ދިވެހި ފުލުހުންގެ ޚިދުމަތުގެ އިސް އޮފިސަރުންތަކަކަށް އަވަސް އަރުވާލައިގެން ޕްރޮމޯޝަން ދިން ކަމަށް ބުނާ މައްސަލައިގައި އެކަން ހުއްޓުވަން ސިވިލް ކޯޓުން އަމުރެއް ނެރެނުދިން މައްސަލަ ހައިކޯޓުގައި އިސްތިއުނާފުކުރުމުން އެ ކޯޓުން ވެސް އަމުރު ނެރެނުދޭން މިއަދު ނިންމައިފިއެވެ.
މިއީ ރައީސް އިބްރާހިމް މުހައްމަދު ޞާލިޙްގެ ރިޔާސީ ދައުރު ނިމެން ދެ ދުވަހަށް ވެފައިވަނިކޮށް ފުލުހުންގެ އިސް އޮފިސަރުންތަކަކަށް ޕްރޮމޯޝަން ދިން މައްސަލައެކެވެ. އެކަން ކުރީ އަވަސް އަރުވާލައިގެން ކަމަށް އެންޓި ކޮރަޕްޝަން ކޮމިޝަން (އޭސީސީ)ން ވަނީ ތުހުމަތުކޮށްފައެވެ.
ޕްރޮމޯޝަންތައް ހުއްޓުވަން އޭސީސީން ވަނީ ފުލުހުންނަށް އަންގައިފައެވެ. އެކަމަކު، އެ އެންގުން އެހެން އޮއްވައި ޕްރޮމޯޝަންތައް ވަނީ ދީފައެވެ.
ފުލުހުން ބުނީ، އޭސީސީގެ އެންގުމަކީ އެ ކޮމިޝަނަށް ލިބޭ ގާނޫނީ ބާރުގެ ބޭރުން އަންގާފައިވާ އެންގުމެއް ކަމަށެވެ.
އެހެންވެ، އޭސީސީން ވަނީ އެ މައްސަލަ ސިވިލް ކޯޓަށް ހުށަހަޅާފައެވެ. އެ މައްސަލައިގައި، ޕްރޮމޯޝަންތައް ހުއްޓުވަން ވަގުތީ އަމުރެއް ނެރެދޭން ވެސް ވަނީ އެދިފައެވެ. އެކަމަކު، އެ އަމުރު ސިވިލް ކޯޓުން ނެރެދީފައެއް ނުވެއެވެ.
އެ މައްސަލަ ހައިކޯޓުގައި އިސްތިއުނާފުކުރުމުން އެ ކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން މިއަދު ހުކުމްކުރީ އަމުރު ނެރެދެވެން ނެތް ކަމަށެވެ.
ތިން ފަނޑިޔާރުންގެ އިއްތިފާގުން ކުރި ހުކުމުގައި ބުނީ، މި މައްސަލައިގައި ހިމެނޭ ވަގުތީ އަމުރު ނެރެނުދީފި ނަމަ މައްސަލަ ހުށަހެޅި ފަރާތް (އޭސީސީއަށް) ލިބޭނެ ގެއްލުމެއް ބަޔާންކޮށްދީފައިނުވާ ކަމަށާއި ހުއްޓުވަން ބުނި ޕްރޮމޯޝަންތައް ދީ، ބޮޑުކުރި މުސާރަތައް މިހާރު ދެމުންދާއިރު އިތުރު ކަމެއް ނުކުރަން އަމުރުކޮށްގެން ނުކުންނާނެ ނަތީޖާއެއް ބުނެދެވިފައިނުވާ ކަމަށެވެ.
އެކަމަކު، ހައިކޯޓުން އަމުރު ނެރެނުދިން ނަމަވެސް ސިވިލް ކޯޓުގެ އަމުރު ވަނީ ބާތިލުކޮށްފައެވެ.
ހައިކޯޓު: އެ ކޯޓުން ވެސް ފުލުހުންގެ ޕްރޮމޯޝަންތައް ހުއްޓުވަން އަމުރު ނެރެއެއް ނުދިން -- ސަން ފޮޓޯ/ ފަޔާޒު މޫސާ
ހައިކޯޓުގެ ހުކުމުގައި ބުނީ، ސިވިލް ކޯޓުގެ އަމުރުގައި އެ ނިންމުމަށް ވާސިލުވި ސަބަބުތައް އެކަށީގެންވާ ގޮތެއްގައި ބަޔާންކޮށްދީފައިނުވާ ކަމަށާއި އަދި އަސްލު މައްސަލައިގެ މައުޟޫއަށް އަސަރުކުރާނެ ނުކުތާއަކާ މެދު ގޮތެއް ކަނޑައަޅާފައިވާ ކަމަށެވެ.
އެ ކޯޓުގައި މި މައްސަލަ ބެއްލެވީ ފަނޑިޔާރު މުހައްމަދު ފައިސަލާއި ފަނޑިޔާރު މުހައްމަދު ޝަނީޒް އަބްދުﷲ އަދި ފަނޑިޔާރު މުހައްމަދު ސަލީމެވެ. ރިޔާސަތު ބެލެހެއްޓެވީ ފަނޑިޔާރު މުހައްމަދު ޝަނީޒެވެ.
"ސަން"އަށް މީގެ ކުރިން އެނގިފައިވާ ގޮތުގައި މިދިޔަ ސަރުކާރު ނިމެން ކުޑަތަންވެފައި އޮއްވައި މުޅިން އަލަށް އެސިސްޓެންޓް ކޮމިޝަނަރު އޮފް ޕޮލިސްގެ މަގާމަށް ހަ ބޭފުޅަކު ޕްރޮމޯޓް ކޮށްދީފައިވެއެވެ. އެހާތަނަށް އެ މަގާމުގައި ފަސް ބޭފުޅުން ތިއްބެވިއެވެ. އަދި، ޗީފް ސުޕްރިޑެންޓުންގެ މަގާމަށް އަށް ބޭފުޅަކު ޕްރޮމޯޓްކޮށްފައިވެއެވެ.
މީގެ ކުރިން ފުލުހުން ބުނީ، އެއީ މި އަހަރުގެ އޭޕްރީލް މަހުން ފެށިގެން އިއުލާނުކޮށް، ހަމަޖެހިފައިވާ ޕްރޮމޯޝަންތަކެއް ކަމަށެވެ. އެ ޕްރޮމޯޝަންތަކަކީ އެ ޚިދުމަތުގެ މަގާމުގެ ކުރިއެރުން ދިނުމުގެ ގަވާއިދާ އެއްގޮތްވާ ގޮތުގެ މަތިން އެކަމަށް ކަނޑައަޅާފައިވާ އުސޫލުތަކާ އެއްގޮތަށް ދެމުން ގެންދާ ޕްރޮމޯޝަންތަކެއް ކަމަށް ވެސް ބުނެފައިވެއެވެ.