ފަގީރުންނާއި މިސްކީނުންގެ ދަފުތަރުގައި އަލަށް ރަޖިސްޓްރީވާ ފަރާތްތަކަށް އެކަން ކުރަން މޯލްޑިވްސް ޒަކާތު ހައުސް އިން މިއަދު ހަނދާންކޮށްދީފިއެވެ.
ޒަކާތު ހައުސްއިން ނެރުނު އިއުލާނެއްގައި ވަނީ، 'ފަގީރުންނާއި މިސްކީނުންގެ ދަފުތަރު އެކުލަވަލައިލުމުގެ އުސޫލު'ގައިވާ ގޮތަށް އެ ދަފުތަރުގައި ރަޖިސްޓްރީވާން 19 މެއި 2024ވަނަ ދުވަހުން ފެށިގެން ހުޅުވާލާފައިވާ ކަމަށެވެ.
އެ އުސޫލުގައި ފިތުރު ޒަކާތާއި މުދަލު ޒަކާތް ބެހުމަށް ދަފުތަރު ފައިނަލް ކުރާނެ ތާރީޚު ވެސް ބަޔާންކޮށްފައި އޮންނައިރު، ފިތުރު ޒަކާތުގެ ފައިސާ ބަހާނީ އެ އަހަރެއްގެ ރޯދަ މަހުގެ އެއް ވަނަ ދުވަހާ ހަމައަށް ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވާ މީހުންގެ މެދުގައި ކަމަށް ޒަކާތު ހައުސްއިން ވަނީ ބުނެފައެވެ.
އެހެންވެ، ޒަކާތު ހައުސް އިން ވަނީ ދަފްތަރުގައި ރަޖިސްޓްރީވެފައިވާ ފަރާތްތަކާއި އަލަށް ރަޖިސްޓްރީވާ ފަރާތްތަކަށް އެކަން ހަނދާންކޮށްދީފައެވެ.
މި މަހުގެ 12ގައި އިސްލާމިކް މިނިސްޓްރީން ވަނީ މިދިޔަ އަހަރު މުދަލު ޒަކާތުގެ ގޮތުގައި 101 މިލިއަން ނުވަ ލައްކަ ތިރީސްނުވަހާސް ހަތްދިހަ ރުފިޔާ 15 ލާރި ލިބުނު ކަމަށް ބުނެފައެވެ.
އެގޮތުން، މިއީ ރާއްޖޭގެ ތާރީޚުގައި ވެސް އެއް އަހަރެއް ތެރޭ މުދަލު ޒަކާތުގެ ގޮތުގައި ލިބިފައިވާ އެންމެ ބޮޑު އަދަދު ކަމަށްވާއިރު، ޒަކާތުގެ ގޮތުގައި ލިބޭ ފައިސާ އަބަދު ވެސް ޚަރަދުކުރަމުން ދަނީ ޝަރުއީ އުސޫލުތަކާއި މިންގަޑުތަކުގައި ކަނޑައަޅާފައިވާ ގޮތުގެ މަތިން އޭގެ ހައްގުވެރިންގެ މައްޗަށް ކަމަށް އެ މިނިސްޓްރީން ބުނެފައިވެއެވެ.
އޭގެއިތުރުން، 2023ވަނަ އަހަރުގެ ޑިސެމްބަރު މަހުގެ 18ވަނަ ދުވަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފެއްދެވި ޒަކާތު ހައުސްއަކީ ރާއްޖޭގެ ޒަކާތުގެ ނިޒާމު ހަރުދަނާކޮށް ތަރައްގީކުރަން އެޅުނު މުހިންމު ފިޔަވަޅެއް ކަން އެ މިނިސްޓްރީން ވަނީ ފާހަގަކޮށްފައެވެ.