ރާއްޖެއަށް 12 ކިލޯގެ ހަޝިޝް އޮއިލް އެތެރެކުރަން އުޅުނު ބަޔަކު, އިންޑިއާގެ ޑިރެކްޓޮރޭޓް އޮފް ރެވެނިއު އިންޓެލިޖެންސް (ޑީއާރުއައި)އިން އަތުލައިގެންފިއެވެ.
މިދިޔަ ބުދަ ދުވަހު އިންޑިއާގެ ނޫސްތަކުގައި ރިޕޯޓުކޮށްފައިވާ ގޮތުން، ޓުޓިކޮރިން ބަނދަރުން ޔޮޓެއްގައި 12 ކިލޯގެ ހަޝިޝް އޮއިލް ރާއްޖެއަށް އެތެރެކުރަން އުޅުނު ހަތަރު މީހަކު ޑީއާރުއައިން ހިފެހެއްޓިއެވެ.
އެ މައުލޫމާތު ލިބުމާ އެއްކޮށް ޑީއާރުއައިން ޓުޓިކޮރިން ޕޯޓު ސަރަހައްދުގެ ސެކިއުރިޓީ ވަރުގަދަ ކުރި ކަމަށް ނޫސްތަކުން ރިޕޯޓުކޮށްފައިވެއެވެ.
ނޫސްތަކުން ރިޕޯޓް ކޮށްފައިވާ ގޮތުގައި، މިދިޔަ ބުދަ ދުވަހު ސައިކަލެއްގައި ދިޔަ ދެ މީހަކު ޓުޓިކޮރިންއިން ހުއްޓުވައިގެން، އެ މީހުންގެ ދަބަސް ބަލާ ފާސްކުރިއިރު އޭގެން 12 ދަޅުގެ ހަޝިޝް އޮއިލް ފެނުނެވެ.
ހިފެހެއްޓި މީހުންގެ ތެރޭގައި ހިމެނެނީ 33 އަހަރުގެ މީހަކާއި 34 އަހަރުގެ މީހެކެވެ.
އެމީހުންގެ އިތުރުން އެ މައްސަލާގައި ވަނީ އިންޑިއާގެ ފުލުހުންގެ ފޯސް، ސެންޓްރަލް އިންޑަސްޓްރިއަލް ސެކިއުރިޓީ ފޯސް (ސީއައިއެސްއެފް)ގެ 30 އަހަރުގެ މުވައްޒަފެއް ވެސް ހިފަހައްޓާފައެވެ. އޭނާގެ މައްޗަށް ތުހުމަތު ކުރަނީ ސެކިއުރިޓީ ޗެކް ޕޮއިންޓުތަކުން ސަލާމަތްވާން އެހީތެރިވި ކަމަށެވެ.
މީގެ އިތުރުން މި މައްސަލައިގައި، ހަޝިޝް އެތެރެކުރަން އުޅުނު ޔޮޓުގެ 56 އަހަރުގެ ކުރޫއެއް ހިފަހައްޓާފައިވެއެވެ.
ނޫސްތަކުގައިވާ ގޮތުން، ހަޝިޝް އޮއިލްގެ މަގުމަތީ އަގަކީ ކިލޯއަކަށް އެއް ކްރޯޑް ރުފީސް ކަމަށް ވާއިރު، އެއީ ގާތްގަނޑަކަށް 1.8 މިލިއަން ރުފިޔާ ކަމަށް ބެލެވެއެވެ. މި މައްސަލައިގައި އަތުލައިގަތް ހަޝިޝްގެ އަގު 21 މިލިއަން ރުފިޔާއަށް އަރާނެ ކަމަށް ލަފާކުރެވެއެވެ.
މި މައްސާލަގާއި ފުލުހުންގެ ތަރުޖަމާނު އަހުމަދު ޝިފާން މިއަދު ވިދާޅުވީ، އެ ކޭހުގެ މައުލޫމާތު ހިއްސާކުރަން ރަސްމީކޮށް އިންޑިއާގެ ކަމާ ގުޅޭ އިދާރާތަކަށް އަންގާފައިވީ ނަމަވެސް މިހާތަނަށް ޖަވާބެއް ނުލިބޭ ކަމަށެވެ.