ޓޫރިޒަމް މިނިސްޓަރުކަމުގެ މަގާމުން، މި ސަރުކާރު ގެންނަން އެންމެ އިސްކޮށް އުޅުއްވި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ދަރިކަލުން އިބްރާހިމް ފައިސަލް މިއަދު ވަކިކުރެއްވުމާއެކު، "އަސް ވިއްކިއަސް ލަގަން ވިއްކަންނުވަނީ މިހެންވެ"ކަމަށް ވިދާޅުވެ އަބްދުއްރަހީމަށް ބަހުގެ ހޫނު ހަމަލައެއް، ކުރީގެ ނައިބު ރައީސް ޑރ. މުޙައްމަދު ޖަމީލް އަހްމަދު މިއަދު ދެއްވައިފިއެވެ.
ކުރީގެ ރައީސް އަބްދުﷲ ޔާމީނާ އަރިސްކޮށް އުޅުއްވާ ޖަމީލް "ސަން" އާ ވާހަކަ ދައްކަވަމުން ވަނީ އަބްދުއްރަހީމް ސިޔާސީ ގޮތުން ޖެއްސެވި ހިސާބަށް ވީ ކިހިނެއްތޯ ސުވާލު އުފައްދަވައިފައެވެ.
އެގޮތުން އަބްދުއްރަހީމަކީ ރައީސް މުއިއްޒަށް ވަފާތެރިކަމާއެކު މަސައްކަތްކޮށްދެއްވި ބޭފުޅެއް ކަމަށާއި، ނަމަވެސް މިއަދު ރައީސް ކަން ކުރެއްވީ ކިހިނެއްތޯ ވެސް ޖަމީލު ސުވާލު އުފެއްދެވިއެވެ.
އެއާއެކު ޖަމީލް ވިދާޅުވީ ސިޔާސީ ގޮތުން ހުރިހާ ބާރުތަކެއް އެންމެ ބޭފުޅެއްގެ އަތްމައްޗަށް ޖަމާކުރުމަކީ އަމިއްލަ މީހާގެ ބާރު ކެނޑޭނެ ކަމެއްކަން ސިޔާސީ ކަންކަން އެނގޭ "ކުޑަކުއްޖަކަށް ވެސް އެނގޭނެ" ކަމަށެވެ.
"ޕާޓީ ވެސް ދިޔައީ. ޕީޕީއެމް ވެސް ފައްތައިލީ. ރައީސް ޔާމީން ވެސް ދޫކޮށްލީ. އަނެއްކާ ގޮސްފައި ރައްޔިތުންގެ މަޖިލިސް ވެސް ހުރިހާ ބާރެއް، މެންބަރުންގެ ބާރެއް މި ދިނީ ރައީސް އަތަށް. އެހާ ހިސާބުން އެންމެންގެ ބާރުތައް އެއްވެ، އެންމެ މީހަކު ހަގީގަތުގައި ބާރުގެ ވެރި ފަރާތަކީ. އެހިސާބުން އަޅުގަނޑު މި ދަންނަވަނީ ސިޔާސީ ގޮތުން ކަފުންކުރީއޭ،" ޖަމީލް ވިދާޅުވިއެވެ.
އެހެންކަމުން ދެން ރައީސް މުއިއްޒު އެފަދައިން ނިންމަވާ ނިންމުންތަކާމެދު އެއްވެސް މިންވަރަކަށް ހައިރާންވާންޖެހޭ ސަބަބެއް ވެސް ނެތްކަމަށް ޖަމީލް ވިދާޅުވިއެވެ.
ޖަމީލް ވިދާޅުވީ މި ވެރިކަމަކީ ރައްޔިތުން، ރައީސް ޔާމީނަށް ދިން ވެރިކަމެއް ކަމަށެވެ. އަދި މިއަދު އަބްދުއްރަހީމަށް ވެސް ސިޔާސީ ގޮތުން ގެއްލުން ލިބެމުން އަންނަ ސަބަބަކީ ރައީސް ޔާމީނަށް ޚިޔާނާތްތެރިވުން ކަމަށް ވެސް ޖަމީލު ވިދާޅުވިއެވެ.
"ރައީސް ޔާމީނުގެ ގައިގައި ކޮޅުފައިން ޖަހައިފައި މި ބޭފުޅުން އެނބުރިލި ވަގުތަކީ މި ވެރިކަން ނިމުނު ވަގުތު. އަޅުގަނޑު ދެކޭ ގޮތުގަައި ތީގެ ތެރޭގައި، ޣައްސާނަކީ ވެސް، ޝިޔާމަކީ ވެސް، ސައީދަކީ ވެސް ދެން ތިބި ކޮންމެ މީހަކަށް ވިޔަސް އެ މީހުންގެ އަމިއްލަ ބާރު ކެނޑިފައި އެއޮތީ ސިޔާސީ ގޮތުން،"
ޖަމީލް އިތުރަށް ވިދާޅުވީ ވެރިކަމުގެ މަސްއޫލިއްޔަތަކީ ބުރަ ޒިންމާއެއްކަމަށާއި އެއީ އެކަނިއެކަނިން ކޮށްލެވޭ ވަރުކަމެއް ނޫންކަމަށެވެ. އެހެންކަމުން އެ ކަން ކުރެވޭނީ ވަރަށް ގިނަ ބަޔަކު ޒިންމާ ނަގައިގެން މަސައްކަތް ކޮށްގެންކަމަށް ވިދާޅުވިއެވެ. އެ ކަން ކުރެވޭނީ އިތުބާރު އޮވެގެން ކަމަށް ޖަމީލު ވިދާޅުވިއެވެ. ނަމަވެސް މިހާރު ރައީސަށް އޮތް އިތުބާރު ގެއްލޭނެކަމަށް ޖަމީލް ވިދާޅުވިއެވެ.