ޖަރުމަނު ބުންޑެސްލީގާގެ އެއްވަނައިގައި އޮތް ބަޔާން މިޔުނިކުން ފްރެއިބާގް ބަލިކޮށް، އެއްވަނައިގައި ލީޑު ފުޅާކޮށްފިއެވެ.
ފްރެއިބާގްގެ ދަނޑުގައި ކުޅުނު މި މެޗު ބަޔާނުން ކާމިޔާބުކޮށްފައިވަނީ 2-1 އިންނެވެ.
މެޗުގެ 15 ވަނަ މިނެޓުގައި އުފެއްދި ހަމަލާއެއްގައި ބަޔާނުން ވަނީ މެޗުގެ ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ ހެރީ ކޭންއެވެ. މިއީ މިދިޔަ އަހަރުގެ ނޮވެމްބަރު މަހުގެ 22 ވަނަ ދުވަހު އައުގްސްބާގާ ދެކޮަޅަށް ހެޓްރިކް ހެދި ފަހުން އޯޕަން ޕްލޭއިން އޭނާ ލީގުގައި ލަނޑެއް ކާމިޔާބުކުރި ފުރަތަމަ ފަހަރެވެ.
މެޗުގައި ބަޔާންގެ ދެވަނަ ލަނޑު މެޗުގެ 54 ވަނަ މިނެޓުގައި އެ ޓީމަށް ކާމިޔާބުކޮށްދިނީ ކިމް މިން ޖާއެވެ. ފްރެއިބާގުން މެޗުގައި ކާމިޔާބުކުރި ހަމައެކަނި ލަނޑު މެޗުގެ 68 ވަނަ މިނެޓުގައި އެ ޓީމަށް ކާމިޔާބުކޮށްދިނީ މަތިއަސް ގިންޓާއެވެ. މި ލަނޑާ އެކު ފްރެއިބާގުން އިތުރު ލަނޑެއް ޖަހައި ނަތީޖާ ހަމަހަމަ ކުރެވޭތޯ މަސައްކަތް ކުރި ނަމަވެސް ބަޔާނުން ވަނީ ހިފަހައްޓާލައިފައެވެ.
މި ކާމިޔާބީއާ އެކު ބަޔާން މިހާރު އެއްވަނައިގައި އޮތީ 48 ޕޮއިންޓާ އެކު ހަ ޕޮއިންޓުގެ ލީޑަކާ އެކުގައެވެ. ފްރެއިބާގް އޮތީ 27 ޕޮއިންޓާ އެކު 10 ވަނައިގައެވެ.
ބަޔާނަށް ހަ ޕޮއިންޓްގެ ލީޑެއް ލިބިފައިވަނީ ދެވަނައިގައި އޮތް އެންމެ ފަހުގެ ޗެމްޕިއަން ބަޔާ ލެވަކޫސެނާއި އާރްބީ ލެއިޕްޒިގް ބައްދަލުކުރި މެޗު 2 ލަނޑު 2 ލަނޑުން އެއްވަރުވުމުންނެވެ. މެޗުގައި ލެވަކޫސެނުން ދެ ލަނޑުގެ ލީޑެއް ފުރަތަމަ ހާފުގައި ޕެޓްރިކް ޝިކާއި އެލެއިކްސް ގާސިއާ ކާމިޔާބުކޮށްދިން ދެ ލަނޑުން ނެގި ނަމަވެސް ލެއިޕްޒިގުން ވަނީ ފަހަތުން އަރައި ދެ ލަނޑު ކާމިޔާބުކޮށް، ނަތީޖާ ހަމަހަމަކޮށްފައެވެ. ދެ ލަނޑުގެ ތެރެއިން ފުރަތަމަ ލަނޑު ޑޭވިޑް ރައުމް ކާމިޔާބުކޮށްދިންއިރު ދެވަނަ ލަނޑަކީ ލެވަކޫސެންގެ އެޑްމޮންޑް ޓަޕްސޮބާ އަތުން ބައި ކޮޅަށް ވަން ލަނޑެކެވެ.
މެޗު އެއްވަރުވުމުން ލެވަކޫސެން އޮތީ 42 ޕޮއިންޓާ އެކު ދެވަނައިގައެވެ. ލެއިޕްޒިގް އޮތީ 32 ޕޮއިންޓާ އެކު ފަސްވަނައިގައެވެ.