މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ)އިން އިންތިޒާމުކޮށްގެން "މޯލްޑިވްސް ޓްރެވަލް ކޮންފަރެންސް 2025، ވިމެންސް އެޑިޝަން" ގެ ނަމުގައި ޚާއްސަ ކޮންފަރެންސެއް ބާއްވައިފިއެވެ.
މި ކޮންފަރެންސް ބާއްވާފައި ވަނީ އައްޑޫ ސިޓީގެ އިކުއޭޓާ ވިލެޖްގައެވެ.
އެ ހަރަކާތަށްފަހު ބީސީސީއިން އިންތިޒާމުކޮށްގެން ފައިނޭންޝަލް ލިޓަރަސީއާ ބެހޭ ހިލޭ ތަމްރީނެއް ވަނީ ކުރިއަށް ގެންގޮސްފައެވެ.
މި ކޮންފަރެންސަކީ ޓޫރިޒަމް މިނިސްޓްރީއާއި، ޖެންޑާ މިނިސްޓްރީއާއި، މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)އާއި، އައްޑޫ ސިޓީ ކައުންސިލް އަދި ނޭޝަނަލް ހޮޓެލްސް އެންޑް ގެސްޓްހައުސަސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް)ގެ އިތުރުން އެކި އަންހެނުންގެ ޖަމިއްޔާތަކުގެ އެހީތެރިކަމާއެކު ބޭއްވި ކޮންފަރެންސެކެވެ.
މި ކޮންފަރެންސްގައި މައިގަނޑު ގޮތެއްގައި އަލިއަޅުވައިލި ކަންތައްތަކަކީ:
- އައްޑޫގައި އަންހެނުންނަށް ހުރި ވަޒީފާގެ ފުރުސަތުތައް.
- ފަތުރުވެރިކަމުގެ ދާއިރާގެ ވަޒީފާތައް ހަމައެކަނި ރިސޯޓުތަކަށް ހަނިވެފައި ނުވާކަން.
- މަސައްކަތްކުރާ އަންހެނުންނާމެދު މުޖުތަމައުގައި އޮންނަ ނޭދެވޭ ނަޒަރު ނައްތާލުމުގެ މުހިންމުކަން.
މޯލްޑިވްސް ޓްރެވަލް ކޮންފަރެންސް 2025، ވިމެންސް އެޑިޝަން ބާއްވައިފި -- ފޮޓޯ/ މަޓާޓޯ
މި ކޮންފަރެންސްގައި ބައިވެރިވި ފަރާތްތަކުގެ ތެރޭގައި އައްޑޫ ވިމެންސް އެސޯސިއޭޝަން، ވެށިސާފު، ޑަބްލިއުޑީސީ، އައްޑޫ ސިޓީ ސަދަން ކޮމިއުނިޓީ އެމްޕަވަމަންޓް، އވަރމަންޓް އެސޯސިއޭޝަން އޮފް މޯލްޑިވްސް، ވިމެން އިން މެނޭޖްމަންޓް މޯލްޑިވްސް، ވިމެން އޮން ބޯޑް، ވިމެން އޮން ޓްރެޕްރެނިއާސް އެސޯސިއޭޝަން މޯލްޑިވްސް އަދި އެސޯސިއޭޝަން އޮފް ލޭޑީ އޮންޓްރެޕްރެނިއާސް ހިމެނެއެވެ.
މި ކޮންފަރެންސްގެ ޕެނަލްގައި ހިމެނެނީ:
- އައްޑޫ ސިޓީ ކައުންސިލްގެ އެގްޒެކެޓިވް އަދި އެކްޓިން ސެކްރެޓަރީ ޖެނެރަލް، ނޫރާ ޖަލީލް
- ވެލާ ޕްރައިވެޓް އައިލެންޑްގެ އެޑްމިނިސްޓްރޭޓިވް މެނޭޖަރު، އަލްމާސް ހަސަން
- ޕްރޮޖެކްޓް މެނޭޖަރު އަދި ސިވިލް އިންޖިނިއަރު، އާމިނަތު ޝިފާނާ
- ނޫރާނީ ސްކޫލްގެ ޕްރިންސިޕަލް، ފާތިމަތު ހަފްސާ
މޯލްޑިވްސް ޓްރެވަލް ކޮންފަރެންސް 2025، ވިމެންސް އެޑިޝަން ބާއްވައިފި -- ފޮޓޯ/ މަޓާޓޯ
އެ ކޮންފަރެންސްއާ ގުޅޭގޮތުން މަޓާޓޯ ގެ ސީއީއޯ އާމިނަތު ސޫޒަން ވިދާޅުވީ އުންމީދަކީ ކޮންފަރެންސްގައި ކުރެވުނު މަޝްވަރާތަކަކީ އައްޑޫގެ އަންހެނުންނަށް ފަތުރުވެރިކަމުގެ ސިނާއަތުގައި ހިއްސާވުމަށް، އެކި ގޮތްތައް ބަލައި، ދިރާސާކުރުމަށް މަގުފަހިކޮށްދިން ފިޔަވަޅަކަށް ވެގެންދިއުން ކަމަށެވެ.
އަދި މަސައްކަތްކުރާ އަންހެނުންނަށް ދިމާވާ ގޮންޖެހުންތަކާ ކުރިމަތިލާނެ ގޮތްތަކާ ބެހޭގޮތުން ކޮންމެހެން ބޭނުންވާ މަޝްވަރާތައް ފެށިގެންދިއުމަށް އުންމީދުކުރައްވާ ކަމަށް ވެސް އޭނާ ވިދާޅުވިއެވެ.
އެ ކޮންފަރެންސަކީ މަޓާޓޯގެ ވިމެންސް އެޑިޝަން އިނީޝިއޭޓިވްގެ ދަށުން ކުރިއަށް ގެންދާ ކޮންފަރެންސްތަކުގެ ތެރެއިން އެއް ކޮންފަރެންސެވެ. އަދި އެ އިނީޝިއޭޓިވް ފެށިފައި ވަނީ އޯގަސްޓް 2024ގައެވެ. އޭގެ މަގުސަދަކީ ފަތުރުވެރިކަމުގެ ދާއިރާގައި އަންހެނުން ބާރުވެރިކުރުވުމެވެ.
މަޓާޓޯއިން ބުނީ ފުރަތަމަ ކޮންފަރެންސް ފަދައިން، އެ ކޮންފަރެންސްގެ ތަފްސީލީ ރިޕޯޓެއް ކޮންފަރެންސްގެ ފަހުން ނެރޭނެ ކަމަށެވެ. އަދި ކުރިއަށް އޮތް އެޑިޝަންތައް ރޭވިފައި ވަނީ މެއި 2025ގައި ތޮއްޑޫގައި ބޭއްވުމަށް ކަމަށާއި، އޯގަސްޓް 2025ގައި މާލޭގައި، ހޮޓެލް ޖެން ގުޅިގެން ބޭއްވާނެ ކަމަށް މަޓާޓޯއިން ބުންޏެވެ.