު އޮތް ގުޅުން ރަނގަޅުނޫން ކަމަށް އެއްބަސްވެ ވަޑައިގެން، ފައިސަލްގެ ދިފާއުގައި ވާހަކަ ދައްކަވައިފައެވެ.
މިރޭ ޕީއެންއެފުން ބޭއްވި ޖަލްސާގައި ޔާމީން ވަނީ ރައީސް މުއިއްޒު އިސްކޮށް ހުންނަވައިގެން ލ. އަތޮޅުން ރަށްތަކެއް ވިއްކައިލި ކަމުގެ ތުހުމަތު ކުރައްވައިފައެވެ.
މި ކަމާ ގުޅިގެން ވާހަކަފުޅު ދައްކަވަމުން ޔާމީން ވިދާޅުވީ ރައީސް މުއިއްޒާއި އަބްދުއްރަހީމާ ދެމެދު ޖެހިފައި އޮތީ ބައިނޭޅުމުގެ މައްސަލައެއް ކަމަށާއި، މި މައްސަލަ ޝަރީއަތަށް ނުދާނެ ކަމަށެވެ. ޔާމީން ވިދާޅުވީ ރައީސް މުއިއްޒު ވަނީ މިހާރު މި މައްސަލަތައް ފުލުހަށް ވެސް ހުށަހަޅުއްވާފައި ކަމަށެވެ.
ރައީސް ޑރ. މުއިއްޒާ އެކު އެ މަނިކުފާނުގެ ހާއްސަ އެޑްވައިޒަރު އަބްދުއްރަހީމް އަބްދުﷲ - ސަން ފޮޓޯ/ މޫސާ ނަދީމް
"..ގަބޫލު ކުރައްވާ، މި ޝަރީއަތަކަށް ނުދާނެ. މި ފަހަރު އަބްދުއްރަހީމާ ފައިސަލްގެ ދަށްގޮހޮރުގައި އޮތް އެއްޗަށް ދަންދެން މުއިއްޒު އަތުލާނެ. ދިރުވާލާފައި ގޮހޮރުގެ އެންމެ އަޑީގައި އޮތް އެއްޗަށް ދަންދެން ހިފައި ނަގާނެ. މި އުޅެނީ ބައިނޭޅިގެން އުޅޭ މައްސަލަ ނޫންތޯ، ބައިނޭޅިގެން އުޅޭ މައްސަލަ މި އުޅެނީ" ޔާމީން ވިދާޅުވިއެވެެ.
ފައިސަލް ޓޫރިޒަމް މިނިސްޓަރު ކަމުން ވަކިކޮށްފައިވާކަން ރައީސް އޮފީހުން އަންގާރަ ދުވަހު އިއުލާން ކުރީ، މަޖިލިސް ޗުއްޓީގައި އޮތް މި ދުވަސްވަރު އަބްދުއްރަހީމް މެލޭޝިއާގައި ހުންނަވަނިކޮށެވެ.
ރައީސް މުއިއްޒު ވެރިކަމަށް ވަޑައިގެން މަޖިލީސް އިންތިޚާބުގެ ކުރީގައި އަބްދުއްރަޙީމް ފުރަތަމަ އައްޔަންކުރެއްވީ ސީނިއާ މިނިސްޓަރެއްގެ ފެންވަރުގައި އެ މަނިކުފާނުގެ އެޑްވައިޒަރުގެ މަގާމަށެވެ.
އެއަށް ފަހު، މަޖިލީސް އިންތިޚާބުގައި ޕީއެންސީން ހޯދި ސުޕަމެޖޯރިޓީއާ އެކު މަޖިލީހުގެ ރައީސް ކަމަށް އަބްދުއްރަޙީމް އިންތިޚާބު ކޮށްފައި ވަނީ ވެސް ރައީސްގެ އެދިވަޑައިގަތުމަކަށެވެ. ޕީއެންސީގެ ހަރުގެ ޖަލްސާތަކުގައި ވެސް ސަރުކާރުގެ ދިފާއުގައި އެންމެ ގަދައަށް ވާހަކަދައްކަވާ އެއް ބޭފުޅަކީ މަޖިލީހުގެ ރައީސް އަބްދުއްރަޙީމެވެ.
އަބްދުއްރަހީމަކީ ކުރީގެ ރައީސް ޔާމީންގެ އެންމެ އަރިސް އެއް ބޭފުޅެކެވެ. ނަމަވެސް އެ ދެ ބޭފުޅުންގެ ގުޅުން ގޯސްވީ ރިޔާސީ އިންތިޚާބުތެރޭގައެވެ.