މާލޭގެ މަގުމަތީގައި ދިރިއުޅޭ ބުޅާތައް ގެންދިޔުމަށް، ހުޅުމާލެ ދެވަނަ ފިޔަވައްސާ ގުޅިފައި އޮތް ފަރުކޮޅުފުށީގައި ފެސިލިޓީ ހެދީ މާލޭ ސިޓީ ކައުންސިލުން ހުރިހާ ޚަރަދެއް ކޮށްގެން ނަމަވެސް ސަރުކާރުން މިހާރު މަސައްކަތް ކުރަނީ އެގްރިކަލްޗާ މިނިސްޓްރީގެ ދަށަށް އެ ތަން ބަދަލުކުރަން ކަމަށް މޭޔަރު އަލީ އާޒިމް މިރޭ ވިދާޅުވެއްޖެއެވެ.
މާލޭގައި އުޅޭ ބުޅާތައް ފެސިލިޓީއަށް ގެންދިޔުމުގެ މަސައްކަތް މި ހަފުތާގައި ފަށާނެ ކަމަށް ސިޓީ ކައުންސިލުން ބުނެފައިވަނިކޮށް، މިއަދު އެގްރިކަލްޗާ މިނިސްޓްރީން ނެރުނު ބަޔާނެއްގައި ވަނީ އެ މިނިސްޓްރީން ފުރިހަމަ ކުރަން ބުނި ބައެއް މަސައްކަތްތައް ކައުންސިލުން ކޮށްފައި ނުވާތީ، ބުޅާތައް ފެސިލިޓީއަށް ނުގެންދިޔުމަށް އިލްތިމާސްކޮށްފައެވެ.
އެ ބަޔާނާ ގުޅޭ ގޮތުން "ސަން"އާ ވާހަކަދައްކަވަމުން އާޒިމް ވިދާޅުވީ، އެ ފެސިލިޓީ އެގްރިކަލްޗާ މިނިސްޓްރީގެ ދަށަށް ގެންދަން ކެބިނެޓުން ނިންމައިފައިވާ ކަމަށް މިއަދު ސަރުކާރުން ސިޓީއަކުން އަންގައިފައިވާ ކަމަށެވެ.
އަޅުގަނޑުމެން ބުޅާތައް ބަދަލުކުރަން އުޅުމުން ސިޓީއެއް ފޮނުވީ، ވަޒީރުންގެ މަޖިލީހުން ނިންމާ މިނިސްޓްރީގެ ދަށަށް ބަދަލުކުރަން. އަޅުގަނޑުމެން ކައުންސިލުން ހުރިހާ ހަރަދެއް ކޮށްގެން ތަން ހަދާ ނިމުނީމަ ބަދަލުކުރަން މިހާރު އެ އުޅެނީ. މާލެ ސިޓީގެ މޭޔަރު އާދަމް އާޒިމް
އާޒިމް ވިދާޅުވީ އެތަން އަތުލުމަށް މިއަދު ނިންމާފައި ވަނީ މާލެތެރޭގައި އުޅޭ ބުޅާތައް އެތަނަށް ގެންދިއުމަށް ކުރަންޖެހޭ ހުރިހާ މަސައްކަތްތަކެއް ކޮށްފައި ވަނިކޮށް ކަމަށެވެ. އެ ފެސިލިޓީހެދުމަށް ހުރިހާ ހަރަދެެއް ކޮށްފައި ވާނީ ސިޓީ ކައުންސިލުން ކަމަށާއި އެ ކައުންސިލުން ބޭނުންވީ ބުޅާތައް ބަދަލުކުރުމަށްފަހު މާލެތެރެ ސާފުކުރުމަށް ކަމަށް އޭނާ ވިދާޅުވިއެވެ.
އާޒިމް ވިދާޅުވީ، ފެސިލިޓީގެ ގިނަ ކަންތައްތަކެއް ނުނިމި އޮތްކަން މިނިސްޓްރީން ފާހަގަކޮށްފައި ވާއިރު އެއްވެސް ތަނަކީ އެންމެ ފުރިހަމައަށް ނިމިފައި އޮންނާނެ ތަނެއް ނޫން ކަމަށެވެ. އެގޮތުން ކޮންމެ ތަނެއްގައި ވެސް ކުރަންޖެހޭ ކަންތައްތައް އަބަދުވެސް ހުންނާނެ ކަމަށް އޭނާ ވިދާޅުވިއެވެ.
ސިޓީ ކައުންސިލުން ފަރުކޮޅުފުށީގައި ގާއިމްކޮށްފައިވާ ޕެޓް ކެއާ ފެސިލިޓީ: އެ ފެސިލިޓީ އެތުލުމަށް ވަޒީރުންގެ މަޖިލީހުން ވިންމައިފި --- ފޮޓޯ/ މާލެ ސިޓީ ކައުންސިލް
ކައުންސިލުން ބޭނުންވީ ބުޅާތައް ބަދަލުކުރެވޭނެ ވަރު ކުރުމަށްފަހު މާލެތެރެއިން ބުޅާތައް ނަގަން. އެއީ ރައްޔިތުން ބޭނުންވާ ގޮތަށްވީމަ. އެއްތަނަކީ ވެސް އެއްކޮށް ފުރިހަމަ ވެފަައިވާ ތަނެއް ނޫން. ކުރަންޖެހޭނެ ކަންކަން އަބަދުުވެސް ހުންނާނެ. އެކަންކަން ހުހެއް ނުވާނެ ނޫންތޯ. މާލެ ސިޓީގެ މޭޔަރު އާދަމް އާޒިމް
އާޒިމް ވިދާޅުވީ ހުރިހާ ޚަރަދެއް ކޮށްގެން ސިޓީ ކައުންސިލުން އެތަން ނިންމުމުން މިހާރު ސަރުކާރުން އެތަން އަތުލަން އުޅުމުން ދޭހަވަނީ މި ސަރުކާރުން އެއްބާރުލުން ނުލިބޭ މިންވަރު ކަމަށެވެ. އަދި މިގޮތަށް ކަންތައްތައް ކުރުމުން އެކަމުގެ ދެރަ ރައްޔިތުންނަށް ކުރާނޭ ކަމަށްވެސް އާޒިމް ވަނީ ވިދާޅުވެފައެވެ.
ފަރުކޮޅުފުށީގައި ކެޓް ޝެލްޓަރު ގާއިމުކޮށްފައި ވަނީ އެޗްޑީސީއިން ކައުންސިލަށް ދޫކުރި 5،000 އަކަފޫޓުގެ ބިމެއްގައެވެ. ސައުވީސް ގަޑިއިރު ޚިދުމަތާ އެކު ގާއިމުކުރި އެ ފެސިލިޓީ ރައީސް ޑރ. މުޙައްމަދު މުއިއްޒު ހުޅުއްވައިދެއްވީ މިދިޔަ މަހުގެ ދެވަނަ ދުވަހުގައެވެ.
އެ ފެސިލިޓީ ހުޅުވި ނަމަވެސް، އެގްރިކަލްޗާ މިނިސްޓްރީން މިއަދު ބުނެފައި ވަނީ އެ ތަނުން ޚިދުމަތްތައް ދިނުމުގެ ގިނަ އިންތިޒާމުތައް ހަމަޖެހިފައިނުވާ ކަމަށާއި އޭގެ ތެރޭގައި ހިމެނެނީ ކައުންސިލުގައި ކުރަން އެދުނު ކަންތައްތައް ކަމަށް ބުނެފައެވެ.