އެމެރިކާގެ ރައީސް ޑޮނަލްޑް ޓްރަމްޕާ ދެކޮޅަށް ޖިނާއީ ދެ މައްސަލައެއް ހުށަހެޅުއްވި ވަކީލުންތަކެއް މަގާމުން ވަކިކޮށްފައިވާ ކަމަށް އޮފިޝަލަކު ވިދާޅުވެއްޖެއެވެ.
ވަކީލުން ވަކިކުރީ ޓްރަމްޕްގެ އެޖެންޑާ އަމާނާތްތެރިކަމާއެކު ތަންފީޒު ކުރެވޭނެ ކަމުގެ އިތުބާރު އެމީހުންގެ މައްޗަށް ނެތުމުން ކަމަށް އެކްޓިން އެޓާނީ ޖެނެރަލްގެ މަގާމަށް ޓްރަމްޕް އައްޔަން ކުރެއްވި ޖޭމްސް މެކްހެންރީއާ ހަވާލާދެއްވާ ޖަސްޓިސް ޑިޕާޓްމަންޓުގެ އޮފިޝަލަކު ވިދާޅުވިއެވެ.
އެ ވަކީލުންގެ ތެރޭގައި ޓްރަމްޕާ ދެކޮޅަށް ދައުވާ އުފުލުމުގައި އިސްކޮށް އުޅުއްވި ޖެކް ސްމިތްއާއެކު މަސައްކަތްކުރެއްވި ވަކީލުންވެސް ހިމެނެއެވެ. ސްމިތު ވަނީ މި މަހުގެ ކުރީކޮޅު އެ ޑިޕާޓްމަންޓުން އިސްތިއުފާ ދެއްވާފައެވެ.
ޓްރަމްޕާ ދެކޮޅަށް ހުށަހެޅި ދެ މައްސަލައަކީ ގަވާއިދާ ޚިލާފަށް ލިޔެކިޔުންތައް ނަގައި އެމަނިކުފާނުގެ ގެކޮޅު ކަމަށްވާ ފްލޮރިޑާގެ މާ-އަލަގޯ ރިސޯޓުގެ ކޮޓަރިތަކުގައި ރައްކާކޮށްފައިވާ ކަމުގެ ތުހުމަތާއި 2020ވަނަ އަހަރު ބޭއްވި އިންތިޚާބުގެ ނަތީޖާ ބާތިލު ކުރަން ރޭވި ކަމުގެ ތުހުމަތެވެ.
އެ ދެ މައްސަލަ ވެސް ވަނީ ޓްރަމްޕްގެ މައްޗަށް ސާބިތުވެފައެވެ. ނަމަވެސް ޓްރަމްޕް ވަނީ ކުށަށް އިންކާރުރައްވައި އެއީ ސިޔާސީ ގޮތުން ކުރި ދައުވާއެއް ކަމަށް ވިދާޅުވެފައެވެ.
ޓްރަމްޕްގެ މައްޗަށް ކޮށްފައިވާ އެހެން ދައުވާއެއް ކަމަށްވާ ބަރަހަނާ ފިލްމު ކުޅޭ މީހަކާ އެކު ބޭއްވި ނަހަމަ ގުޅުން ސިއްރުކުރަން ފައިސާ ދިން މައްސަލައިގައި ސާބިތުވި ކުށްތަކަށް އަދަބެއް ނުދީ ދޫކޮށްލުމަށް ހުކުމްކޮށްފައި ވަނީ މި މަހުގެ 10 ވަނަ ދުވަހެވެ.
ޓްރަމްޕުގެ މައްޗަށް ސާބިތުވާ ކަމަށް 2024 ވަނަ އަހަރުގެ މެއި މަހު ކަނޑައެޅި، ވިޔަފާރީގެ ރެކޯޑްތައް އޮޅުވާލުމުގެ 34 ދައުވާގައި ޖަލު ހުކުމެއް އިއްވެން އޮތް ނަމަވެސް ފަނޑިޔާރު ނިންމެވީ ޓްރަމްޕަށް ޖަލު ހުކުމެއް ވެސް އަދި ޖޫރިމަނާގެ ހުކުމެއް ވެސް ނީއްވާށެވެ. މިއީ ވަރަށް މަދުން ނޫނީ އެމެރިކާގެ ކޯޓުތަކުން ނިންމާ ގޮތެއް ނޫނެވެ.