ރާއްޖޭގައި ފުޅާދާއިރާއެއްގައި ހަށި ވިއްކުމުގެ ވިޔަފާރި ކުރާކަމަށް ތުހުމަތު ކުރެވޭ ފަސް ބިދޭސީއަކު އަތުލައިގަނެ، އޭގެތެރެއިން އެކަކު ޑީޕޯޓުކޮށްލައިފިއެވެ.
މިއީ ވިއެޓްނާމަށް ނިސްބަތްވާ ބިދޭސީންގެ ނެޓްވޯކެކެވެ.
މިކަމާ ގުޅިގެން އިމިގްރޭޝަނުން ބުނީ، މިއީ ފުޅާ ދާއިރާއެެއްގައި ރާއްޖޭގައި ހަށި ވިއްކުމުގެ ވިޔަފާރި ކުރާ ކަމަށް ތުހުމަތުކުރޭ ބިދޭސީން ހޯދުމަށް ފުލުހުންނާ ގުޅިގެން ހިންގާ ޚާއްސަ އޮޕަރޭޝަންތަކެއްގެ ތެރެއިން އަތުލައިގެން ބިދޭސީން ކަމަށެވެ. މި އޮޕަރޭޝަންގެ ތެރެއިން އަތުލައިގެންފައި ވަނީ، ހަތަރު އަންހެނުންނާއި އެޖެންޓަކަށް މަސައްކަތް ކުރި ފިރިހެނެކެވެ.
އެގޮތުން، އެޖެންޓާއި އޭގެތެރެއިން ތިން އަންހެނުންނަކީ ވޯކް ވިސާގައި ރާއްޖޭގައި އުޅެމުން ދިޔަ ބައެއްކަން ފާހަގަކޮށް އިމިގްރޭޝަނުން ވަނީ މި މައްސަލަތައް ތަހުގީގު ކުރުމަށް ފަހު އެއް އަންހެނަކު ޑީޕޯޓުކޮށްފައިވާ ކަމަށް ބުނެފައެވެ. އަދި، ބާކީ ހަތަރު މީހުން ޑީޕޯޓުކުރުމުގެ މަސައްކަތް މިހާރު ކުރަމުން އަންނަ ކަމަށް އިމިގްރޭޝަނުން ވަނީ ބުނެފައެވެ.
މިހާރު ޑީޕޯޓުކޮށްފައި ވަނީ އުމުރުން 37 އަހަރުގެ އަންހެނެކެވެ.
އިމިގްރޭޝަނުން މިމަހުގެ 10ގައި ވަނީ ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރިކަމުގެ ތުހުމަތުވާ ބިދޭސީ ދެ އަންހެނަކު އަތުލައިގަނެ ޑީޕޯޓުކޮށްފައެވެ.
ގަވައިދާ ޚިލާފަށް ރާއްޖޭގައި އުޅޭ އަދި ވިޔަފާރިކުރާ ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ވަރަށް ގިނަ މަސައްކަތްތަކެއް ފާއިތުވި އަހަރު ވެސް ކޮށްފައިވެއެވެ. އެގޮތުން، ހުޅުމާލެއާއި މާލޭގައި މާސް އިންސްޕެކްޝަންތަކާއި، ރެއިޑް އޮޕަރޭޝަންތައް ހިންގާފައިވެއެވެ.