މަޝްހޫރު ޑައިރެކްޓަރު އަދި އެކްޓަރު ރަވީ ފާރޫގުގެ އާ ޝޯ "ހިންތާ" މިރޭ ޕްރިމިއާ ކުރުމަށް ތައްޔާރުވެއްޖެއެވެ.
ހިންތާ ޕްރިމިއާ ކުރުމަށް ތައްޔާރުވަމުން އަންނައިރު ދާދި ފަހުން ވަނީ ޝޯގެ ފުރަތަމަ ޓްރެއިލާ އާންމު ކޮށްފައެވެ. ޝޯގެ ޓްރެއިލާއިން ގިނަ ވާހަކަތަކެއް ކިޔައިދެއެވެ.
އަލަށް ނެރުނު ޓްރެއިލާއިން ފެންނަނީ މުއްސަނދި އަންހެނެއް އޭނާގެ ބާރު ދެމެހެއްޓުމަށް މަސައްކަތް ކުރާ މަންޒަރެވެ. އަދި ފައިސާގެ ބޭނުން ކޮށްގެން އެކި ސިއްރުތައް ފޮރުވައި، އެކި މަސައްކަތްތައް ކުރުވަން އުޅޭތަން ވެސް ޓްރެއިލާއިން ފެނެއެވެ.
މި ޝޯގައި ލީޑް ރޯލުން ފެންނާނީ ދިވެހި ޑީޖޭއެއް ކަމަށްވާ އާއިޝަތު ރާއިޝާ (ރާއީ) އެވެ. އޭގެ އިތުރުން ޝޯއިން ފެންނާނީ ސާމީ ހުސައިން އާއި ތާތި އާދަމް އާއި އަހްމަދު ޝާކިރާއި މުހައްމަދު ރަޝީދު (ދަރާ) އެވެ.
ހިންތާ އުފެއްދުމުގެ ފަހަތުގައި ހިމެނެނީ ހިޓް ޓީވީ ޝޯ "ގަރީނާ"ގެ ޓީމެވެ.
އެގޮތުން، އަލަށް ނެރޭ ވެބް ޝޯގެ ފަހަތުގައި ހިމެނެނީ ގަރީނާގެ ސްކްރީން ލިޔުނު އަހުމަދު ޒަރީރެވެ. މި ޝޯ ތައްޔާރުކުރަނީ ޒަރީރުގެ "އެއްކާފު" ޕްރޮޑަކްޝަނުންނެވެ.
View this post on Instagram
މީޑީއާނެޓްގެ އެމްއެސްކްލަބަށް އަންނަ މި ޝޯގެ އެޕިސޯޑުތައް ކޮންމެ ބުރާސްފަތި ދުވަހެއްގެ ރޭގަނޑު ދައްކާ ގޮތަށް ވަނީ ހަމަޖެހިފައެވެ.
ހިންތާއަކީ ގަރީނާއާ އަޅައިބަލާއިރު ތަފާތު ވާހަކައަކަށް ވާނެއެވެ. ގަރީނާއަކީ ހަގީގީ ހާދިސާތަކަށް ބިނާކޮށް ތައްޔާރުކޮށްފައިވާ ޝޯއެކެވެ. އެގޮތުން، ގަރީނާގައި ކިޔައިދެނީ ފަސް އަހަރުގެ ކުއްޖެއްގެ މަރާ ގުޅިގެން ނޫސްވެރިޔަކު އެ މަރުގެ ހަގީގަތް ހޯދުމަށް މަސައްކަތް ކުރާ ގޮތުގެ ވާހަކައެވެ.