މާލެ ސިޓީ ކައުންސިލާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގުޅިގެން މާލޭގެ މަގުތައް ސާފުކުރުމުގެ މަސައްކަތް ކުރުމަށް ނިންމައިފިއެވެ.
މި ނިންމުން ނިންމީ ސިޓީ ކައުންސިލާއި ވެމްކޯއާ ދެމެދު މިއަދު ބޭއްވި ބައްދަލުވުމެއްގެ ތެރެއިންނެވެ. މި ބައްދަލުވުމުގައި ނިންމީ އަންނަ މަހުގެ 15އިން ފެށިގެން މާލޭގެ މަގުތަކަށް އުކާފައި ހުންނަ ކުނިތައް ނަގައި ސާފުކުރުމަށެވެ.
މި ބައްދަލުވުމުގައި މާލެ ސިޓީގެ މޭޔަރު އާދަމް އާޒިމް ވިދާޅުވީ، ރޯދަމަހަކީ ހުރިހާ ރައްޔިތުން އަޅުކަމައިގެން މަސްއޫލުވެގެން އުޅޭ މަހެއް ކަމުން މާލޭގެ މަގުތަކާއި ގޯޅިތަކާއި ހުސްބިންތަކާއި ޕާކުތައް ސާފުތާހިރުކޮށް ބޭއްވުމަކީ ވަރަށް މުހިންމު ކަމެއް ކަމަށެވެ. މަގުތައް ރީތިކޮށް ބޭއްވުމަށް، ކައުންސިލުން މަސައްކަތް ކުރަމުން ގެންދާނެ ކަމަށް މޭޔަރު އާޒިމް ވިދާޅުވިއެވެ.
"މި މަސައްކަތުގައި ވެމްކޯއާ ގުޅިގެން މަސައްކަތް ކުރުމަށް ނިންމީ، މާލޭގެ ރައްޔިތުންނަށް އިތުރު ފަސޭހަތަކެއް ހޯދައިދިނުމުގެ ގޮތުން." މޭޔަރު ވިދާޅުވިއެވެ.
މި މަސައްކަތުގެ ތެރޭގައި ކުނީގެ އިތުރަށް ބާ ވެހިކަލްތައް ނަގައި މަގުތަކުގެ ކާނުތައް ސާފުކުރަން ވެސް ވަނީ ނިންމާފައެވެ. އޭގެއިތުރުން، މާލެ ސާފުތާހިރުކޮށް ބޭއްވުމަށް މާލެ ސިޓީ ކައުންސިލްގެ ކޮމިއުނިޓީ ޔުނިޓުން ވަނީ ހާއްސަ ޓާސްކްފޯހެއް އެކުލަވައިލައިފައެވެ.
އެ ކައުންސިލުން ވަނީ އާންމު މަސްތަކަށް ވުރެ ރޯދަމަހަށް ކުނި ގިނަވާތީ، މަގުތަކަށް ކުނި ނޭޅުމަށާއި މާލެ ސާފުކޮށް ބޭއްވުމަށް، އެ ކައުންސިލުން ކުރަމުންދާ މަސައްކަތަށް އެއްބާރުލުން ދެއްވުމަށް އިލްތިމާސްކޮށްފައެވެ.
މިދިޔަ އަހަރުގެ ރޯދަމަހު ވެސް މަގުމަތީގައި ކުނި ގިނަވުމުގެ މައްސަލަ ވަރަށް ބޮޑުވިއެވެ.