ދައުލަތުގެ ޚަރަދު ކުޑަކުރުމުގެ ފިޔަވަޅުތަކުގެ ދަށުން ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް އުނިކުރާއިރު، ފަންނީ މުވައްޒަފުން އިސްތިސްނާ ވާނެ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެއެވެ.
ސަރުކާރުގެ ޚަރަދު ކުޑަކުރުމުގެ ފިޔަވަޅުތައް ތަންފީޒު ކުރުމާ ގުޅޭ ގޮތުން މައުލޫމާތު ދެއްވުމަށް މާލިއްޔަތު ކޮމިޓީއަށް ވަޑައިގެން ޒަމީރު ވިދާޅުވީ، މާލީ އިސްލާހުތައް ގެނައުމަށް ޓަކައި ގިނަ މަސައްކަތްތަކެއް ކުރަމުން އަންނަ ކަމަށާއި އޭގެ ތެރެއިން ސަރުކާރު ހިއްސާވާ ކުންފުނިތައް އިސްލާހު ކުރުމުގެ މަސައްކަތް ވެސް ކުރާ ކަމަށެވެ.
އޭނާ ވިދާޅުވީ މިހާރު އިސްލާހުތައް ތަންފީޒު ކުުރުމަށް ގާތްގަނޑަކަށް ތައްޔާރުވެ ނިމިފައިވާ ކަމަށާއި ފިޔަވަޅު އަޅާނެ ގޮތުގެ ތާވަލްތަކެއް ވަރަށް އަވަހަށް ކޮމިޓީއަށް ހުށަހަޅާނެ ކަމަށެވެ. އަދި މިހާތަނަށް އަޅަން ނިންމައިފައިވާ ފިޔަވަޅުތައް ފާހަގަކުރައްވައި ޒަމީރު ވިދާޅުވީ، ދައުލަތުގެ ކުންފުނިތަކުގެ މުވައްޒަފުންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައަޅައިފައިވާ ކަމަށެވެ.
އެ ފިޔަވަޅުތަކުން 12،000 ރުފިޔާއިން ދަށުގެ މުސާރައެއް ލިބޭ މީހުންނާއި ޕްރޮފެޝަނަލް ކެޓެގަރީތަކުގައި ހިމެނޭ މުވައްޒަފުން އިސްތިސްނާ ވާނެ ކަމަށް އޭނާ ވިދާޅުވިއެވެ.
"އެއީ އަޅުގަނޑުމެން އެކްރޮސް ދަ ބޯޑް ބައެއް ކަހަލަ އިންޖިނިއަރުންނާއި ބައެއް ކަހަލަ މީހުންނަކީ އެއީ އަޅުގަނޑުމެން ސެލެރީ ދަށްކޮށްފި ކަމަށްވަންޏާ، އެމީހުންނަށް ބެޓާ އޮޕްޝަންސް އޮވެއްޖެއްޔާ ގޮސްފި ކަމަށްވަންޏާ ކުންފުނިތައް ހިންގަން އުނދަގޫވާނެ،" ޒަމީރު ވިދާޅުވިއެވެ.
ސަރުކާރު ހިއްސާވާ ކުންފުނިތަކުން ދައުލަތަށް ބަރޯސާވުން ހުއްޓާލަން ޖެހޭ ކަމަށާއި އެކަމަށް ޓަކައި ހާސިލުކުރަން ޖެހޭ ލަނޑުދަނޑިތަކެއް އެ ކުންފުނިތަކަށް ދީފައިވާނެ ކަމަށް އޭނާ ވިދާޅުވިއެވެ.
މީގެ އިތުރުން އާމްދަނީ އިތުރުކުރުމަށް ޓީޖީއެސްޓީ ބޮޑުކުރަން ވެސް ސަރުކާރުން ނިންމައިފައިވާ ނިންމުމަށް އިޝާރާތް ކުރައްވައި އޭނާ ވިދާޅުވީ އެއީ މިނިސްޓްރީއާއި އެމްއެމްއޭއާއި އެހެނިހެން ސްޓޭކްހޯލްޑަރުން ގުޅިގެން ވަރަށް ގިނަ ދިރާސާތައްކޮށް ފޯކާސްޓިން މޮޑެލްތައް ހެދުމަށް ފަހު ނިންމައިފައިވާ ނިންމުމެއް ކަމަށެވެ.
"އެހެންވީމަ އަޅުގަނޑުމެންގެ ދިރާސާއިން ދައްކަނި މިވަގުތަށް އަޅުގަނޑުމެއް މިކަންތައް އެހެން ކުރަން ޖެހޭ ކަމަށް،" ޒަމީރު ވިދާޅުވިއެވެ.
މިދިޔަ ބުދަ ދުވަހު ރައީސް ޑރ. މުޙައްމަދު މުއިއްޒު ވަނީ ދައުލަތުގެ ކުންފުނިތަކުގެ އިތުރުން އެހެން ބައެއް ފަރާތްތަކުގެ މުސާރަތައް ވެސް ކުރިއަށް އޮތް ދެ އަހަރު ކުޑަކުރަން ނިންމަވައިފައެވެ. އޭގެ ތެރޭގައި ސިޔާސީ މަގާމުތަކުގައި ތިއްބަވާ ބޭފުޅުންގެ މުސާރައިން 10 ޕަސެންޓާއި މިނިވަން މުއައްސަސާތަކުގެ އިސްވެރިންގެ މުސާރައިން 10 ޕަސެންޓް ހިމެނެއެވެ.
ހަމައެއާއެކު ޝަރުޢީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން 10 ޕަސެންޓް އުނިކުރުމަށް އެ ފަރާތްތަކުގައި އެދިވަޑައިގަންނަވާނެ ކަމަށާއި، ރައީސްގެ މުސާރައިގެ 50 ޕަސެންޓް ނުނަންގަވާނެ ކަމަށް ވިދާޅުވެފައިވެއެވެ.
ރައީސާއި ނައިބު ރައީސްގެ މުސާރަ އާއި އިނާޔަތްތައް ކަނޑައެޅުމުގެ ގާނޫނު ބުނާގޮތުން ރައީސްގެ މުސާރައަކީ މަހަކު 100،000 ރުފިޔާއެވެ.
ރައީސް ނިންމަވައިފައިވާ ގޮތަށް، މުސާރަ 50 ޕަސެންޓް ކުޑަކޮށްފި ނަމަ އެ މަނިކުފާނަށް ލިބިވަޑައިގަންނަވާނީ 50،000 ރުފިޔާއެވެ.
މަޖިލިސް މެންބަރުންގެ މުސާރަތައް ކަނޑައަޅަނީ މެންބަރުން އަމިއްލަފުޅަށް ކަމަށްވާއިރު، މެންބަރުންގެ މުސާރައަކީ މިހާރު ކޮމެޓީ އެލަވަންސާއެކު 82،500 ރުފިޔާއެވެ.