މާލެ ސިޓީ ކައުންސިލުން ޚަރަދުކޮށްގެން ހުޅުމާލޭގެ ފަރުކޮޅުފުށީގައި ތަރައްގީކުރި ޕެޓް ކެއާ ފެސިލިޓީއާ ހަވާލުވުމަށް އެދި ދިރޭތަކެއްޗާ ބެހޭ ވުޒާރާއަށް ދެ ސިޓީ މިހާރު ފޮނުވިއްޖެ ކަމަށާއި ނަމަވެސް އަލިމަގެއް އަދި ނުފެންނަ ކަމަށް މާލޭ ސިޓީގެ މޭޔަރު އާދަމް އާޒިމް މިރޭ ވިދާޅުވެއްޖެއެވެ.
"އޮޅު ހިޔާ"ގެ ނަމުގައި ޕެޓް ކެއާ ފެސިލިޓީ ހުޅުވާފައި ވަނީ މިދިޔަ ނޮވެމްބަރު މަހުގެ ދެވަނަ ދުވަހުއެވެ. ފެސިލިޓީ ހުޅުވުމާ އެކު އެތަނަށް ބުޅާތައް ގެންދިއުމަށް ސިޓީ ކައުންސިލުން މަަސައްކަތް ކުރިއެވެ.
ބުޅާ ފެސިލިޓީއާ ހަވާލުވުމަށްއެދި މިނިސްޓްރީއަށް ދެ ސިޓީ ފޮނުވައިފި ކަމަށާއި ނަމަވެސް އަދި އަލިމަގެއް ނުފެނޭ ކަމަށް އާޒިމް ވިދާޅުވެއްޖެ --- ސަންފޮޓޯ/ ފަޔާޒު މޫސާ
ނަމަވެސް، މިދިޔަ ޑިސެމްބަރު މަހުގެ ތިން ވަނަ ދުވަހު ސަރުކާރުން ނިންމާފައިވަނީ, އެ ފެސިލިޓީ ހިންގުން ސިޓީ ކައުންސިލްގެ އަތުން ނަގައި, އެނިމަލް ވެލްފެއާ މިނިސްޓްރީއާ އެ ފެސިލިޓީ ހަވާލުކުރުމަށެވެ. ސިޓީ ކައުންސިލުން އޭރު ބުނީ ފެސިލިޓީ މިނިސްޓްރީއާ ހަވާލު ކުރެވޭނީ އެތަން ހެދުމަށް އެ ކައުންސިލުން ކުރި ހަރަދު ދިނުމުން ކަމަށެވެ.
އެސްއެސް ޓީވީގެ ބާރު ހަތަރެއް ޕްރޮގްރާމުގައި ވާހަކަދައްކަވަމުން އާޒިމް ވިދާޅުވީ ބުޅާ ފެސިލިޓީގެ މަސައްކަތް ނިންމީ ކައުންސިލުން ނުހަނު ބުރަ މަސައްކަތް ކޮށްގެން ކަމަށާއި ރައީސުލްޖުމްހޫރިއްޔާ އެ ފެސިލިޓީ ހުޅުވާދެއްވުމުން އެތަނަކީ ފުރިހަމަވެފައިވާ ތަނެއްކަން ހާމަވާކަމަށެވެ.
އަދި އެތަން ހުޅުވުމުގެ އިންތިޒާމުތައް ކުރިއަށްގެންދިޔައީ ކައުންސިލާ ގުޅިގެން މިނިސްޓްރީއިންކަން އާޒިމް ފާހަގަކުރެއްވިއެވެ.
ބައެއްފަހަރު އެބޭފުޅުން އެ ވިދާޅުވަނީ އެތަން ހުރީ ފުރިހަމަ ނުވެއޭ. އެހެންވީމަ އެބޭފުޅުން އެއަށް ޖަވާބުދާރީ ވާންވީ. ކީއްވެގެންތޯ އެހެން އެ ވިދާޅުވަނީ. އެއްވެސް ކަމެއް ނުހުންނާނެ، އަބަދުވެސް ހުންނާނެ ކުރިއެރުމަށް ކުރަން ކުރަންޖެހޭ ކަންތައްތަކެއް ހުންނާނެ އަބަދު ވެސް. މާލެ ސިޓީގެ މޭޔަރު އާދަމް އާޒިމް
އާޒިމް ވިދާޅުވީ މިނިސްޓްރީން ފަހު ވަގުތު އެ ގޮތަށް ކަންތައް ކުރީ ކީއްވެކަން އެއްވެސް ގޮތަކަށް ނޭނގޭ ކަމަށެވެ. އަދި ކުއްލިއަކަށް ފެސިލިޓީ އަތުލުމަކީ އޭނާ ދެކޭ ގޮތުގައި ވަރަށް ވަރަށް ވިޔާނުދާކޮށް ކޮށްފައިވާ ކަމެއް ކަން އޭނާ ވަނީ ފާހަގަކޮށްފައެވެ. ރަނގަޅު ނިޔަތެއްގައި ކަންކަން ކުރެވޭނީ ގުޅިގެން ކަމަށް އާޒިމް ވަނީ ވިދާޅުވެފައެވެ.
އަޅުގަނޑު ސަޖެސްޓް ކުރީން މިނިސްޓްރީއަށް ހިނގާށޭ ބުޅާތައް އަވަހަށް ނަގަމާ. ނަގާފަ ބުޅާތައް އެތާގަ ބައިއްތިއްބައިގެން ނިއުޓާ ކުރަމުންދަމާ. އޭރުން ވާނެ ގޮތަކީ މާލޭގެ ރައްޔިތުން ނަޖިހުން ސަލާމަތް ކޮށްދެވޭނެ. އަދި އޭގެ އިތުރުން ބުޅާތަކަށް ލިބޭ އަނިޔާތަކުން ބުޅާތައް ސަލާމަތް ކުރެވޭނެ. މާލެ ސިޓީގެ މޭޔަރު އާދަމް އާޒިމް
އާޒިމް ވަނީ ކެބިނެޓުން ވެސް މިފަދަ ނިންމުމެއް ނިންމުމުން ހައިރާން ވާކަމަށް ވިދާޅުވެފައެވެ. އެމްއޯޔޫގެ ދަށުން މަސައްކަތް ކުރަމުން ދިޔަ ނަމަވެސް މަސައްކަތް ކޮށްފައި ވާނީ އެމްއޯޔޫގައި އޮތް ވަރަށްވުރެ މާ ރަނގަޅަށް މާފުރިހަމައަށް ކަމަށާއި މިހާރު އެތަނަކީ ފުރިހަމައަށް މަސައްކަތް ކުރާ ފެސިލިޓީއެއް ކަމަށް އޭނާ ވަނީ ވިދާޅުވެފައެވެ.
މާލޭގެ ތެރޭގައި ބުޅާތައް ވިއްސި ވިހާލިވެ އުޅުމަށްވުރެ މާ ރާނގަޅު ވާނެ މިހާރުވެސް އެހެރީ ހަދާފަހުރި ތިން ފެސިލިޓީ. އެތަނަށް ގެންގޮސްގެން ބަލަހައްޓައިގެން ނިއުޓާ ކުރަމުން ދިއުން. އަދި ނުނިމިހުރި ކަމެއް އޮވެއްޖެނަމަ އަޅުގަނޑުމެން އެކަންކަން ނިންމަމުންދާނަން. މާލެ ސިޓީގެ މޭޔަރު އާދަމް އާޒިމް
އާޒިމް ވިދާޅުވީ ކައުންސިލުން ކުރި ޚަރަދު ދިނުމަށްފަހު މިނިސްޓްރީއިން އެތަން ނެގުމަށް ނިންމުމުން، ބުޅާ ފެސިލިޓީއާ ހަވާލުވުމަށް މިނިސްޓްރީއަށް ދެ ސިޓީ ފޮނުވާފައި ވާކަމަށެވެ. ނަމަވެސް މިހާތަނަށް ފެސިލިޓީއާ ހަވާލުވުމަށް އައިސްފައި ނުވާތީ ކަންބޮޑުވާ ކަމަށް އާޒިމް ވަނީ ވިދާޅުވެފައެވެ.
ބުޅާތައް މުޅި މާލެތެރޭ ގިނަވެގެން އުޅެ މުޅި މާލެތެރެ ނަޖިސްވެގެންދާއިރު އެބޭފުޅުން އަޅާނުލާ ތިބޭތީ އަޅުގަނޑު ވަރަށް ހައިރާންވޭ މާލެ ސިޓީގެ މޭޔަރުގެ ހައިސިއްޔަތުން. މިވަގުތުވެސް އަޅުގަނޑު އެދެން އެބޭފުޅުން ކިބައިން މި ވަގުތުން މި ވަގުތައްވެސް އެބޭފުޅުން އައިސް ފެސިލިޓީއާ ހަވާލުވެ ބުޅާތައް ގެންގޮސް ބުޅާތައް ބަލަހައްޓާން ފަށާށޭ. މާލެ ސިޓީގެ މޭޔަރު އާދަމް އާޒިމް
އާޒިމް ވިދާޅުވީ މިނިސްޓްރީން ފެސިލިޓީ ނެގީ ކައުންސިލަށް އެކަން ނުކުރެވޭނެ ކަމަށް ގަބޫލުކޮށްގެން ނޫން ކަމަށާއި މިނިސްޓްރީއިން އެކަން ކުރަން ބޭނުން ވެގެން ކަމަށެވެ.