ރައްޔިތުންގެ މަޖިލީހުގެ ރައީސްކަމުން އަބްދުއްރަހީމް އަބްދުﷲ (އަދުރޭ) ވަކިކުރަން ނޫޅޭ ކަމަށާއި ވެރިކަން ކުރާ ޕީއެންސީގެ ޕާލިމަންޓްރީ ގްރޫޕު (ޕީޖީ) ވަރަށް ބަދަހިކަމާ އެކު ތިބީ ރައީސް ޑރ. މުހައްމަދު މުއިއްޒުގެ ފަހަތްޕުޅުގައި ކަމަށް އެ ޕާޓީގެ ޕީޖީ ލީޑަރު އިބްރާހިމް ފަލާހް މިއަދު ވިދާޅުވެއްޖެއެވެ.
ޓޫރިޒަމް މިނިސްޓަރުކަމުން އަބްދުއްރަހީމްގެ ދަރިކަލުން އިބްރާހިމް ފައިސަލް މިއަދު ވަކިކުރުމުން އަބްދުއްރަހީމް ވަނީ ރައީސާ ގުޅުން ގޯސްވި ކަމަށް އެއްބަސްވެލައްވައިފައެވެ.
އަބްދުއްރަހީމް ވަނީ ފައިސަލަށް ވަރަށް ބޮޑަށް ތައުރީފުކުރައްވާ އެކްސްގައި ޕޯސްޓުކުރައްވައިފައެވެ. އެ މަނިކުފާނު ވިދާޅުވީ، ޓޫރިޒަމް މިނިސްޓަރުކަމުގައި ފައިސަލް އިޚުލާސްތެރިކަމާ އެކު މަސައްކަތްކުރައްވާފައިވާ ކަމަށާއި އޭނާއާ މެދުގައި އަބަދު ވެސް ފަޚުރުވެރިވާ ކަމަށް ވިދާޅުވެފައެވެ.
ބައެއް މީޑިއާތަކުން ވަނީ ފައިސަލަށް ފަހު، މަޖިލީހުގެ ރައީސްކަމުން އަބްދުއްރަހީމް ދުރުކުރަން މަސައްކަތްކުރާ ކަމަށް ރިޕޯޓުކޮށްފައެވެ.
އެ ކަމާ ގުޅިގެން 'ސަން'އާ ވާހަކަދައްކަވަމުން މެޖޯރިޓީ ލީޑަރު ފަލާހް ވިދާޅުވީ، މަޖިލީހުގެ ރައީސްކަމުން އަބްދުއްރަހީމް ދުރުކުރުމުގެ އެއްވެސް މަސައްކަތެއް ކުރިއަށްނުދާ ކަމަށެވެ. އެއީ، ކަނޑައެޅިގެން ދޮގެއް ކަމަށް އޭނާ ވިދާޅުވިއެވެ.
"އަޅުގަނޑަށް އެނގޭ އެއް ކަމަކީ މަޖިލީސް ރައީސްކަމުން ވަކިކުރަން އެއްވެސް ކަމެއް ނުހިނގާކަން. ޕާޓީ ހިންގުމާއި އެއްވެސް ކަމަކުން އެކަހެރިނުކުރައްވާކަން،" އޭނާ ވިދާޅުވިއެވެ.
ޕީއެންސީގެ ޕީޖީ ގްރޫޕުގެ ބައެއް މެންބަރުން: މަޖިލިސް މެންބަރުން ތިއްބެވީ ރައީސްގެ ފަހަތްޕުޅުގައި ކަމަށް ފަލާހް ވިދާޅުވި -- ސަން ފޮޓޯ/ މޫސާ ނަދީމް
ފަލާހް ވިދާޅުވީ، މަޖިލީހުގެ ޕީއެންސީއަށް ނިސްބަތްވާ ހުރިހާ މެންބަރުން ވެސް ތިބީ ސަރުކާރާ އެކުގައި ވަރަށް ބަދަހިކޮށް ކަމަށެވެ. ޚުދު އަބްދުއްރަހީމް ވެސް ހުންނެވީ ސަރުކާރާ އެކު ކަމަށް އޭނާ ވިދާޅުވިއެވެ.
"ޕާލިމަންޓްރީ ގްރޫޕު ވަރަށް ބަދަހިކޮށް އޮތީ. އެކީގައި ރައީސާއި ސަރުކާރާ އެކުގައި،" އޭނާ ވިދާޅުވިއެވެ.
"ތި ބޭފުޅުންނަށް އެނގިވަޑައިގަންނަވާނެ، ވަޒީރުން ވަކިކުރުމާއި އައްޔަންކުރުމާ މިއީ ހަމަ ކޮންމެ ސަރުކާރެއްގައި ވެސް އާންމުކޮށް ހިނގާ ކަންކަން ދެއްތޯ. މި ސަރުކާރުގައި ވެސް އަދި ހުރިހާ ސަރުކާރެއްގައި ވެސް ހިނގާ ކަންތައްތައް... އަބްދުއްރަހީމް އެ ހުންނެވީ ސަރުކާރާ އެއްކޮށް،"
ޓޫރިޒަމް މިނިސްޓަރުކަމުން ފައިސަލް ވަކިކުރީ މިއަދު ހެނދުނެވެ. އެކަމަކު، އޭނާ މަގާމުން ވަކިކުރީ ކީއްވެ ކަމެއް ރައީސް އޮފީހުން ނުބުނެއެވެ.
މަގާމުން ވަކިކުރުމާ ގުޅިގެން 'ސަން'އާ ވާހަކަދައްކަވަމުން ފައިސަލް ވިދާޅުވީ، އޭނާ މަގާމުގެ މަސްއޫލިއްޔަތުތައް އަދާކޮށްފައިވާނީ އިޚުލާސްތެރިކަމާ އެކުގައި ކަމަށާއި މަގާމުން ވަކިކުރި ސަބަބެއް ނޭނގޭ ކަމަށެވެ. ރައީސް އޮފީހުގެ ސިޓީގައި ވެސް މަގާމުން އޭނާ ވަކިކުރި ސަބަބެއް ނުބުނާ ކަމަށް ފައިސަލް ވިދާޅުވިއެވެ.
އޭނާ ވިދާޅުވީ، ސިޔާސީ ކަންކަމުން ދުރަށް ނުދާނެ ކަމަށާއި މާ ގަދަކޮށް ސިޔާސީ ހަރަކާތްތަކުން ފެންނާނެ ކަމަށެވެ.